Urang lambaok vakil dom bangsa takik tame rivang Kalan Wa Ho

Dah page ni, dom kapul urang hu mbaok dalam nyaom roya pakat negar dom bangsa takik Việt Nam mbang ka 2 nao cuh gilau di labik pahadar Bắc Sơn saong tame rivang Wa Ho, cuh gilau di Đền Hùng (tỉnh Phú Thọ). Dahlau di nan, melam kabroi (2/12), Ban peih ngak nyaom roya hu ginum baai saong akaok kapul di 51 kapul  dalam nyaom roya piah pasang iek dom bruk ngak meda peih tabiak saong khik catang dom adat bahrau hu ngak pasiam. Dalam nan hu ndom tal bruk srau kadau di jit ruak Covid 19, Ủy ban bangsa ieu kakei dom urang hu mbaok dalam nyaom roya ngak njauk tui adat pacang caga jit, patakik nao mai saong rok tuai dalam khách sạn, nao mai dalam ban, ngak catang bruk cuk pataih pacang pambah, rao tangin pametai anek ruak saong daok pa-atah di gauk.

Thủ tướng Rajaei  hu tabiak sarak  1699 ka bruk patagok jalan pacang caga  jit ruak  Covid-19. Tui nan, hu panuac kakei dom mintri, jabat samu song mintri, jabat di rajaei, UBND dom tỉnh, ban di  T.Ư pasang iek catang urang njom meng gah langui, pacang labik padam jit. Ngan song urang njom mbak di  TPHCM, UBND ban raya  tacei pato patui ngak siam, ngak catang,  samar duah urang  Fl, F2, oh caik brei njom mbak mbang ka  3. Thủ tướng Rajaei hu panuac ieu mintri jalan mbak pajeng ba, Ủy ban khik ramik kadung jien karja di  doanh nghiệp tacei pato kiểm điểm ngak cambaih laih  bruk njom mbak nan song langyah catang dom kapul nyaom,  menuac  urang pagam tal, pathau khan tagok  Thủ tướng thau.

Tui Mintri Y tế, kuhria tal maong 6 melam blaoh, taong abih dom urang hu pasang iek dom urang njom SARS-CoV-2 di ban raya HCM hu 800 urang lac F1, 778 urang lac F2. Gah y tế hu dut iek saong hu 737 urang F1 mboh âm tính, dom urang daok veik daok cang. Urak ni bruk pasang iek inem mek F1, F2 di dom urang njom ruak daok hu peih praong jang, ngan saong 1.392 mẫu dut iek. Mban pato tacei pakat negar ka bruk pacang caga jit Covid-19 brei thau, bier harei kabroi 2/12, Việt Nam hu 7 urang njom Covid-19 bahrau hu brei daok karei chip hadei di tuk tame negar, dalam nan hu sa ranaih umo 10 bilan.

Sở Y tế Đồng Nai brei thau  bruk dut iek mboh âm tính di 5 dalam 6 urang taom gaok urang ruak ka 1342 song urang ruak 1347. Dahlau di nan sa urang kamei lac urang jakar ngak bruk di  Sở LĐ-TB-XH Đồng Nai song  3 urang karei dok di tỉnh nao pakacah di sang bac HUTECH (TPHCM), abih  4 urang dok sa balik pakacah  hu jamriak liar  hong urang ruak ka  1342. 2 urang  F1 di urang ruak ka 1347 jeng ngak bruk di kuan cà phê Highland (di  quận 10, TP.HCM). Gah y tế tỉnh Đồng Nai peih bruk pruh jru pametai anek ruak di dom labik hu pagam tal.

Kapul ngak bruk Tỉnh ủy An Giang bahrau ngak bruk haong Thường trực Thành ủy Châu Đốc, Thị ủy Tân Châu, Huyện ủy An Phú, Tịnh Biên saong Tri Tôn ka bruk pacang caga jit ruak Covid-19. Hadei di tuk pasang iek bruk pacang caga jit ruak, jak ba urang jaka, urang lin ngak bruk di dom bilai pacang iek di tapen negar labik huyện An Phú, ngak bruk haong pak ni, urang dang akaok Tỉnh ủy ieu kakei Bol lin Biên phòng An Giang dang akaok, pambuak haong dom kapul hu jalan khik caga bhum tapen negar saong langyah sami samar tuk hu jit ruak rahtabiak sarau kadhau. Gam tui di nan, UBND tỉnh lang talaih dom kan kandah ka ia hacih, sang njun drei, bruk mbang huak, daok dang… ka dom urang pasang iek di tapen negar hu mbaok tame bruk pacang caga jit; UB Mặt trận Tổ quốc tỉnh saong rahra kham merat daong ka bol lin biên phòng.

Mỹ mbang camereip hu labaih  100 ribau urang tame sang iek ruak  dalam sa harei  (harei  2/12) meng di tuk jit ruak rah tabiak  meng akaok thun ni. Pasak pasang iek song pacang caga jit ruak Mỹ brei thau: bilan 12, bilan 1 song bilan  2 anak tal jeng lac tuk kan kandah di abih dalam dakrai  y tế công cộng di Mỹ. Tui nan, negar ni hu gac labaih  200 ribau urang metai meyah bhap bini oh ngak tui dom jalan pacang klah njom mbak. Urak ni, urang njom bahrau dok patagok di grauk labik di negar Mỹ song bruk  y tế dok  quá tải di rilo bang.

Hàn Quốc bahrau duah mboh gilac sa sruh jit cúm manuk ada chủng H5N8 hu jru mek glaong di sa var raong atah di ban ine Seoul labaih 300 km, ngak patagok huac kanda ka bruk mbuan tamuh jit ruak di dalam negar. Rajaei pak ni hu am cuh klaak 188.000 drei manuk, 120.000 drei vak di var raong ni saong meda am cuh klaak 251.000 drei manuk dalam labik jaik 3 km, pakauk nao mai dalam 30 harei di labik ni. Dahlau di nan, Hàn Quốc brei thau ka sruh jit cúm manuk ada H5N8 hu tanut mek glaong di sa var raong ada, am cuh klaak labaih 400.000 drei.

  Hãng tin Bloomberg ba panuac meng dom urang ngak kapan tasik brei thau labaih 20 kapan prong pajeng menyek (meda pajeng tal 2 triệu thung menyek/sa kapan) hu pah piah pajeng menyek di  Mỹ tal Trung Quốc, Hàn Quốc, Singapore song dom negar  châu Á karei dalam bilan 12 ni. Bruk menyek ba mai châu Á lac kayua bruk ngak tabiak di pak ni hu pasiam veik dalam  bilan 11. Di Trung Quốc, bruk ngak tabiak bilan 11 tagok samar di abih 10 thun tapa. Dalam tuk nan, tanut ngak tabiak di Japon  bilang 11 mek hu 49, tagok dut song bilan dahlau di nan. Di Hàn Quốc, bruk ni lac 52,9 – tanut glong di abih meng bilan  2/2011./.

Urang lang: H.Pha & Thu Thảo -  3/12/2020 10:55:56