Dom uranaih ung thư hu jeng ayut sahabat di urang halar hatian

Atah di ini labaih 7 thun, urang likei Nguyễn Thế Trung tuk nan daok lac sa  sinh viên-hu pang dalikan urang halar hatian di tal pato akhar ka dom uranaih ruak ung thư, dalam nan hu dom urang njauk ruak kan kandah nan ye sa-ai tut angan tame. Thun nan, mbang akaok meti, dalam harei menek di drei, Trung caik tukvak nao tal Sang iek ruak Ung bướu TPHCM piah ma-in bui sambai, pato akhar ka dom uranaih ruak.

Tuk mong mboh dom uranaih ruak pandik harao, biến chứng ưng thư yau barah tanyi, barah mbaok, oh hu tangin takai, urang likei umo 19 thun tuk nan mboh biak huac. Yau nan min, Trung jeng kham merat ba drei tame gam haong dom urang halar hatian di labik ini. Blaoh meng nan kak kajap haong tal bac akhar. Tal harei ini, tuk lac sa urang khik iek ka hãng thời trang di negar langiu, Trung jeng daok nao tagok tal bac dalam biar harei suk atau harei car saong hu mbaok dalam dom harei nyaom, dom danak dak ka uranaih ung thư.

Trung brei thau, hadei di rilo thun kak kajap haong dom uranaih ruak, sa-ai hu rah tapa dom pandik harao yau lahik nao urang tung pruac di drei. Yau bruk urang ruak angan Chi, 13 thun – sa dalam rilo uranaih bo Trung biak anit ranam. Dalam 3 thun di tal bac, mong mboh bruk adei iek ruak, meng mbuk atah tal buac abih. Tuk pang mahit adei njauk hôn mê dalam,  blaoh metai nao, Trung sốc trak. Yau nan min, sa-ai oh luai klaak bo daok pabak chreih chrai ka dom uranaih ruak daok veik: Ngan haong drei meda duah hu rilo jien, min oh blei hu haniem phul. Nan ye tuk brei nao sa kadha hagait nan bo taduan mek veik hu bui sambai, bruk lạc quan chreih chai di dom adei. Drei mboh dom kamuan bui sambai jang, haniem phul jang. Tuk drei taom gaok dom adei ye mboh dom adei thei jeng bui sambai, iew angan drei, bhian hu dom adei tangi, rivang. Drei mboh hu pambuak pagam jang haong dom adei, dom adei anit ranam drei jang.

Daok ngan haong Lý Sen Tâm, 26 thun, daok di quận 8 TPHCM, tuk daok tui bac 2 sang bac đại học, thau tal danak dak Hoa hướng dương – hatai caong khin di  Thúy di Sang iek ruak Ung bướu TPHCM, oh saneng kuhria rilo, Tâm caik tabiak biar harei suk saong harei car piah hu mbaok tame tal ngak urang halar hatian brei ka dom adei sit, daong ka anai Đinh Thị Kim Phấn – urang padang tabiak tal bac akhar huroh ka uranaih ung thư.

Hadei di 3 thun kak kajap, bui sambai haong dom adei, sang di Tâm hu rilo cuang kandah tavak tave, daok anai njauk nao tabiak negar langiu piah ngak bruk. Yau nan min 1 thun hadei mai veik, Tâm nao duah tal sang iek ruak Ung bướu piah likau pato akhar huroh ka uranaih ung thư; iek gah hậu cần ka dom danak dak daoh tamia duh ka dom uranaih ruak.

Tâm brei thau, drei lac urang kamei takik sahneng kuhria hagait, takik mboh thau hagait. Yau nan min, tuk taom gaok uranaih njauk ung thư, hatai saneng di Tâm hu salih karei. Jalan di anai gru saong dom urang halar hatian ngak ka dom adei bui sambai ngak ka Tâm mboh rai diuk ini biak hu yaom. Tal urak ini, amaik ame di anai hu nao tapa taneh aia langiu min Tâm jeng daok veik pak ini piah ba  hatai ranam ka dom adei. Dom duk brei ka uranaih ruak di sang iek ruak Ung bướu hu jeng bhian randap, dom uranaih pak ini hu mong yau adei sa-ai gauk gar di Tâm. Tâm khan lac: Dom adei nan lac dom kareih camin, hu dom kan kandah dalam bruk ngak, dalam rai diuk mboh biak glaih glar, sa-ai caong khin klah abih ye mong mboh hu dom kareih camin nan lac dom adei ka bruk oh luai klak.. Hu dom adei tame jru biak pandik min jeng bui sambai yaok harei.

Karei jang dua ayut hu ndom di angaok nan, hatai caong khin akaok mereip di anai gru Nguyễn Thị Kiều Duyên, umo 25 thun daok di quận Tân Bình TPHCM mai haong tal bac akhar brei ka uranaih ruak ung thư nan lac piah pathram kỹ năng sư phạm, hu sa labik piah pasram bruk pato bac di drei tuk daok lac sinh viên. Min dom adei akaok kalu, tangin truyền dịch diuk rai dalam pandik pandua gam lac rai rah anaik saih akaok mereip di Duyên, hu jeng dom adei anit ranam di Duyên meng tuk halei jeng oh thau. Urak ini, oh lac dom van bac tani tanat dalam sang iek ruak meng taom gaok hu dom adei, bo daok mboh dalam dom harei nao pato di dom pasak luyện thi, tuk nao tapa sang iek ruak nan, lac Duyên  vaih tame rivang dom adei piah pachreih ba, ndom klao haong dom adei blaoh meng mai sang.

Tui Duyên, dom uranaih ruak pak ini oh karei hagait mbaik dhil anak angin, min dalam meta mboh yau daok caong hu suan yava, caong hu diuk lavik. Meng tuk daok lac sinh viên, tal harei ini hu jeng thạc sĩ Hóa học, hu pato di rilo labik, Duyên jeng anit ranam dom anek saih dalam tal bac akhar ka uranaih ruak ung thư. Anai tuk halei jeng duah jalan ba bui sambai mai ka dom adei. Mong mboh dom adei bui klao, hatai Duyên pandik yau thei cakak, kayua Duyên huac njauk atah dom adei, kayua anai njauk sa anek saih oh taduan mek khan ao bahrau dalam harei khai giảng kayua thau drei oh daok diuk hu dom harei tra. Anai Duyên khan veik: Tuk nan dahlak caong khin padeih paje, caong khin klak abih oh tame tal bac tra min anai Phấn saong dom ayut halar hatian ndom lac tuk drei yam takai tame ini bloh oh njauk taduan lah. Bo drei njauk lac labik pambak tame ka dom adei karei tra, oh njauk lac kayua drei pandik harao bo drei klak bruk ngak ini.

Dom harei ini, oh njauk lac tok hu Trung, Tâm atau Duyên bo daok hu labaih  20 urang halar hatian di sang iek ruak Ung bướu daok abih drei nduac danak dak ka harei  pataom bingu hướng dương ka uranaih ung thư. Dom ayut ranaih ini daok peih prong hatai drei tabiak, gam klah rabha, gam brei nao dom kadha siam gheih piah taduan mek veik dom bui sambai dalam hatai, haniem phun dalam rai diuk. Dom urang ini hadah tanjak yau janih bingu tuk halei jeng pasang mbaok nao gah aia harei, truac hadah hatai caong khin ka dom adei sit njauk ruak ung thư./.

Urang lang: Jasi-14/12