Dom urang jakar mai gilac veik thủy điện Rào Trăng 3 duah 11 urang lahik labaih 5 bilan tapa

Dom kuhria caga ka bruk palih ruah urang ka Quốc hội mbang 15 song urang ka Hội đồng bhap bini dom pakat vaktu 2021-2026 hu Hội đồng palih ruah pakat negar pathau khan dalam nyaom biai di Quốc hội mesup ni (25/3). Angan dom urang hu tabiak piah pilih ruah ka Quốc hội song Hđbhap bini dom pakat hu khan brei thau di harei 28/4. Abih tih urang tabiak piah pilih ruah ka Quốc hội lac 1.084 urang (dalam nan hu 205 urang kayua dom jabat, kapul nyaom di Trung ương ba tabiak, 803 urang kayua dom jabat, kapul nyaom di dom tỉnh ban batabiak, 76 urang eng drei tabiak ứng cử), tui kuhria mek hu 2,17 mbang dut song tong abih urang Quốc hội hu palih ruah. 

Biar harei ini, Mentri Y tế brei thau bruk dut iek ruak di Sang iek ruak Bệnh nhiệt đới Trung ương ngan saong mẫu di urang ruak ndih tapui thun 1943, daok di huyen Thanh Oai, Ha Noi mboh am tinh ngan saong SARS-CoV-2. Bruk dut iek mboh ruak dương tính dahlau nan di Sang iek ruak Đa khoa Hà Đông tok piah thau blaoh caga. Tui bruk ba tabiak, mẫu dut iek ruak hu payua tal Sang iek ruak Bệnh nhiệt đới Trung ương saong Pasak pasang iek ruak kik Hà Nội piah dut iek ruak. Urang ruak hu brei daok karei, tui iek di sang iek ruak saong brei mek mẫu dut iek ruak di harei paguh 26/3.

12 boh sang di Tiền Giang song Vĩnh Long ka oh jao taneh atah abih tih 200m, ieu tagok yaom bayar, ba tal bruk padang tatua Mỹ Thuận 2 njauk suai damuai jang. Khaw tin nan hu ba tabiak di var ngak bruk di mintri jalan mbak pajeng ba song UBND tỉnh Tiền Giang mesup harei 25/3. Danak dak tatua Mỹ Thuận 2 nao tapa krong Tiền, atah 6,6 km, abih tih phun jien buh tame labaih 5.000 tỷ đồng. Danak dak hadei di tuk ngak salah bloh dong patrun patakik radaih nao mai di tatua Mỹ Thuận song jalan roya 1A. Meyah oh jhul pakhang bruk peih taneh, danak dak kan si ngak salah dalam thun 2023 yau bruk batabiak.

Di Thừa Thiên - Huế, page ini, urang lin, công an mai gilac veik thủy điện Rào Trăng 3 duah 11 urang lahik labaih 5 bilan tapa. Tui jalan ngak, dom urang nan brei beik ar pacang jalan ia nduac gah hanuk gah angaok kraong Rào Trăng trun; pataom rilo radaih mac kuac dalam 3 mbon ceik tal tal taneh klak, tui nan duah dom labik hu duah dahlau di nan. Melam 12 bilan 10 thun 2020, tabung ceik glaong labaih 120 met jaleih kateik abih dom baoh sang di sang mac thủy điện Rào Trăng 3, ba tal 17 urang haluk lam metai, mbiah tal ini bahrau duah hu 6 urang metai.

Mesup ni, mintri Công an pambuak bruk song Công an TPHCM song Công an tỉnh Đồng Nai mai pacang cakak, pasang iek, duah thau cửa hàng xăng menyek ka 1 (jalan Nguyễn Kiệm, phường 3, quận Gò Vấp, TPHCM). Bruk pasang iek cửa hàng xăng menyek ni hu mong lac pagam tal jalan ngak tabiak, pablei salih 2,7 triệu lít xăng ja bo Công an tỉnh Đồng Nai song dom jabat mintri Công an song công an dom tỉnh ban chap hu dahlau di nan oh lavik.

Negar Anh daok kuhria ba Prang tame “ angan bhong meriak” brei takik nao mai saong pasang iek catang labik taphia negar kayua mbuan njom mbak virut chủng birau. Tuai damuai mai meng dom taneh ia dalam bhong meriak oh brei tame negar Anh, meyah oh lac urang negar Anh atau Ireland, atau hu adat brei daok negar Anh. Prang dang anak jit ruak Covid-19 mbang ka 3 saong harei 24/ 3 njauk brei peih praong labik pacang cakak. Dom urang Covid-19 kayua biến chủng Nam Phi saong Brazil di Pháp tagok samar, ngak kan kandah rilo.

Tui Hãng Reuters, po kapan song gah bảo hiểm hu taduan bayar pok jien prong dalam mbang kapan pajeng pandap prong Ever Given atah 400 m pacang gar kênh đào Suez. Sruh kapan njauk gar veik pak ni meng mesup 23/3 hadei di tuk oh peih hu kayua hangin khang song ribuk cuah. Tui urang ilamu, po kapan lac công ty Shoei Kisen KK (Nhật Bản) njauk bayar pok jien khat lahik, jang yau dom kapan karei karei ndok bayar kayua njauk gar jalan tasik urang dok angaok jalan nao tapa. Kênh đào Suez lac pabah mbang meng châu Âu nao châu Á, taeng thun 2019 pabak labaih 19.000 mbang kapan song labaih 1,25 tỉ tấn pandap panda.

Jabat Khí tượng Australia harei ini brei thau, labaih 20 ribau urang daok gar tavak kayua hajan ia sua praong oh ka bhain mboh dalam labaih 50 thun ini mai, meda lac 100 thun tapa” di Australia. Hajan meng kreh melam 20/03 di rilo labik bhum esar taneh ia ni ba tal ia dauk, ia sua saong palai pajua ralo labik. Urak ini ia di jaik abih dom kraong tagok glaong saong nduac khang./.

Urang lang: Ái Nghiêm – Hani Pha – 25/03 16:35:52