Urak ini,dom sang bac phổ thông bangsa gam bac gam daok dalam tỉnh Bình Phước hu pakhang, pasiam, pabak hu bruk pato pakai urang jakar bangsa takik ka puk palei. Dalam tỉnh urak ini hu 7 sang bac phổ thông bangsa gam bac gam daok, yaok thun pachreih hu labaih 1.700 adei tui bac. Tal urak  ini, dom sang bac bangsa gam bac gam daok dalam tỉnh Bình Phước hu ginup cơ sở vật chất piah yam tame thun bac bahrau 2016-2017.

Thun bac 2016-2017 nan lac thun bac akaok meti gru saong anek saih sang bac phổ thông bangsa gam bac gam daok - Trung học cơ sở (THCS) saong Trung học phổ thông (THPT) Bù Gia Mập hu bac dalam sa sang bac bahrau,praong – siam saong hu ginup abih dom trang thiết bị. Thun bac ini, sang bac hu 63 gru pato, urang jakar gam haong 315 anek saih urang bangsa takik, dalam nan bangsa S’tieng hu ralo abih labaih 60%. Huyện Bù Gia Mập lac huyện prong, dom  anek saih ralo meng daok di bhum atah bayah, bhum tapen negar, jalan nao mai kan kandah, dom urang ngak amaik ngak ame oh sangka ralo tal bruk bac da-a di anek bhik, nan ye bruk pambuak pagam di baoh sang saong sang bac biak kan kandah.Mboh hu bruk nan, meng akaok bilan 8, Ban Giám hiệu haong dom anai gru, cei gru sang bac hu peih ralo jalan ngak piah nao rivang, duah thau ka rai diuk di di dom anek saih, pachreih ba dom adei daok atah sang di drei sa tukvak piah tame bac pak sang bac gam bac gam daok. Mai meng nan bo kreh bilan 8 meng blaoh, sang bac hu pataom ginup anek saih di 2 pakat THCS saong THPT.

Piah pabak bruk pato saong bac di dom gru saong anek saih sang bac phổ thông bangsa gam bac gam daok - THCS saong THPT Bù Gia Mập, Ủy ban bhap bani tỉnh Bình Phước buh tabiak labaih 53 tỷ đồng piah padang ngak bahrau sang bac. Tal urak ini, dom hạng mục hu ngak salah blaoh saong ba tame pandar ngan haong 14 duk bac, 8 duk chức năng saong 54 duk ndih...; dom sang mbang huak hu peih ngak njauk tui adat hukum urak ini. Amuk Nông Thị Liên – Akaok sang bac phổ phông Bangsa gam bac gam daok - THCS saong THPT Bù Gia Mập chreih chrai, lac: Mboh biak uan tabuan tuk hu sa baoh sang bac bahrau praong, siam, hu ginup pandap panda ka dom adei bac. Hu yau nan,  gru saong anek saih khaol dahlak njauk kham merat abih drei piah ba sang bac dak harei dak nao tagok gah chất lượng. Kol dahlak njauk kham merat jang piah khik hu angan tiên tiến, xuất sắc.

Bruk bui sambai di gru saong anek saih Sang bac phổ thông bangsa gam bac gam daok - THCS saong THPT Bù Gia Mập yau hu pabak jang rilo mbang tuk hu Mentri pato megru daong brei jaik 1 tỷ đồng piah blei máy vi tính ka sang bac. Daong ka gru saong anek saih paglaong bruk pandar cổng thông tin dalam bruk pato saong bac.

Jeng dalam dom sang bac phổ thông bangsa gam bac gam daok di tỉnh Bình Phước, dalam 5 thun tapa, sang bac phổ thông bangsa gam bac gam daok – THCS Đồng Phú pato hu labaih 1.000 anek saih urang bangsa takik. Dalam thun bac 2016-2017 ini, sang bac hu palih ruah 70 adei akaok pakat, patagok anek saih taong abih khối 290 adei. Meng akaok bilan 8 hội đồng sư phạm di sang bac hu ginum biai saong brei bruk cambaih laih ka yaok gru pato, yaok urang jakar dalam thun bac bahrau 2016-2017. Urak ini taong abih dom anek saih hu pataom mbaok ginup abih pak sang bac, ngak vệ sinh tal bac saong peih “Adit sinh hoạt tập thể akaok thun bac”. Dalam thun bac 2015-2016 meng blaoh, gru saong anek saih  sang bac phổ thông bangsa gam bac gam daok - THCS Đồng Phú mek hu thành tích njauk pok meyaom, taong abih dom anek saih puac pakat jeng hu tốt nghiệp THCS. Gru Phạm Quốc Tuân – Phaok Akaok sang bac phổ thông bangsa gam bac gam daok – THCS Đồng Phú brei thau: Dalam thun bac 2016-2017 ini, sang bac kham merat khik kajap dom thành tích mek hu dalam dom thun bac dahlau. Kadha praong nan lac gru pato joi saong anek saih joi  jang yau bruk khik iek labik mbang huak, ndih daok, labik ma-in ka anek saih gam daok. Abih di nyu nan lac bruk tốt nghiệp anek saih puac pakat patui veik mek hu tỷ lệ 100%.

Oh lac caik hatai tal bruk buh jien tabiak padang ngak cơ sở vật chất, pandap panda pato saong bac, bruk palih ruah anek saih tame dom sang bac ini jeng hu peih ngak njauk adat hukum. Tui ong Nguyễn Văn Hùng – Akaok Sở Pato megru tỉnh Bình Phước, dom anek saih palih ruah tame akaok pakat tal 6, tal 10 nan lac dam dara anek kamuan urang bangsa takik dalam tỉnh; daok anek kamuan urang Yuan, sang bac palih ruah oh tapa 5% anek saih urang Yuan daok suai lavik (meng 5 thun tagok) pak 9 xã, 32 palei biak kan kandah di tỉnh Bình Phước tui Quyết định ka 204/QĐ-TTg harei 1/2/2016 di Thủ tướng Raja-ei. Gru Hùng daok brei thau lac:  Tal urak ini jeng hu caga jaik ginup abih ka dom adei labik mbang, ndih saong bac da-a pak dom sang bac bangsa gam bac gam daok. Meda lac dom chế độ ka gru pato saong anek saih di sang bac bangsa gam bac gam daok jeng hu ngak njauk saong samu. Khik ka dom adei hu bac da-a dalam siam mekre di abih.

Sang bac bangsa gam bac gam daok hu labik dang biak prong dalam bruk pato pakai urang jakar hu ilamu ka bhum urang bangsa takik. Dom sang bac phổ thông bangsa gam bac gam daok hu pasiam saong patagok meda pabak hu bruk pato pakai urang jakar bangsa takik ka puk palei. Meng hatung hatian siam mekre di dom gru pato jeng yau bruk buh jien tame ngak hu siam lagaih di tỉnh, dom sang bac bangsa gam bac gam daok, lac labik paglaong hatai caong khin ka dom anek saih, daong pato pakai urang jakar bangsa takik ka tỉnh Bình Phước./.