Rilo labik pacang veik piah patrun urang tame tabiak 

Dom menuac njom covid-19 dalam bhap bini di taneh ia drei harei 19/8 lac 10.639 urang di 37 tỉnh, ban, glaong abih kuhria meng tuk jit tamuh tabiak di akaok thun 2020 tal ini. TP.HCM jeng daok hu menuac njom rilo di abih, 4.425 urang, patui di nan, lac Bình Dương 3.255 urang. Dalam taneh ia urak ini hu 660 urang ruak trak daok taong ruak meng ICU; 27 urang biak trak hu taong ruak meng ECMO. Taphia bruk dom urang ruak tagok glaong, harei kabroi jeng hu bruk bui sambai tuk 5.000 menuac thit abih ruak, tui nan, abih tih urang ruak Covid-19 hu taong thit abih ruak tagok labaih 120 rabau. Bắc Kạn, Quảng Ninh tapa 30 harei oh hu menuac njom bahrau; 5 tỉnh karei tapa 14 harei oh hu urang njaom bahrau.

Di mbang ginum biai hong ban raya .HCM, Bình Dương, Long An, Đồng Nai  harei  19/8, Akaok mintri  Y tế Nguyễn Thanh Long brei thau lac meda brei padang bilai y tế lưu động iek glang urang njom Covid-19. Dom bilai y tế tui kuhria hu padang di  xã, phường, labik hu rilo menuac urang, labik rilo urang njom. Bilai hu meng 1 tal 2 bác sĩ song  5-7 urang jakar y tế karei tui bruk di yaok labik. Pak ni brei hu takik di abih  meng 2 bình oxy tagok, song ginup mbaok pacang; kadung jru cấp cứu lưu động.

Thành ủy ban Thuận An, tỉnh Bình Dương birau brei padeih bruk  dua urang  lac, ong Nguyễn Thanh Hội saong Lý Bình Sơn, Akok HĐ bhap bini saong Akok UB bhap bini phường Thuận Giao. Dua urang jakar nan karung karang dalam bruk tacei ba jalan pacang caga jit, ba tal bruk peih ngak Sarak 16 di phường oh catang, dom urang njom mbak tagok samar. Birau ini, urang njom Covid-19 di phường Thuận Giao tagok gam gam, bruk sang ka raidiuk  bhap bini gaok rilo kan kandah dalam tuk pa-atah gauk jeng oh ka sumu.

Piah patagok bruk pacang caga jit Covid-19 dalam bhum urang bangsa takik, UBND tỉnh Bạc Liêu hu tacei pato dom puk palei, dom jabat dalam tỉnh patagok bruk pathau khan meng sap bangsa angaok riyak langik rayo papar sap, papar binguk di tỉnh, pambuak riyak langik di dom danak dak papar sap, papar binguk di rayo, báo Trung ương meng dom sap di bhap bini bangsa takik ka dom sarak di Đảng, hukum di karja. Bạc Liêu jeng sangka patagok bruk ngak di urang hu angan je dalam  pathau khan, jak ba bhap bini bangsa peih ngak njauk tui tacei pato di karja palei saong tacei pato di Mintri Y tế dalam pacang caga jit ruak.

Công an tỉnh Ninh Thuận bahrau cap kreik Trần Xuân Thảo (ndih tapui thun 1993) piah duah thau ka bruk brei mesraiy trak laba. Tapa duah thau mboh lac, meng akaok thun 2020, Thảo nyu pambuak bruk haong dom urang daok di dom tỉnh gah Brak tame Ninh Thuận piah brei mesraiy trak laba. Thảo lac menuac pan akaok, tabiak jien, khik ramik saong tacei pato brei ka labaih 140 urang sraiy jien, tui jalan bayar pataom tui harei, laba meng 240 - 360% sa thun, ngan saong yaom jien brei mesraiy abih tih jaik 600 triệu đồng.

Dom menuac umo mala 50 thun njauk tame sang iek ruak di Mỹ kayua Covid-19 urak ini daok di tanut glaong abih kuhria meng tuk jit tamuh tabiak di taneh ia ini. Tui pasak pasang iek saong pacang caga jit ruak, dom menuac tame sang iek ruak rilo meng lac ka oh klauk vaccine pacang Covid-19 saong pasak pasang iek saong pacang caga jit ruak Mỹ ndom lac, bruk ini daok tagok glaong dalam 1 bilan tal meyah bruk njaom mbak oh hu pasang iek. Tal urak ini, hu labaih meteh dom menuac sia Mỹ hu klauk ginup saong takik di abih 70% dom menuac praong hu klauk takik di nyu 1 mbang vaccine.  

Gah Taliban hu panuac ieu dom urang pan akaok dom puk palei di Afghanistan oh pang pathau khan oh siam ka Taliban saong hu panuac ieu rahra jhui nduac klaak taneh ia. Panuac nan hu ba tabiak tuk rilo menuac daok meriak gauk cang gah lingiu mblang kapal haoh Kabul piah hu ba tabiak truh Afghanistan, dalam tuk rilo bruk trun jalan cagar veik Taliban daok pambak praong di rilo ban raya di taneh ia ini. Dom menuac taneh ia langiu khin tabiak truh Afghanistan, Taliban ndom lac daong brei ginup abih. Gam haong nan, jeng hu panuac lac, brei pacang cakak abih dom bruk mesruh gauk, taong paoh gauk.

Hội đồng Bảo an Liên Hợp Quốc hu ginum biai ka dom kan kandah meda ba mai meng gah “Karja Islam” ngan saong bruk sron mbon di dunya. Tui dom urang pathau khan, dom dhar kapul haong dom kapul pambuak tal di “Karja Islam” mboh yau daok tagok bruk ngak di bhum Tây Phi haong Sahel, Đông saong Trung Phi, Afghanistan saong dom labik karei dalam Nam Á. Daok bruk bahrau abih di Afghanistan, dom taneh ia ndom lac, brei hu dom jalan ngak praong piah plaih kol khủng bố mek labik ini ngak labik daok siam mekre, salamat./.

Urang lang: Hanipha- Ái Nghiêm 20/8