Dom urang ngak báo hu mbaok gam gam di dom sang iek ruak Covid-19

Dom harei tabung glaong pacang caga Covid-19, sa-ai Trần Thị Kim Dung, urang vak di rayo sap ndom VN daok di ban raya HCM glaih glar jang biak rilo. Rilo thun vak gah y tế, sa-ai thau cambaih bruk kanjah jhak di dom janih jit ruak  jeng yau jit Covid-19. Dahlau di tuk vak tin – vak kadha vak, sa-ai jeng duah thau cambaih dom harak gar di gah chuyên môn piah pathau khan njauk, cambaih laih tal urang pang, langyah biak tani tanat dom kanjah jhak di jit ruak saong jalan pacang caga: “Ngan saong rayo, sap tapak lac biak hu yaom galong nan ye dahlak hu nao tal dom labik atah yau sang iek ruak Dã chiến Củ chi, dom labik praong lingiu ban hu rilo menuac brei daok paatah di gauk piah urang pang rayo yau mboh di anak meta bruk pacang caga jit biak catang, brei thau saong pok meyaom bruk pacang jit di TPHCM”

Lac dom urang hu mbaok tapak thau cambaih bruk, dom urang ngak báo tuk halei jeng kham merat brei bhap bini thau samar di abih. Dalam dom harei glaih glar, luac dalam 2 bilan, urang vak Yến Ngọc, ngak bruk di Rayo papar binguk Nhân Dân di TPHCM meda lac harei halei  jeng nao tal dom labik brei daok paatah di gauk. Rilo mbang, urang amaik daok sa drei ini njauk ba tui anek likei bahrau 3 thun, kayua jit ruak njauk padeih bac, oh hu menuac khik iek, nao tui ngak bruk. Tuk mehit ayut khan atau bác sĩ brei thau ka dom urang ruak bahrau ba tame atau 1 urang ruak bahrau thit ruak, sa-ai Ngọc samar tagok jalan: “Oh huac oh lac kayua drei iek lap bo kayua tuk taom gaok dom bác sĩ rilo ye drei mboh khang hatai, jia tame. Ka dua lac mboh dom urang lin, dom dân quan tự vệ daok la di kreih jalan, rup bak ia hauk di kreih langik pandiak, ba dom thung pandap praong, ye dahlak sahneng nan lac bruk drei njauk ngak, meyah drei oh ngak, oh njauk lac sa urang ngak báo”.

Oh huac kan kandah saong nguy hiểm, dom urang ngak báo hu mbaok gam gam di dom sang iek ruak Covid-19, dom labik paatah di gauk piah brei thau dom kham merat, glaih glar di dom y bác sỹ saong bruk pachreih tui di bhap bini dalam pacang caga jit ruak.

Nhà báo Trung Tính, ngak bruk di Báo Thanh Niên khan lac: meng akaok bilan jit tamuh tabiak tal urak ini, sa-ai hu yaok ratuh kadha vak ka dom bác sĩ, urang y tế hu mbaok luac tuvak Tết; ngak bruk pacang caga, duah thau yaok ca dịch tễ piah cakak klaoh jalan njom mbak dalam bhap bini. Saong piah khik caga prein yava ka drei, ka gauk gar, yaok mbang nao ngak bruk, sa-ai haong dom ayut jeng ngak catang tui dom bruk ka pacang caga jit: “Urang vak gah Covid biak huac njom mbak, kayua lac meyah njaom mbak ye brei padeih bruk ngak di jabat, di baoh sang saong gam dom labik drei nao tapa, nan ye tuk nao tame bikik ruak di urang njaom Covid-19 thei jeng sahneng kuhria, kayua lac tuk yam takai tame ye mai sang eng drei njauk daok paatah, meyah oh ngak yau nan, nyu biak mbuan njaom mbak”.

Meng bruk jit ruak Covid-19 hu pasang iek siam, oh ka hu urang halei metai, urang ruak hu taong abih ruak biak rilo, Việt Nam daok lac labik hadah di dunya ka bruk pacang caga jit Covid-19. Bruk njauk uan tabuan nan, hu meng kham merat di abih menuac dalam taneh ia, dalam nan hu bruk rik daong praong di báo chí gah pathau khan. Bruk ba akaok nao dahlau di dom urang ngak báo dalam bilan jit brei mboh lac: yaom lac tuk mesruh metak atau tuk sron mbon, bruk ngak bhian randap atau bruk oh sahneng mboh dahlau, dom urang ngak báo tuk halei jeng daok di gah anak saong halan hatian buh prein yava ka bruk ngak./.

Urang lang: Mousa Phương – 21/06/2020