Alin brei khẩu trang, ia rao tangin ka dom urang peih radieh 

Saai Nguyễn Đức Tuấn, thun ni umo langiu 40 thun, sang daok di Sơn La,  peih radieh kua hu jaik pluh thun di Hà Nội brei thau: Bruk ni glaih glar lô, njauk pandiak njauk hajan, piah duah hu tuai hu tuk njauk meriak gauk, hu tuk njauk urang meblah mek tuai, tuk halei jeng mbuan gaok kan kadha, njauk mablah mek drap ar di kreh jalan... Dahlau daih, tuk ka oh hu jit ruak jeng duah hu 6-7 triệu đồng sa bilan. Dom bilan ni mai, jien mek tame daok 1-2 triệu đồng diuk tapa harei. Saai Tuấn brei thau: “Meng tuk pakauk khang bruk rahra takik nao mai ye bruk peih radaih gaok biak rilo kan kandah. Min kayua duah jien piah mbang huak jeng daok peih, yau harei ni bahrau duah hu dom pluh ribau”.

Urang peih radieh kua oh cang tapa pato pakai, tok thau peih radieh saong thau cambaih jalan lac ngak hu, rilo menuac hu bruk ngak tani tanat min jeng daok tabiak peih radieh kua duah jien tuk daok saoh. Dalam bilan jit COVID-19, urang peih radieh kua tuk halei jeng lac manuac mbuan njom mbak jit. Saai Nguyễn Văn Hải, daok di Thái Bình peih radieh kua tal 6 thun di Hà Nội, brei thau: mblang radieh, sang bac padieh, radieh kua tok daok vil val dom sang iek ruak piah rok tuai. Thau lac oh siam, mbuan njom ruak min jeng daok nao ngak, duah jien hu du halei thau du nan. “Meng tuk hu jit saong hu adat oh brei taom gaok gauk nan ye takik tuai, kan kandah dak kan kandah. Min kayua raidiuk jeng daok nao peih,brei cuk khẩu trang, kayua anek di drei jeng daok nao ngak”.

Urak ni ka oh yaok pataom hu hadom urang peih radieh kua. Bahrau ini, hu  radieh kua công nghệ hu brei thau dahlau yaom jien, jalan kuhria jien, yau ye Grap, Be.. Janih radieh kua ni meda kuhria hu hadom urang ngak bruk, min jeng ka oh ginap abih. Piah patrun patakik bruk njom mbak saong tamuh tabiak jit viêm phổi kayua virus corona, dom hãng radieh kua công nghệ hu pachrieh dom urang peih radaih di drei ngak njauk dom bruk pacang caga jit, alin brei khẩu trang, ia rao tangin ka dom urang peih radieh di dom ban praong. Tal vaktu ni, dalam tuk negar drei daok tui bruk brei daok atah di gauk, takik taom gaok gauk, dom hãng radieh kua công nghệ brei padieh nduac, min daok dom urang kan kandah jeng daok peih radaih piah duah jien mbang cai. Saai Nguyễn Mạnh Hùng, daok di Nam Định lac urang peih radieh kua brei thau: daok di palei ngak mbang biak kan kandah nan ye tabiak Hà Nội peih radieh kua, bilan jit ni hu po sang drei pah trun jien pah sang.

Ngan haong dom bruk ngak mbang gaok kan kandah, hu kanja daong ye bruk yaok pataom dom urang hu mbang jien daong nan oh gaok kan kandah hagait kayua hu angan dalam harak di dom jabat, kapul nyaom. Yau bruk di jaik 12 ribau urang pablei vé số dạo di ban raya Hồ Chí Minh jeng hu harak pambuak bruk haong công ty xổ số. Daok dom urang peih radieh kua, tui ong Lê Như Tiến, urang Quốc hội mbang 12-13, dahlau daih ngak Phó akaok Ủy ban ilamo saong pato magru dam dara uranaih di Quốc hội: ni lac dom urang kan kandah dalam rahra, bruk ngak meng ta-eng drei, mbuan njauk njom mbak dalam mbang jit COVID-19, yau nan ye njauk hu daong di kanja: “Khol drei meda thau hu dom urang halei peih radieh kua tapa tổ dân phố, công an khu vực piah yaok pataom, daong ka njauk manuac, njauk urang”.

Meng dalikan di bruk peih radieh kua brei mboh njauk hu dom jalan ngak piah khik ramik, jang yau dom sarak daong ka dom urang ini dalam jit praong COVID 19./.

(Urang lang: Thu Thảo – 20/04)