Thủ tướng Nguyễn Xuân Phúc dalam van jak ba rik daong jien daong pacang caga jit ruak 

Meng di tuk Hà Nội hu urang ruak njaom Covid 19 akaok mereip, dom baoh sang chung cư jeng ngak catang bruk dut iek thân nhiệt saong pandar mikva daok dalam chung cư njauk rao tangin hacih, cuk khẩu trang tuk gilac veik mai sang. Anak sảnh tầng 1 saong tầng hầm labik halei jeng hu dung dịch sát khuẩn thu brei ka manuac sia rao tangin. Yaom lac lahik biak rilo tukvak dak talei piah rao tangin saong dut iek thân nhiệt min manuac urang halei jeng pachreih tui jalan ngak saong ngak njauk tui bruk ba tabiak. Ong Nguyễn Xuân Trường 70 thun daok di phường Việt Hưng, quận Long Biên Hà Nội brei thau, jit ruak dak harei dak khang nan ye bruk cuk khẩu trang saong sát khuẩn atngin dahlau di tuk gilac veik mai sang nan lac bruk njauk ngak. Kadha nan oh lac daong pacang khik pren yava ka manuac sia dalam sang ong bo daok lac ka taong abih manuac urang jaik taphia: Bruk ini njauk ngak kayua chung cư hu biak rilo manuac urang. Manuac sia nao meng grauk labik mai nan ye meyah hu urang njaom mbak ruak y nyu pambak biak samar. Yau nan mban khik iek baoh sang biak caik hatai tal bruk ini blei dom thiết bị y tế mai piah sát khuẩn pacang ruak. Corona lac ruak bo WHO hu brei thau lac jit prong paje,  khaol drei lac bhap bani  Việt Nam hu ilamo iek ruak corona paje ye patui veik patagok piah pacang jit. Taphia di nan patagok bruk sát khuẩn, cuk khẩu trang kayua  pacang caga ruak siam jang iek ruak.

Di dom labik daok hu rilo manuac atau sang chung cư hu yaok rituh baoh sang daok, dom tổ dân phố peih bruk pathau khan, patagok bruk pruh cloramin b, kakei bhap bani caik hatai tal bruk cuk khẩu trang tuk nao tal labik hu rilo manuac urang saong bhian rao tangin hacih piah plaih njaom mbak covid 19. Di dom labik sinh hoạt chung, urang vệ sinh hu ngak bruk rao uak taong abih meng cồn sát khuẩn, abih di nyu lac dom tangin pal pabah mbang, ô bấm saong tangin pan dalam thang máy. Anai Nguyễn Thị Đường, urang vệ sinh khu công nghiệp Sài Đồng brei thau, yaok sang chung cư pandar labaih 70 lit cồn piah rao tangin saong uak dom tangin pal, pabah mbang di sảnh chung: Taong abih dom tal, meng ala hầm tal tal 16 njauk sát khuẩn abih. 1 tuk uak sa mbang, pa-yeng nao pa-yeng mai blaoh uak veik, uak dom tangin pal di sang caik hareik, kanjan nao kabak, kanjan thang máy, jit yau ini glaih glar jaik 3 mbang bình thường, glaih glar yau nan jeng chấp nhận kayua jit grauk labik angaok dunya oh ta-eng hagait pak Hà Nội, ngak yau habar brei siam mekre ka rup drei saong bhap bani rahra.

Amuk Nguyễn Thị Hải Yến, Akaok Mặt trận negar phường Ngọc Lâm, quận Long Biên, Hà Nội ndom tal bruk ngak di cơ sở, dom xã phường, tổ dân phố saong labik daok di bhap bani dalam bruk pacang caga jit Covid 19: meng bruk ngak, trách nhiệm di drei, Mặt trận negar phường hu trách nhiệm akaok mereip nan lac pathau khan, jak ba bhap bani bình tĩnh dalam bruk pacang jit ruak, dalam bruk pacang cakak jit ruak. Trách nhiệm ka 2 nan lac pathau khan jak ba bhap bani pasang iek gauk.  Mặt trận negar peih bruk pacang jit, tui iek bruk peih ngak di karja pak labik daok, tổ dân phố.

  Piah pasang iek siam jit ruak, piah ka bhap bani rik daong pren yava, pachreih hatai pambuak bruk haong karja ngak njauk tui dom panuac kakei di gah y tế, brei hu bruk pambuak gauk saim mekre meng karja puk palei, abih di nyu lac dom tổ dân phố, cụm dân cư, dom labik daok jaik di abih. Meng dom bruk ngak mbuan mbiah, siam lagaih yau jak ba bhap bani bhian rao tangin meng japol, cuk khẩu trang di labik hu rilo manuac, bhian sát khuẩn tangin pal pabah mbang, phím bấm thang máy di dom labik hành chính công ayau chung cư rilo manuac, caik dom bồn rao tangin di kreh cụm dân cư piah ka bhap bani mbuan pandar… nan lac dom jalan ngak siam mekre piah dak padang dom pháo đài pacang jit dalam bhap bani./.

Urang lang: Jasi - 24/3