Dalam dom harei ini, dom palei ngak bruk chế biến kaya ikan hu angan di tỉnh Trà Vinh biak chreih chrai. Sang harei jeng jan van haong bruk pambu thu, đóng gói piah samar ba nao pablei, ngak ka bruk uan raok thun bahrau di dom palei tapen tasik mai samar jang dom labik karei.

Dom harei ini, dom mblang pambu di dom baoh sang dalam palei Động Cao saong Định An, xã Đông Hải, huyện Duyên Hải saong khóm 1, khóm 2, bal sit Mỹ Long, huyện Cầu Ngang jeng bak ikan, hadang thu. Lingiu di nan, dom jalan tame palei ngak jeng hu paga pacang, patakik bruk nao mai piah ngak mblang pambu, nao tal halei jeng mboh pahe ikan tasik. Amuk Hồ Thị Nguyệt – sa po vựa  ikan thu di bal sit Mỹ Long brei thau: urak ini vựa ikan thu di amuk daok pah rilo urang ngak piah samar jao pandap nan ye thei jeng jan van. Yau nan min, yaom jaik abih dom janih ikan, hadang thu jeng grap tanat, hu dom janih tagok hasit: “Ikan ye ralo jang dom thun dahlau min yaom hu janih tagok, hu janih jeng yau nan. Daok số lượng ye dahlau deih sa rituh urak ini 5 rituh ký. Ngak oh ginup pablei min merat ngak piah samar jao ka urang”.

Palei ngak kaya ikan Mỹ Long urak ini hu biak ralo janih ikan thu bingi hu angan yau ikan đù, ikan dalah kubao, ikan bei, mực ngan haong yaom pablei meng 25.000 –300.000 đồng sa kg tui janih. Dak jaik tết janih pandap ini dak pablei nduac. Meyah dahlau deih dom baoh sang ngak ikan thu blei meng 300 tal 500kg ikan nguyên liệu piah ngak, ye luac bilan ini yaok harei tagok meng 500kg tal 800kg. Nan ye piah hu ginup ikan nguyên liệu, langiu ikan blei di dom gilai taong ikan di palei, dom baoh sang daok nao duah blei meng dom palei karei. Amuk Nguyễn Thị Út Lan, baoh sang ngak ikan thu labaih 20 thun tapa brei thau:Tết ye pandap pablei hu ralo jang, cảng drei oh ginup nan ye dahlak nao tapa dom cảng diah piah blei ikan mai ngak. Sa harei dahlak jao ka urang meng sa tal dua tấn ikan thu.

Dalam tuk nan di palei ngak kaya ikan Xóm Đáy - Đông Hải, huyện Duyên Hải, labik hu rilo kaya ikan nan ye palei ngak ini brei tabiak dom janih pandap bingi di abih bhum meraong. Abih di nyu nan lac hadang thu yaom glaong biak glaong meng 800.000 tal 1.200.000đ sa kg min jeng hu ralo urang duah blei. Ong Dương Tiến Hải, po labik ngak Hadang ikan thu Tiến Hải, sa dalam 4 labik ngak ikan thu di palei ngak ini brei thau: meng hu pasak pachreih kong tỉnh đầu tư mac bluh thu nan ye ngak hu rilo jang saong khik hu an toàn vệ sinh pandap panda, taphia di nan pasak xúc tiến thương mại daong tut angan pablei salih nan ye pndap ngak tabiak dak harei dak hu ralo urang thau tal saong hu tame dalam dom siêu thị, nyaom darak pasar parang iek meyaih khan pandap Việt… Anak tal, cơ sở brei peih prong jang, blei rilo mac moc piah pabak số lượng đơn hàng jeng yau điều kiện pablei tabiak negar langiu. Ong Dương Tiến Hải ndom lac: Piah caga pablei tết, cơ sở Tiến Hải hu caga 5 tấn hadang thu pablei ka darak An Lạc saong Bình Điền, bal raya HCM saong Siêu thị Metro. Daok siêu thị Co op mart daok kuhria mboh tangin haong cơ sở. Urak ini yaom kaom lac tani tanat saong dahlak saneng anak tal jeng grap tanat min.

Yaok thun dom palei ngak bruk chế biến kaya ikan Xóm Đáy - Đông Hải saong Mỹ Long pablei tabiak darak pasar labaih 20.000 tấn ikan thu dom janih, jien mek tame hu labaih 650 tỷ đồng. Piah daong ka dom palei ngak patagok tani tanat, paglaong jien mek tame ka bhap bini, UB bhap bini tỉnh Trà Vinh hu công nhận 2 palei ngak ini saong 1.200 baoh sang ngak bruk ini. Dalam thun ini, tỉnh hu daong labaih 3 tỷ đồng piah padang ngak dom công trình hạ tầng saong công nghệ sản xuất khép kín, mek hu tanut chuẩn ngan haong hadang thu chủ lực. Ong Trần Quốc Tuấn, giám đốc sở Công Thương tỉnh Trà Vinh lac: Di Trà Vinh hu dua palei ngak bruk chế biến kaya ikan. Urak ini khaol dahlak hu tacei ka dom cơ sở ini salih mac maoc, thiết bị tapa hệ thống tự động piah mek hu tanut pablei tabiak negar langiu. Abih di nyu nan lac dalam tuk tết ini, ngak habar caga ginup pandap pablei tết, biak sangka tal bruk an toàn vẹ sinh pandap panda .

Tui dom po cơ sở ngak kaya ikan tỉnh Trà Vinh, tết thun ini ikan thu dom janih pablei hu rilo jang dom thun dahlau min yaom jeng grap tanat. Makna di nyu kayua dom bilan puac thun urang taong mek ikan hu mbuan lagaih, dalam tuk nan yaom menyek trun nan ye yaom ikan nguyên liệu jeng oh tagok.

Meng dom siam lagaih yau nan oh ta-eng hagait dom baoh sang taong ikan hu laba ralo saong dom labik chế biến kaya ikan jeng chreih chrai jang, urang ngak hu jien mek tame ralo jang. Mai meng nan bo bhap bani diuk meng bruk taong ikan tasik di Trà Vinh rai diuk hu siam mekre jang saong hu mbang tết dalam ginup meda jang./.