Oh njauk hatai haong dom hagait ngak hu bloh, kham merat cakrok patagok kinh tế sang drei meng dua plak tangin, meng akaok sahneng di drei, sahneng duah jalan ngak lagaih piah dui pachreih urang đoàn, dam dara tame tổ chức đoàn, nan lac dom hagait bo kol dahlak hu mboh tapa dom urang dang akaok kapul dam dara Cam di tỉnh Ninh Thuận.

Menek tabiak saong praong tagok di palei Cam Mỹ Nghiệp, urak ini daok dalam khu phố 11, ban sit Phước Dân – sa labik hu angan haong bruk menyim khan bai di urang Cam huyện Ninh Phước, tỉnh Ninh Thuận, sa-ai Hán Văn Luận tuk halei jeng caik hatai sahneng kuhria tal bruk ngak meng kan di muk kei drei. Hadei di tuk hu dom danak dak patagok palei menyim meng kan, sa-ai khang hatai salih jalan ngak, ba ilamu bahrau tame bruk menyim. Sa-ai kham merat tame tal ban raya Hồ Chí Minh piah bac megru ilamu saong khang hatai nao mesraiy jien di Gilang Pariak Sarak Karja, di ayut sahabat saong di gauk gar hu abih tih labaih 200 triệu đồng. Sa-ai blei 2 jamriak menyim yaom 100 triệu đồng, jien daok veik sa-ai blei merai saong dom vật liệu karei. Tuk camereip kayua kurang ilamu nan ye bruk ngak mbang gaok rilo kan kandah, gaok tuk nyu khat phun jien. Min kayua ini lac bruk ngak meng kan di muk kei nan ye sa-ai oh kadun likuk saong khang hatai ngak ka pahu. Sa-ai nao tal dom tỉnh Tây Nguyên piah duah labik pablei pandap di drei.

Meng nan, cơ sở menyim di sa-ai hu rilo labik pambuak bruk blei pandap, pandap ngak tabiak oh ginup pablei. Bloh sa-ai peih praong bruk ngak, blei rilo jamriak, mac moc. Tal harei ini, cơ sở di sa-ai hu 8 jamriak menyim, 1 jamriak móc merai, 2 mác suốt yaom abih tih jaik 900 triệu đồng. Tapa nan, cơ sở di sa-ai hu ba bruk ngak ka 13 dam dara dalam palei saong yaom jien bilan meng 2 tal 2 triệu meteh yaok urang yaok bilan. Abih tih yaom jien pablei pandap yaok thun hu labaih 400 triệu đồng, kaoh bloh phun jien, sa-ai daok laba hu jaik 150 triệu đồng. Oh padeih di bruk ngak khan bai saoh, sa-ai daok cakrok bruk ngak mbang kinh tế trang trại, pala hareik raong limo pambuak haong ngak hamu. Tapa nan, ba bruk ngak tui tukvak ka 8 dam dara karei. Tui jalan ngak yau ini, yaok thun sa-ai mek tame hu meng 80 tal 90 triệu đồng.

Oh lac gheih ngak kinh tế, sa-ai Luận daok lac urang dang akaok dam dara khu phố 11 ban sit Phước Dân. Lac akaok Chi hội dam dara khu phố 11, yaok thun sa-ai haong chi bộ Đảng, mBan Quản lý khu phố peih ngak rilo bruk yau: melam daoh tamia tuk tame thun bahrau, giao lưu văn nghệ - thể thao tuk Kate di urang Cam… tapa nan ieu pataom hu rilo dam dara tame tổ chức đoàn. Sa-ai Luận brei thau: Duah thau hatai caong di dam dara, padang mblang me-in di tuk padeih hè yaok thun, peih bruk caoh mbang, taong valei ka dam dara, SV, anek saih. Tapa nan, daong ka dam dara urang đoàn hu taom gaok gauk, hu bac megru ilamu di gauk.

