Kapul urang kamei dân phòng bhum urang bangsa takik xã Xuân Phú pataom mbaok dahlau di tuk nao ngak bruk 

Kapul dân phòng ini hu padang tagok di bilan 10/2011 ngan haong 15 urang kamei. Bruk njauk biai nan lac, dalam kapul ini hu tal jaik meteh urang bangsa takik. Rilo adei sa-ai sang kan kandah, jan van haong bruk hit ngak mbang duah jien min jeng kham merat hu mbaok tame dom bruk ngak di kapul.

Di xã Xuân Phú, thei jeng thau tal Thổ Hiếu daok di ấp Bình Hòa. Atah di ini jaik 7 thun, kayua amaik ame oh hu tukvak sangka iek glang, pato pakai nan ye Thổ Hiếu klaak bac meteh dhi, bhian nao ma-in saong ayut sahabat, mesao gauk, taong gauk ngak sarau kadau puk palei. Meng ndom puac bingi pang, dom adei sa-ai  dalam kapul kamei dân phòng hu pato pakai ba Thổ Hiếu jeng urang dam siam hatai. Dom sa-ai hu ba Thổ Hiếu nao bac bruk ngak saong duah bruk ngak brei. Tal harei ini, Thổ Hiếu hu bruk ngak tani tanat saong abih hatai daong ka dom dam dara bahrau prong pasiam veik bruk ngak suan di drei.

Oh lac jak ba pato pakai dom dam dara nao suan jalan, Kapul urang kamei dân phòng daok samar hu mbaok langyah dom bruk taong paoh gauk dalam sang. S-ai K.H. – urang kamei bangsa Chơ Ro (daok di ấp Bình Hòa, xã Xuân Phú, huyện Xuân Lộc, Đồng Nai) khan lac, dahlau diah sang biak kan kandah, pasang bhian pataom gauk menyum alak, mai tal sang ye taong poh diuk anek. Dom adei sa-ai dalam Kapul urang kamei dân phòng di xã kham merat tacei pato, daong ka pasang di sa-ai K.H mboh hu bruk ngak suan di drei, kham merat ngak mbang, dak padang rai diuk siam jang.

Xuân Phú lac xã hu rilo menuac, hu 12 bangsa takik ngan saong 850 baoh sang, labaih 4.400 menuac. Bhap bani pak ini diuk rai meng bruk ngak nong, rai diuk kan kandah saong ilamu oh samu guak. Ini lac dom makna ba tal bruk ngak suan trật tự an ninh saong tệ nạn xã hội rah tabiak rilo. Kapul urang kamei dân phòng hu pambuak bruk siam mekre haong công an xã, công an huyện khik kajap an ninh trật tự dalam xã. Sa-ai Trương Thị Ngọc Hạnh, Akaok kapul urang kamei xã Xuân Phú, akaok kapul urang kamei dân phòng brei thau: jaik abih dom mbang bala angaok jalan mbak, taong poh guak,… rah tabiak dalam xã, urang dalam kapul hu mbaok dahlau di abih, ba urang njuak bala nao cấp cứu, pacang khik labik nan cang  Công an mai langyah. Jaik abih dom adei sa-ai kumei dalam kapul thei jeng hu rai diuk kan kandah, hu urang njuak pok yaok asal pa-aok blait, dhul yaok lon aia piah pablei ve chai min melam mai ye cuk angaok rup ao dân phòng, chreih chai nao ngak bruk.

Tui yaok pataom di Công an huyện Xuân Lộc, jaik 10 thun ngak bruk, Kapul urang kamei dân phòng dalam bhum urang bangsa takik xã Xuân Phú hu khan brei ka Công an xã thau labaih 400 bruk, pambuak haong Công an giải tán dom labik ma-in mbia, caoh menuk, cap mek rilo urang co klaik drap ar... Thượng tá Cao Xuân Hoa – Phaok akaok Công an huyện Xuân Lộc taong yaom, Kapul urang kamei dân phòng dalam bhum urang bangsa takik xã Xuân Phú ngak bruk biak siam, daong pacang caga kol tội phạm. Dahlau di tuk padang kapul, bruk an ninh trật tự di xã Xuân Phú, abih di nyu lac dalam ấp Bình Hòa, ấp hu rilo bhap bani bangsa takik diuk rai, bhian rah tabiak bruk co klaik, pakacah radaih, ma-in mbia, caoh menuk, munyum alak. Min meng thun 2011 tak ini, bruk an ninh trật tự dalam xã, abih di nyu nan lac dalam dom palei bangsa takik biak tani tanat, yaok thun tok rah tabiak meng 1 tal 2 bruk, oh daok dom bruk ngak suan adat hukum biak trak, njuak xử lý hình sự. Ini lac bruk ngak biak siam, ba mai siam lagaih dalam bruk pacang caga tội phạm, meda pambak prong, abih di nyu lac dom bhum urang bangsa takik.

Amuk Lê Thị Ngọc Loan – Akaok Kapul urang kamei tỉnh Đồng Nai brei thau, mô hình Kapul urang kamei dân phòng dalam bhum urang bangsa takik xã Xuân Phú nan lac mô hình điểm di Kapul urang kamei tỉnh. Yaom lac urang kamei takai laman tangin lamuac min dom sa-ai biak hu trách nhiệm saong ngak siam bruk di drei. Kapul urang kamei tỉnh hu daong pachreih saong palaghaih cakrok patagok, pambak prong mô hình di dom chi hội urang kamei karei dalam tỉnh, rik daong khik kajap an ninh trật tự dalam bhum./.

Urang lang: Jasi