Rilo janih vaccine hu ba tame VN 

Brei panuac tamat var tangin sua Akok mentri LĐTB saong XH Đào Ngọc Dung, Akok QH Vương Đình Huệ caong khin Rajaei, tapak lac Mentri LĐTB saong XH pambuak saong MT negar Viet Nam, Ban raya HCM saong dom tỉnh gah Meraong peih bruk pahadar urang jakar saong urang lin, bhap bini metai kayua jit ruak praong Covid-19. Akok QH jeng hu panuac lac, kayua rilo makna karei di gauk, 1 trieu 300 ribau bhap bini tabiak truh  Ban raya HCM saong dom tỉnh praong gah kinh tế di bhum Meraong negar piah nao palei. QH hu panuac caong Rajaei, dom urang dalam rajaei ngak brei cambiac laic makna, hu jalan pasiam, patagok darak urang ngak dalam negar.

Dom urang njauk COVID-19 dalam taneh ia daok tagok, adit meng harei 4 tal harei 10/11 lac 53.272 urang, glaong jang rilo duk haong adit meng harei 28/10 tal harei 3/11 lac hu 37.964 urang njaom ruak. Di dom sang iek ruak, rilo urang ruak hu klauk blaoh vaccine mbang 1, mbang 2. Tui yaok pataom, urang klauk 1 mbang kuhria meng harei klauk tal tuk njauk ruak oh ka ginup 14 harei, urang taha, urang hu ruak dalam rup meng ruak trak. Urang ruak ranaih umo thun jeng hu menuac ruak trak kayua suai hu taong ruak. Mintri Y tế hu panuac kakei dom tỉnh, ban, samar brei daok pa-atah di gauk saong pacang veik sit di abih, dut iek samar jang tukvak njaom mbak di jit, kham merat taong ruak meng aval piah trun bruk ruak trak jang saong trun takik menuac metai.

Di Ban raya HCM, meng biar harei 10/11, angaok blah bản đồ Covid-19 tok daok ta-eng  huyện Cần Giờ daok di pakat  3,  lac bhum mbuan njom ruak glong. Dom harei tapa, urang njom ruak Covid-19 di Ban raya HCM tagok gam gam. Meyah harei kadua hadei di harei pacadu bruk pa-atah gauk hu 682 urang dalam 24 tuk ye 4 harei hadei di nan, meng harei 3 tal 6/11 yaok harei hu jaik 1.000 urang njaom. Harei 10/11 hu tal 1.414 urang, kuhria abih tih urang njaom dalam mbang jit ruak ka 4 tagok tal 442.630. Urang metai kayua Covid-19 di Ban raya HCM jeng daok tagok veik hasit.

Meng akaok bilan 11 tal ini, jit ruak COVID-19 di tỉnh An Giang daok tamuh khang, dom menuac njaom ruak tagok rilo saong oh ka mboh trun. Tal urak ini, tỉnh hu labaih 4.000 urang COVID-19, dalam nan hu labaih 30% hu duah mboh dalam bhap bini. UB bhap bini tỉnh An Giang brei patagok tanut jit meng pakat 2 tagok pakat 3, samar jhul khang bruk klauk vaccine, pathau khan brei ngak catang tui 5 paka di Mintri Y tế, gam haong nan brei patagok bruk ngak di dom kapul eng drei pacang caga jit.

Harei 11/11, Jabat Cảnh sát pacang khuah padam khuah saong daong duah urang gaok bala Công an tỉnh Bình Phước brei thau: dom D.N saong bhap bini khan lac tukvak jaik ini dalam tỉnh hu dom urang mek angan lac urang jakar cong an, iew phone ka dom jabat, D.N saong bhap bini iew tut angan tame pasram bruk pacang khuah padam khuah saong iew blei tapuk, harak tài liệu ngan saong yaom jien meng 450.000 tal 3 trieu 500 ribau đồng sa bộ. Dom urang nan payua tapuk, harak tài liệu  tapa gah pajeng ba ka klauk  tui jalan “ship COD".  Cong an tỉnh Bình Phước  brei thau, ini lac bruk mek angan piah blah jien.

Taliban brei thau, hu cap mek takik di abih 600 menuac di kol IS-K palai pajoa saong pametai menuac dalam 3 bilan tapa, nan lac dom urang pan akaok. Meng tuk Taliban tagok pan karja di Afghanistan, IS-K peih rilo mbang khủng bố, dalam nan hu bruk taong tame sa sang iek ruak di ban ine Kabul ngak brei  25 urang metai, labaih 50 urang njauk rambus. 6 thun dahlau, dom menuac lac urang Pakistan oh njauk gauk haong Taliban, ba gauk padang tabiak IS-K,  lac sa dalam rilo dhar di IS hadei di tuk kol phiến quân ini brok tagok di gah brak  Iraq thun 2014, saong hu prein pambak praong tabiak.

Jabat pacang caga Covid-19 di Nga brei thau lac hu 1.211 urang metai dalam 24 tuk tapa. Ini lac urang metai yaok harei glong abih di Nga kuhria meng tuk jit tamuh tabiak. Negar ini kuhria rah tapa hu labaih 40.000 urang njom ruak saong labaih 1.100  urang metai yaok harei  meng puac bilan 10. Bruk tagok rilo urang njom rual saong metai di Nga rah tabiak dalam tuk klauk jru daok takik. Oh ka tal 40% kuhria dalam jaik 146 trieu bhap bini Nga hu klauk jru pacang Covid-19 ginup mbiah tal ini.

Trung Quốc brei thau dom pok pandap payua tui Bưu điện mbuan hu nCoV dalam harei pataom blei pandap di tuk uan harei Lễ Độc thân 11/11, hadei di tuk 3 urang ngak  njauk COVID-19. Urang jakar daok dut iek dom pok pandap saong duah dom menuac gaok tal pandap nan. Jaik 300 pok pandap hu dut iek,  taong abih jeng mboh lac âm tính. Trung Quốc urak ini hu labaih 98.000 urang njaom saong labaih 4.600 urang metai kayua COVID-19. Trung Quốc jeng daok kham merat tui jalan "oh hu COVID" meng bruk pacang veik, dut iek saong duah catang tuk hu menuac njaom./.

Urang lang: Mousaphuong -Ái Nghiêm -11/11