Mbang padeih lễ Quốc khánh 2/9, akaok UBND dom tỉnh, ban tacei pato ngak catang, hu siam lagaih bruk pacang caga jit dalam labik di drei

“Dom tỉnh ban daok pa-atah di gauk oh caik rah tabiak bruk pataom rilo menuac atau hu rilo menuac tabiak jalan”. Tacei pato ini hu Thủ tướng Phạm Minh Chính ba tabiak dalam harak samar drah bahrau hu patabiak ka bruk patagok pacang caga jit COVID-19 dalam mbang padeih lễ Quốc khánh 2/9. Harak nan ndom lac, tukvak tapa, dom tỉnh, ban pa-atah di gauk mek hu dom jak jeng. Min di dom tỉnh, ban, daok hu menuac tabiak jalan rilo, urang ruak dalam bhap bini jeng daok tagok. Meng dom hagait hu mboh tapa mbang padeih lễ 30/4, Thủ tướng ieu kakei lac mbang padeih lễ Quốc khánh 2/9, akaok UBND dom tỉnh, ban tacei pato ngak catang, hu siam lagaih bruk pacang caga jit dalam labik di drei.

Công an ban raya HCM brei thau, meng ieu bhap bini pathau khan mã QR tuk tapa dom bilai pasang iek, mboh hu 30 urang F0 nao mai di jalan. Hu 2 urang ngak ja harak nao jalan di công an quận 10 saong 12 daok hu công an pasang iek, duah thau. Công an ban raya HCM urak ni daok pambuak haong Sở Y tế ba angan tame yaok harei dom F0 tame cơ sở dữ liệu di taneh ia. F0 nao mai ye công an meda duah mboh, pacang viek, langyah tui adat piah plaih bruk njom mbak dalam rahra.

Đồng Nai daok brei paatah di gauk tui Sarak 16 di Thủ tướng Rajaei meng mon 12 melam 1/9 tal abih harei 15/9. UBND tỉnh ieu bhap bini ngak catang tui panuac kakei, oh tabiak jalan meng mon 6 biar harei dahalu tal mon 6 mesup harei hadei. Dalam tuk pa-atah di gauk, taong abih dom jabat Karja, dom kapul nyaom chính trị - xã hội; dom jabat di Trung ương daok dalam tỉnh brei menuac nao ngak oh tapa 1/4 dom urang jakar, urang ngak dalam jabat…Tui CDC Đồng Nai, kuhria tal harei 31/8, tỉnh ini hu 23.839 urang njom COVID-19. Tỉnh ngak hu jaik blaoh bruk dut iek piah ba dom F0 tabiak truh bhap bini saong meng ini tal harei 5/9, daok dut iek piah duah dom F0 daok veik.

Tỉnh Bà Rịa-Vũng Tàu daok peih bruk dut iek ka yaok ribau bhau bhap bini daok rah tui jalan Tiền Cảng, ban Vũng Tàu, kayua pambuak tal sruh jit bahrau di dalam ban. Dahlau di nan, dah page harei 30/8 di phường Thắng Nhất hu 3 urang, dalam nan hu 1 urang peih radaih, 1 urang nao tui radaih saong 1 urang ngak kong, tapa dut iek samar mboh dương tính SARS-CoV-2. Tapa dut iek samar drah ka 600 bhap bini pambuak tal angaok jalan Tiền Cảng ye hu mboh 25 urang dương tính SARS-CoV-2. 

Hadei di jaik 1 thun padang ngak, Rayo papr sap bhum Nam Trung Bộ di tỉnh Ninh Thuận, di Rayo sap ndem Việt Nam hu ba tame ngak bruk, papar sap ka bhum tasik biển Đông saong dom tỉnh tapen tasik Nam Trung Bộ. Rayo padang di taneh praong 16 hecta, di xã Phước Dinh, huyện Thuận Nam, hu prein khang 400 kw, 1071 kHz. Bruk pakhang prein papar atah dom danak dak papar sap di Rayo sap ndem Việt Nam piah pathau khan ka jalan tacei ba di Đảng saong hukum di Karja hu tal bhap bini dom tỉnh tapen tasik Nam Trung bộ saong kaoh pulao Hoàng Sa, Trường Sa nan lac bruk njauk ngak, rik daong khik kajap an ninh chính trị, salamad xã hội, brei thau bruk ngak po di tasik tapa riya para sap.

Liên minh châu Âu brei thau lac ngak hu bruk ba tabiak lac 70% rahra umo mangaok 18 thun hu klauk ginup 2 mbang vaccine caga COVID-19, labaih 250 triệu urang hu prein pacang cakak jit. Min, jabat Y tế dunya di châu Âu jeng kakei lac, meng dom urang njom ruak yaok hareu di dom taneh ia châu Âu jeng daok di tanut glaong, jit praong COVID-19 meda ngak ka 236 ribau urang di châu Âu metai meng urak ini tal puac thun 2021. Anak bruk ini, dom taneh ia yau ye France, Đức… daok kuhria klauk mbang vaccine ka 3 ka dom urang taha, urang oh hu prein pacang caga haong ruak, dalam bilan 9/2021.

Mỹ hu ngak salah bruk panduan ba bhap bini saong bol lin tabiak truh Afghanistan. Mentri Quốc phòng Mỹ  khan lac meda brei patui veik bruk kapal haok oh hu urang peih taong tame dom labik di Gah IS saong dom labik karei di  Afghanistan meyah mboh bruk sraw kadau. Yau nan min, Mentri Quốc phòng Mỹ  brei thau bruk di lin Mỹ pak Afghanistan tamat blaoh, saong urak ini oh hu bruk huac hagait di Afghanistan ngan saong bruk salamat di negar Mỹ.

Takik di nyu 29 urang metai dalam bala biak pandik harao tuk sa sruh radaih buýt laik trun takai ciek di Peru. Ini lac bala ngak matai manuac trak ka 2 rahtabiak di Peru bahrau dalam dom harei min. dahlau di nan, sa sruh radaih buýt pajeng urang ngak laih trun takai ciek ngak ka 16 urang metai. Dom bala pambuak tal radaih buýt oh lac bruk kan mboh di Peru, abih di nyu nan lac di talei ceik An-đét. Talei ceik ni atah luac jalan di taneh ia ngan haong dom canah jalan biak kan kandah, kan maong mboh anak kayua dom daning patau glaong./.

           Urang lang: Thu Thao – Ai Nghiem – 01/09 10:38:31 10:38:31