Dom urang ilamu khoa học ngak bruk di Jabat Thí nghiệm cúm

  Viện Vệ sinh dịch tễ trung ương lac sa dalam dom cơ sở khoa học dang akok dalam taneh ia gah y học dự phòng. “ Manuac ruak “ di dom urang nan oh lac urang ruak, bo lac dom drei virut sit biak sit, daok dalam dom mẫu mek mai di urang ruak. Ini lac sa bruk ngak biak mbuan gaok bala  kayua lac meyah blait tangin hasit, dom mẫu ruak par tabiak gah langiu ye rajakar ngak bruk xét nghiệm lac urang njauk ruak dahlau di abih.

Jabat Thí nghiệm cúm, Khoa Vi rút, Viện Vệ sinh dich tễ trung ương urak ini hu 9 urang jakar kumei dalm 12 urang jakar. Dom sa-ai kumei hu takik abih 10 thun ngak bruk, hu bac pasram gah salamat sinh học, biak naih joi bruk phân tích, abih di nyu lac hu yam tapa dom nguy hiem  tuk roh duah ka cúm manuk ada độc lực khang A/H5N1, jit cúm praong H1N1 thun 2009, vi rút MERS Cov thun 2012, dịch Ebola...Urang kumei ngak khoa học hu dom kein lagaih yau tani tanat, tỉ mỉ, oh pandiak hatai min ini lac bruk biak glaih glar. Luac harei daok dalam jabat thí nghiệm, dang anak dom  ruak kik njom mbak, dalam tuk bruk sang urang jeng ngak biak tani tanat.

Tukvak Covid-19 tamuh tabiak, dom urang dalam Khoa Vi rút meda lac oh hu harei halei padeih, ngak bruk gam harei lễ, Tết. Yaok urang brei salih gauk ngak bruk dalam bilik “An toàn sinh học pakat 3”. Piah ngak bruk dalam jabat đặc biệt ini, dom urang roh duah  brei hu dom tanut chuẩn biak catang ka prein yawa. Dalam bilik ngak bruk tuk halei jeng dang di nhiệt độ la-ar âm. Yam takai tame bilik ini, urang brei angui cuk khan ao pacang rup meng kaok tal takai, cuk camin pacang meta, cuk dua tal harum tangin, pacang pabah meng khau trang N95 biak kan suak yawa saong brei salih gauk ngak bruk piah hu salah. PGS.TS Lê Thị Quỳnh Mai khan lac: “ Dom tuk yau nan, khol dahlak oh brei ka drei kadun likuh, ngak bruk abih drei. Dom urang hu anek sit min brei abih hatung kayua bruk drei ngak biak njuak iek praong”.

  PGS.TS Nguyễn Lê Khánh Hằng khan lac: “ Gah likuh bruk jak jeng di bruk ngak, lac dom hysinh oh thei thau ka bruk takre, main sambai  di yaok urang kumei jakar. Kan kandah  oh hu tuk halei abih, min dom sa-ai oh ka tuk halei sahaneng klak bruk. Palih bruk ngak ini, khol dahlak thau lac dang anak rilo bruk mbuan njauk ruak kik min ngan saong 21 thun ngak bruk dalam bilik thí nghiệm, mbiak tal urak ini dahlak yam tapa hu dom suh sah saong daok patui bruk ini.” Payua panuac kakei tal dom rairah hadei nao tui jalan khoa học, PGS.TS Lê Thị Quỳnh Mai kakei: “Roh duah ilamu khoa học, abih di nyu lac khoa học cơ bản di Việt Nam oh mbuan, min meyah hu tui ngak  ye yaok urang brei caik hatai ranam di drei piah kak kajap suai lavik haong bruk ngak.”

Klak rabha haong urang ngak bruk haong gauk, GS.TS Đặng Đức Anh, Viện trưởng Viện Vệ sinh dịch tễ trung ương lac: “Dom urang jakar kumei bilik Thí nghiệm cúm ngak siam bruk sang danaok, gam naihjoi bruk chuyen mon. Ngan saong bruk taduan Giải thưởng Kovalevskaia thun 2019, dom urang nan lac dom urang patoa veik prein khang pacheih urang kumei Viet Nam kham merat yam tagok, khang hatai mbeik drei yam tame piah rik prein tame daong ka taneh ia, palei negar./.

Urang lang: A.Nghiem -16/3