Dom urang pal akaok hu mbaok pak di hội trường biak avar 

Dah page ni (25/1), di Hà Nội, nyaom roya pakat negar mbang ka 13 di Đảng peih nyaom biai caga. Dom urang hu mbaok brei tapa adat ngak bruk, pilih ruah kapul ba akaok, kapul ngak Thư ký, mBan taong yaom urang lambaok; brei tapa danak dak ngak bruk, adat pilih di nyaom roya 13… Tui danak dak, Nyaom roya 13 peih tabiak di harei 26/1, tui kuhria hu tamat di dah page 2/2. Abih tih dom urang hu mbaok tame lac 1.587 urang, rilo abih dalam 13 mbang nyaom roya Đảng pakat negar.

Mikva dom bangsa takik daok pamaong tal nyaom roya pakat negar mbang ka XIII di Đảng ngan haong rilo hatai jia saong caong maong. Ong Lưu Sanh Thanh, sa  halau janeng Ahier daok di tỉnh Ninh Thuận ndem lac:      

Kol Dahlak caong nyaom roya pato tacei, ba mai kein laba piah cak rok patagok kinh tế xã hội bhum mikva bangsa takik. Đảng saong kanja sangka jang tal dom bangsa adei saai dalam taneh ia Việt Nam drei dak harei dak patagok saong jum pataom gauk.)         

Rilo urang ilamo bangsa Cam di Bình Thuận bui sambai anak dom jak jeng bo taneh ia drei ngak hu dalam tukvak tapa. Ong Dụng Văn Duy, bangsa Cam, gru pato di sang bac Chính trị tỉnh Bình Thuận brei thau:

"Dahlak caong saong biak jia  tame lac nyaom roya mbang ka XIII di Đảng meda hadah hadai pilih ruah tabiak dom urang lmabaok naih ghieh, khin saneng khin ngak, oh huac salih bahrau, abih drei duh ka bhap bini."

Ông Thạch Sen, urang bangsa Khmer, akaok mban khik ramik chùa Dơi di tỉnh Sóc Trăng jia lac Đảng drei meda tui veik hu dom sarak njauk, ba taneh ia cak rok patagok.

"Bhap bini  Khmer jia tame jalan ngak di Đảng, sarak di karja, njauk haong hatai caong di mikva. Dahlak jia lac hadei di nyaom roya mbang ini, taneh ia drei dak harei dak cakrok"

 # Dag page ni (25/1), di mblang bien pakat negar Pác Bó (tỉnh Cao Bằng) rah tabiak bruk ginum biai ilamo pahadar 80 thun harei Wa Ho mai veik taneh ia tacei ba cách mạng Việt Nam (28/1/1941-28/1/2021). Harak ndom puac di dom urang roh duah  brei mboh makna, yaom  glaong di tư tưởng Hồ Chí Minh luac dalam bruk mesuh metak meblah mek saron mbon jang yau dak padang, khik caga taneh ia. Mbang ginum biai jeng brei mboh hatai anit ranam, iek praong di bhap bini dom bangsa karei jeng yau di bhap bini brei ka Wa.  

Harei 25/1, Sở Y tế tỉnh Vĩnh Long brei thau bruk dut iek mbang ka 16 di “urang ruak 1440” mboh âm tính nCoV, hu brei nao sang. Dalam tukvak tui iek hadei di tuk tabiak truh sang iek ruak di labik brei daok karei, urang nandaok hu dut iek 2 mbang. “Urang ruak ka 1440” di nyaom 6 urang mai meng Myanmar tame negar Viet Nam suan hukum tapa jalan sit, njuak Công an tỉnh Vĩnh Long ba tabiak kaoh tui hukum kayua Ngak  pambak jit ruak praong mbuan ba tal metai.

Oh ka tal sa adit hadei di tuk Tổng thống Mỹ Joe Biden brei thau lac Mỹ tame veik Thỏa thuận khí hậu Paris 2015, Đặc phái viên Mỹ ka langik tasik John Kerry harei ini gam saong  dom urang ngak praong di dunya hu mbaok di Nyaom biai pakat glaong ka bruk biến đổi khí hậu, rah tabiak dalam dua harei  25 saong 26/1. Tui kuhria, dom urang ngak praong meda ba tabiak sa danak dak rilo bruk ngak, ba tabiak jalan ngak piah daong dunya pacang caga biến đổi khí hậu.

Tổng thống Mexico Lô-pết Ô-bra-đô (López Obrador) brei thau, tapa dut iek mboh ong dương tính saong Covid-19. Tổng thống Ô-bra-đô meng lavik mai njauk urang ndem puac lac oh ngak njauk bruk pacang caga jit ruak.Ong takik cuk tanyiak pacang pabah idung saong nao mai thuvi thuvar ngak rilo bruk, jeng yau cagar veik bruk pacang caga bruk ngak  mbang kinh tế.  Mexico hu jaik 150.000 urang metai kayua Covid-19 saong labaih 1,7 trieu urang njom ruak.

Niu Di-lân harei ini khan lac daok duah thau bruk sa urang dương tính Covid-19 dalam bhap bini, lac urang camereip abih hadei di labaih 2 bilan taneh ia ini oh hu thei njom ruak; virus di urang ruak nan, lac anek ruak birau.Niu Di-lân lac sa dalam dom taneh ngak siam abih dalam bruk pacang cakak jit Covid-19. Mbang puac abih taneh ia ini hu urang njaom ruak dalam bhap bini lac harei 18/11./.

Urang lang: " Ái Nghiêm -Thu Thảo -25/1