 Daok sa-ai Báo Thị Lưu Vân urak ini daok ngak bruk di Pasak Y tế huyện Ninh Phước oh lac joi bruk ngak, abih hatai ka bruk ngak, sa-ai daok lac sa urang dang akaok kapul dam dara di pasak. Bac tamat Đại học Dược Hà Nội di thun 2009, sa-ai hu ba nao ngak bruk di Pasak Y tế huyện Ninh Phước – sa bhum palei hu rilo urang bangsa Cam di tỉnh Ninh Thuận. Meng ilamu bac megru hu dalam sang bac, sa-ai thau pambuak haong ilamu di dom y, bác sĩ nao dahlau piah iek ruak ka bhap bini. Sa-ai daok roh duah saong padang bein phun jru Nam, harei harei buh pren yava tabiak iek glang. Meng bruk pandar phun jru Nam, sa-ai pataom iek veik saong vak tabiak baoh tapuk “Phun jru Nam – dom kadha njauk thau” meng dua – dua sap Cam – Yuan piah tacei ka mikva Cam di labik ini thau. Meng ilamu saong abih hatung hatian ka bruk ngak, gam saong hatai jia di dom urang ngak bruk haong gauk, bilan 8 thun 2014, sa-ai Vân hu pok ngak Trưởng khoa Dược di Pasak Y tế huyện Ninh Phước. Sa-ai brei thau: Adei daok sit oh ka hu rilo ilamu, nan ye adei bac megru meng dom urang nao dahlau. Hagait oh ka thau ye adei tangi sua. Lingiu di nan adei daok duah thau tapa mạng, tapa dom anai gru, cei gru. Dahlau meng tuk ngak hagait brei sahneng kuhria ka nyu tantu, cambaih laih.   

Kadha njauk uan tabuan nan lac dak harei dak hu rilo urang đoàn, dam dara Cam chreih chrai ba akaok nao dahlau dalam dom bruk xã hội di Đoàn, abih di nyu nan lac bruk daoh tamia, me-in thể thao saong cakrok patagok kinh tế. Sa-ai Vũ Thị Thùy Trang – Phó Bí thư Tỉnh Đoàn Ninh Thuận brei thau: dam dara Cam rilo meng tari taring, hu hatai kham merat yam tagok, thau yam tapa kan kandah piah padang mbang ngui. Rilo dam dara Cam khin sahneng, khin ngak, jak jeng dalam raidiuk: Yau sa-ai Hán Văn Luận, sang tuk camereip jeng kan kandah, min meng hatai caong pamedeih tagok palei menyim meng kan, sa-ai khang hatai nao mesraiy jien meng rilo gah piah blei jamriak, mac moc, piah menyim, ngak khan bai. Ba ilamu bahrau tame bruk pala drak, raong glang. Tal urak ini, sa-ai hu jak jeng dalam raidiuk. Taphia di nan, daok hu sa-ai Vạn Quan Phú Đoan lac urang likei Cam jeng abih hatai ka pandap lan am Hamu Traok, bloh sa-ai Phú Minh Mẫn xã Phước Nam, sa-ai Đạo Thanh Nhớ di xã Nhơn Sơn, sa-ai Phú Hữu An di xã Phước Hữu, anaii Báo Thị Lưu Vân… lac dom urang thau pambuak tame pren khang di palei drei, gam haong bruk pachreih tui di dom urang dalam sang drei, gam haong karja dom pakat, ba tangin tame cakrok, patagok kinh tế xã hội puk palei saong padang rilo bruk  pachreih hu rilo dam dara urang đoàn pataom mbaok tame.

Biak njauk iek praong, njauk pok meyaom dom urang đoàn, dam dara Cam yau Hán Văn Luận, Báo Thị Lưu Vân... hu pilih ruah bhum taneh bak pandiak, bak ngin Ninh Thuận piah padang mbang ngui, jeng dom urang dang akaok Đoàn hu angan je. Meng tari taring, abih hatung hatian ka bruk ngak, dom likei kumei Cam ini hu rilo jalan ngak gheih piah dui pachreih, ieu pataom dam dara mai haong tổ chức Đoàn, ba bruk Đoàn di puk palei dak harei dak cakrok, patagok khang jang./.