Pathau mikva saong grauk ayut !

Sang kan kathaot, anek rilo, pasang metai…min dom urang kumei ini kham merat yam tapa dom kan kandah, raong ba anek bik praong tagok jeng manuac jeng urang ngak bruk daong ka puk paga, palei negar. Kadha vak ala ini di Jasi – urang vak di Rayo sao ndem Viet Nam daok di ban raya HCM brei ka kol drei thau cambaih jang ka bruk ini:

Lac sa urang kumei bilau, min sa-ai Thông Thị Bích daok di palei 3, ban sit Ma Lâm, huyện Hàm Thuận Bắc kham merat ngak mbang raong anek mbang bac tal labik tal dhua. Daok hadar tuk kan kandah di abih, langiu 3 sào hamu, sa-ai daok harei harei “dang di pandiak, riak di hajan” ngak duah jien raong 4 cambuai mbang. Oh kadun likuh anak dom kan kandah, bruk hagait sa-ai jeng ngak, patak pataom jien, mbang cai kali kalih piah ka dom urang anek hu trei tian, angui sir. Sa-ai tuk halei jeng sahaneng lac “kan yau halei jeng kham yam tapa, daok prein daok ngak  kayua anak meta daok hu dom urang anek salut mbut…”. Yaom lac kan kathaot, min dalam sang sit taik tahak di sa-ai jeng hu sap bac akhar huroh ê, a saong sap klao bui sambai di dom anek jo gauk. Oh thei thau lac gah likuk sap klao nan, lac dom ia hauk dom kham merat oh thau glaih glar di urang amaik. Bloh thun bilan tapa nao, dom urang anek di sa-ai hu tame đại học. Dom haduh hatai saong dom kan kandah bahrau daok mai saong sa-ai. Sa-ai Thông Thị Bích lac:

Băng sap Cam

Jeng gaok oh thau hadom kan kandah, glaih glar yau sa-ai Thông Thị Bích, sa-ai Nguyễn Thị Loan daok di palei Lạc Trị, xã Phú Lạc, huyện Tuy Phong, tỉnh Bình Thuận jeng kham merat yam tapa piah ngak siam bruk di sa urang di sa urang kumei, urang amaik. Pasang di sa-ai labuh radaih daok xe lăn oh ngak hagait hu. Taong abih bruk hamu apuh saong sang danaok kayau sa-ai ndua naong. Oh mbuah kan ka thar vak, harei ini tapa harei diah, yaom lac langik pandiak tau  hajan, urang kumei nan ngak abih meng bruk hamu apuh tal bruk lisei ia dalam sang. Yaom lac sang tuk halei jeng kurang anak kurang likuk min sa-ai pachreih dom anek nao bac. Dom harei padeih, hu dom urang anek daong bruk sang ye sa-ai nao yuak hareik, buac lasun mbang pah dauh jien mbang tapa harei. Sa-ai Loan khan lac, kan kandah yau halei sa-ai oh huac, bruk bo sa-ai huac di abih nan lac anek klak bac. Daok khol nyu bac tal halei, sa-ai kham raong tal nan meyah njauk pablei hamu taneh jeng hu.

Sap Cam

Meda lac sang sa-ai Nại Ka Hương daok pak palei Patih Thành Tín, xã An Hải, huyện Ninh Phước, tỉnh Ninh Thuận mboh anit di abih. Pasang ruak ung thư, sa-ai pablei abih hamu taneh piah iek ruak, min oh tapa hu. Pasang lahik nao caik veik ka sa-ai sa urang anek kumei kamlo tangaoh. Oh hu hamu taneh, sa-ai nao ngak mbang apah, tal bilan yuak sa-ai nao yuh pong, nao duan padai. Patuah sa-ai thau hasit ka jru Nam nan tal tuk abih bilan yuak, sa-ai nao pablei jru duah jien. Tuk tagok Tay Nguyen, tuk tabiak gah Barak, tuk tame gah meraong. Raidiuk kan kandah jang tuk anek kumei tangaok, kamlo di sa-ai ndih tapui anek likei bo oh thau thei ame di nyu. Pandik hatai, ia meta haok tame dalam, sa-ai glaih glar ngak mbang raong anek kumei saong ja taco metui ame di drei. Tal urak ini,  taco di sa-ai bac tal 6 nan jeng lac bruk bui sambai praong abih di sa-ai. Sa-ai Hương brei thau:

 Sap Cam

Oh thau rilo akhar tapuh, oh hu rilo taneh riya, jien padai min bruk dreih gauk di dom sa-ai Thông Thị Bích, Nguyễn Thị Loan saong Nại Ka Hương nan lac bruk kham merat; oh huac glaih glar; yam tapa kan kandah piah kuhria ka baoh sang di drei. “Yaok phun yaok janih bingu, yaok sang yaok thar vak” min taong abih dom baoh sang nan thei jeng caong khin anek taco drei praong tagok, jak gheih.  Dom kham merat di dom urang kumei bangsa Cam nan yau baoh bingu hadah rik tame  ngak ka raidiuk siam jang./.