Ba hatai caong khin di urang ngak tame dom nyaom baai, dom mbang ndom biai nao mai haong po DN

Tui LĐLĐ tỉnh Đồng Nai,dalam 6 bilan akaok thun, hu oh takik DN dalam tỉnh gaok kan kandah kayua jit praong Covid-19 nan ye njauk patakik bruk ngak, gaok mai padieh ngak kayua oh hu đơn hàng. Tui nan, urang ngak oh hu bruk ngak tani tanat, salih gauk padeih bruk atau padieh harak pambuak bruk ngak... Anak bruk nan, dom pakat Công đoàn hu caga, kham marat peih tabiak rilo bruk pataom mek panuac, duah thau ka raiduk, bruk ngak di urang ngak bruk saong hu mbaok tame pasang iek dom sarak hukum pambuak tapak tal urang ngak. Saong patagok bruk di urang lambaok, khik caga quyền lợi di urang ngak bruk saong khik talei pambuak bruk siam mekre, tani tanat, patagok di DN.

Gam tui di nan, dom pakat Công đoàn tỉnh Đồng Nai hu kak kajap haong bruk ngak, nao pagam saong DN lang talaih dom kan kandah dalam bruk ngak. Rilo Công đoàn cơ sở (CĐCS) hu jeng labik pambuak talei rohim di urang pandar manuac ngak saong urang ngak, tuk halei jeng samar drah, ba hatai caong khin di urang ngak tame dom nyaom baai, dom mbang ndom biai nao mai haong po DN. Tapa nan, mek hu rilo siam lagaih, rik tame bruk pachrieh pacacah, patagok kein laba dalam bruk ngak, khik tanat bruk ngak saong meng nan tani tanat raidiuk di urang ngak bruk.

Jeng meng pambuak bruk khang kajap, jhul khang pathau khan ka dom kein laba dalam bruk padang talei pambuak bruk siam mekre di dom jabat di kapul Công đoàn, rilo DN dak harei dak caik hatai tal bruk peih ngak dom sarak dân chủ; peih bruk ndom biai tui bilan saong mbaoh tangin tame harak sanya ngak bruk rilo manuac ngan haong dom kadha hu siam ka urang ngak bruk. Dalam 6 bilan akaok thun ni, hu 75 blah sanya ngak bruk rilo manuac hu mbaoh tangin ngak bahrau, mek hu 88,2%, patagok taong abih dom blah sanya urak ni di dalam tỉnh lac 1.193 blah sanya dalam 1.545 DN hu kapul Công đoàn. Dom DN hu peh bruk ndom biai  862 mbang haong urang ngak bruk piah pang dom panuac caong di urang ngak bruk saong ngak pasiam samar drah.

Tui ong Vũ Hoàng Sơn, Phó akaok jabat Lao động - tiền lương - bảo hiểm xã hội di Sở LĐ-TBXH, meng akaok thun tal urak ni, yaom lac jit ruak daok kan kandah, bruk ngak di dom DN saong bruk ngak di dom urang ngak bruk njauk kan kandah min rilo DN jeng daok kham marat khik bruk ngak di urang ngak bruk. Talei pambuak bruk di dom DN biak siam lagaih, tani tanat. Piah hu siam mekre yau nan, njauk ndom tal bruk ngak, labik dang di dom urang jaka Công đoàn cơ sở dalam bruk pambuak talei rohim di urang ngak bruk saong DN piah gam thau gauk jang, gam klah rabha saong yam tapa kan kandah, khik ginup dom sarak ka urang ngak bruk.

Daok tui dom urang jaka Công đoàn, bruk padang talei pambuak bruk siam lagaih di DN oh njauk cang tal bruk tame ngak, pambuak bruk di Công đoàn bo lac po DN saong urang ngak bruk njauk paglaong hatai pambuak gauk, thau cambaih dom kein laba di dua gah. Po DN njauk brei mboh bruk iek glaong, pasang iek hatai caong di urang ngak bruk tuk ba tabiak dom sarak pambuak tal jien bilan, jien thưởng piah ramik ka nyu lagaih haong bruk ngak di DN. Abih di nyu nan lac, DN njauk caik vaktu piah pang dom suh sah di urang ngak bruk rilo jang. Taphia di nan, urang ngak bruk njauk tui pang, duah thau, ndom biai gam gam haong CĐCS, po DN piah thau cambaih ka bruk ngak. Hu yau nan, dom bruk kandah gauk sit mada mbuan langah hu samar, talei pambuak bruk dak harei dak caok rok patagok khang kajap.

Vaktu tapa, bruk dom DN langyah dom sarak di urang ngak bruk ka oh hu njauk hatai gauk ba tal dom bruk mesuh gauk dalam bruk ngak bo tabung glaong lac rahtabiak di labik ngak bruk hu rilo manuac. Dom bruk ni bhian pambuak tal bruk ramik veik jien bilan tối thiểu vùng, tagok jien bilan yaok thun, tavak sre jien bilan, pasiam bruk mbang huak di kreih ka ngak bruk... Hadei di tuk bruk rahtabiak, Công đoàn pakat angaok hu pambuak haong dom pakat karja saong jabat jaka mai ngak bruk haong dom DN. Tui nan, dom DN hu langyah dom caong khin di urang ngak bruk tui adat di hukum saong urang ngak bruk hu mai ngak bruk veik.

Phó akaok LĐLĐ tỉnh Hồ Thanh Hồng ndom lac, dalam dom bilan puac thun, dom pakat Công đoàn njauk pambuak bruk catang haong po DN patagok bruk ndom mayai nao mai, duah thau hatai sahneng, caong khin, padang talei pambuak bruk siam lagaih di DN, plaih meriah gauk ngak bruk rah tabiak ngak kan kandah tal bruk ngak saong raidiuk di urang ngak bruk. Taphia di nan, piah patakik bruk padieh bruk rilo manuac, caong lac dom urang jaka CĐCS njauk pasang iek catang bruk peih ngak dom sarak di DN haong urang ngak bruk. Njauk salih bahrau jalan ngak saong asal kadha pathau khan dom sarak, hukum Lao động piah urang ngak bruk saong DN thau, pambuak gauk khang kajap padang talei pambuak bruk tani tanat. Gam tui di nan, urang jaka Công đoàn njauk abih hatai saong kham marat dalam bruk ngak, nao jaik urang ngak, khin daong piah ka quyền lợi di urang ngak bruk hu khik ginup.

Akaok CĐCS Công ty TNHH Mabuchi Motor Việt Nam (ban Biên Hòa) Phạm Thị Phương brei thau, di DN saai ngak bruk, yaok 3 bilan jeng peih bruk ndom biai nao mai 1 mbang piah thau saong langyah dom caong khin di urang ngak bruk. Tapa nan, DN saong urang ngak bruk thau cambaih gauk, urang ngak bruk jia tame, kham marat hu mbaok tame dom bruk pacacah urang ngak bruk hadah krah piah ngak tabiak dom pandap panda dak harei dak siam jang ka DN. Daok tui akaok CĐCS Công ty TNHH Pousung Việt Nam (H.Trảng Bom) Lê Nhật Trường, tuk ndom mayai nao mai haong urang ngak bruk, DN njauk caik ka urang ngak bruk hu ndom biai tui hatai saong pachrieh urang brei panuac piah pasiam veik, oh njauk maong lap atau oh ba tame akaok. Mayah ngak hu yau nan, DN meda hu kein biak rilo jang lahik. Urang ngak bruk meda lac prein yava ngak tabiak drap ar, daong ka DN dang kajap di mangaok darak pasa.

Urang lang: Thu Thảo - 28/07