Po sang trọ brei trun jien atau oh mek jien pah duk daok saong jien điện, jien aia 

Piah ba tangin tame daong urang ngak kan kathaot yam tapa kan kandah dalam tukvak jit ruak Covid-19, tal urak ini dalam huyện Bình Chánh hu 242 po sang trọ brei trun jien atau oh mek jien  pah duk daok saong jien điện, jien aia ka dom urang ngak kan kandah pah duk daok. Dalam nan, xã Tân Kiên hu 102, bal sit Tân Túc hu 88 saong xã Bình Chánh hu 52 po sang trọ ngan haong jaik 2.700 duk daok hu po sang trọ brei trun meng 30 - 100% jien pah piah daong klah rabha kan kandah ka dom urang ngak kan kathaot. 

Pagap yau baoh sang ong Đoàn Hà daok di ấp 3, xã Tân Kiên, huyện Bình Chánh oh mek jien sang trọ saong jien điện jien aia ka 14 duk daok di sang drei dalam bilan 3. Tapa bruk ngak ini, jien mek tame sa bilan meda trun jaik 50 triệu đồng min ong Đoàn Hà saong rilo po sang trọ pak ini oh thei kuhri kuhria hagait bo tok caong khin ngak habar daong hu dom baoh sang pah sang trọ kan kandah dalam tuk jit ruak:  Thủ tướng Raja-ei hu ndom lac pacang  jit yau pacang kaol khamang, bhap bani thei hu hagait ye daong nan, dahlak mboh hu urang amaik rik daong ký brah, blaoh amaik 92 thun jik siuk pabang mbaok, mboh drei hu mbang hu angui ye drei daong ka urang kathaot, hu hadom thau nan, tui hatai daong hu hagait ye daong.

Yaom lac jien pah duk daok hu brei patrun atau oh mek jien dalam sa bilan oh lac rilo min biak hu yaom glaong dalam tuk jit ruak ini ngan haong sa-ai ngak jaing (ngak thợ hồ), sa-ai kumei ngak gah jik pet atau urang pablei pandap panda rah jalan. Sa-ai Võ Thị Phương Nhung, sa urang ngak gah jik pet di xã Tân Kiên hu brei patrun jien pah duk daok bui sambai khan lac: Kan kandah rilo, kayua lac adei jeng hu anek sit, trun hu binah halei thau binah nan. Hu patrun brei jien pah duk daok ye biak uan tabuan.

Ba gauk yam tapa kan kandah dalam bilan jit meng bruk jak ba dom po sang trọ brei trun jien pah atau oh mek jien pah duk daok nan lac danak dak hu dom puk palei di huyện Bình Chánh peih ngak dalam tukvak tapa piah pambak prong hatai anit ranam dalam bilan jit. Anak tal, dom puk palei dalam huyện daok nao jak ba  piah ka bruk ngak siam ini hu pambak prong. Ong Trương Ngọc Thanh Nhân, Bí thư Đảng ủy xã Bình Chánh, huyện Bình Chánh, TPHCM brei thau: Patagok hatai ranam taneh aia, daong ba gauk dalam tuk gaok kan kandah, abih di nyu lac dalam tuk jit ruak, urak ini hu 52/150 po sang trọ hu ngak tui bruk ini saong thei jeng abih hatai. Anak tal xã daok nao jak ba dom po sang trọ daok veik.

Oh caik ka dom urang ngak kan kathaot mboh metui medhar dalam bruk mesruh pacang jit Covid-19, kayua lac “urang dalam sa taneh ye njuak anit ranam gauk”. Nan lac jalan saneng, jalan ngak di rilo po sang trọ di huyện Bình Chánh, TPHCM./.

Urang lang: Jasi-27/4