Ndih tapui tabiak dalam sa baoh sang kathaot, ame plang aval, amaik sa drei rambah rambeih raong dua adei sa-ai Trung mbang bac. Daok bac pakat klau, Trung padeih bac piah salih tapa bac nghề saong hatai caong khin jeng thợ cơ khí naih joi piah ngak bruk dauh jien daong amaik raong adei  mbang bac.

Dalam sa mbang tui kapol urang pasiam veik radaih oto di huyện Bù Gia Mập (Bình Phước), sa baoh boong-ke jaleih saong kateik tagok ngak brei dua gah takai di Trung oh daok nao mai hu. Raidiuk di Trung kak kajap saong sruh radaih lăn meng nan. Nan lac tukvak kan kandah di abih, Trung tuk halei jeng melau mboh drei oh ngak hu hagait. Luac harei ndih sa labik, Trung khan lac rilo tuk khin duah jalan metai dhit.

Thun 2012, hu bruk pachreih ba di adei sa-ai , ayut sahabat, sa-ai Trung tut angan tame kapol urang jaoh jo ban sit Đồng Xoài pakacah di hoi thao brei ka urang jaoh jo tỉnh Bình Phước. Tapa nan, Sa-ai mek hu giải nhất môn radaih lăn saong giải khuyến khích môn radaih lắc. Trung brei thau: “ Ini yau sa prein khang pachreih ba Trung, hu hatai jia tame rup drei piah dui veih radiuk drei tagok. Trung mboh raidiuk ini njauk diuk kayua vin taom dar drei hu biak rilo urang anit ranam.”

Yam tapa dom mặc cảm di rup drei, sa-ai Trung khang hatai tame ban raya HCM tui bac bruk pasiam veik điện cơ di tal bac bruk ngak brei ka urang jaoh jo saong uranaih metui. Di labik ini, Trung taom gaok dom  yut dreih yau drei ngak brei Trung hatai jia kajap jang tuk sahaneng mboh raidiuk daok hu rilo urang kan kandah jang drei.

Hadei di tuk bac tamat blaoh, Trung mesre adei sa-ai, ayut sahabat 30 trieu dong buh tame peih cửa hàng pasiam veik điện cơ di jalan Phú Riềng Đỏ, phường Tân Phú, ban sit Đồng Xoài. Yaom lac gaok oh lac takik kan kandah, hatai kham merat ralo, Trung dak harei dak padang hu hatai jia di tuai damuai.

Meng nan urang duah mai dak harei dak rilo jang, jien mek tame jeng tagok drah samar. Oh lac pablei salih, pasiam veik, Trung daok taduan tame dom urang jaoh jo piah pato bruk brei saoh oh mek jien, duah bruk ngak brei ka rilo urang dalam palei. Mboh bruk padang ngak cơ sở hạ tầng dak harei dak  rilo, Trung ba drap ar di sang drei padang di gilang piah mesre phun jien, gam saong jien patak pataom hu buh tame blei radaih tải pajeng ba pablei salih pandap xây dựng, cuah patau, blaoh blei hu radaih mac xúc…

  Hadei di 4 thun, meng kham merat di drei, mbiah tal in sa-ai Trung hu jeng sa urang po cửa hàng pablei salih, pasiam veik  saong brei pah mac xây dựng saong pablei pandap xây dựng gam saong 3 sruh radaih xe ben, xe cuốc ngan saong 10 urang ngak bruk yaok harei saong ngak tui bilan, jien bilan meng 3 tal 6 trieu dong sa bilan. Hadei di tuk kaoh abih jien buh tame ngak, Trung mek tame hu jaik 600 trieu đồng yaok thun.

Sa-ai Phạm Viết Nhật Linh, Phó akok kapol urang Dam dara ban sit Đồng Xoài brei thau: Đỗ Bá Trung nan lac sa dalam dom urang likei yau kareih camin di ban sit Đồng Xoài. Yaom lac jaoh jo, min sa-ai Trung thau yam tagok ngak kaya meda meng prein yawa di drei./.