Di umo 70 thun, ong Trần Chiến, thương binh pakat 4/4, daok di phường Nhân Chính, quận Thanh Xuân jeng mek bruk ngak, daong ka dom urang jaoh jo ngak kadha bui sambai. Thun 2014, ong Chiến hu pok ngak akaok Kapul urang jaoh jo phường. Meng abih hatai ka bruk ngak, ong hu jak ba kapul nyaom, bhap bani, dom urang ngak pah hala rik daong kadung jien di hội, daong dom hội viên kan kandah, taih klaak mặc cảm, tự ti yam tagok dalam rai diuk. Dom bruk ngak di ong hu Kapul urang dahlau daih ngak bol lin quận Thanh Xuân pok meyaom lac kareih camin “Urang siam bruk siam”, urang dahlau diah ngak bol lin ba akaok nao dahlau. Ong Chiến tuk halei jeng saneng lac, ong hu mai veik hadei di mesruh metak nan lac haniem phol biak prong nan ye daong hu ka ralo menuac, abih di nyu nan lac dom urang jaoh jo, urang njauk jru mek kalik kruac hu mbang tui sarak di Karja lac bruk njauk ngak saong meda ngak tal tuk oh daok ngak hu tra: “Urak ini dom urang jaoh jo trak saong biak trak di phường khaol dahlak jeng hu daong anih, daong brei jien, daong blei BHYT, patrun dom kan kandah ka dom baoh sang hu urang jaoh jo. Bruk ngak di dahlak mai meng hatai di drei lac sa urang thương binh,  yau panuac Wa pato lac “thương binh jaoh jo me-in oh klaak sraoh”. Dahlak jeng ngak tui amaik dahlak hu mbaok tame bruk xã hội, ngak dom bruk pahla ka dom urang hu rai diuk kan kandah, urang jaoh jo. Dahlak ngak dom bruk ini meng hatai oh njauk lac piah caong hu pok meyaom hagait”. 

Piah hu jeng dom thương binh “jaoh jo min oh klaak saoh”, yaok thương binh jeng kham merat  ba abih pren yava di drei brei ka taneh aia. Ong Nguyễn Gia Vừa, thương binh trak hạng 3/4 di phường Trung Hòa, quận Cầu Giấy bhian hu mbaok tame dalam mbang mesruh metak peih paha gah meraong saong ngak nghĩa vụ dunya di Cam-pu-chia. Thun 2012, ong bahrau hu pok ngak Akaok Kapul urang dahlau diah ngak bol lin phường. Dalam ralo thun, ong hu panuac iew daong hội viên cakrok patagok  kinh tế, grap tanat rai diuk tapa bruk mesre phun jien labaih 3 tỷ đồng saong dom bruk ngak karei. Ong jeng bhian hu mbaok tame dom van pathau khan, pato pakai ilamu cách mạng ka rai rah dam dara. Jeng yau dom thương binh karei daok rik daong pren yava di drei ka xã hội saong bruk cakrok patagok di taneh aia, ong Nguyễn Gia Vừa caong khin: “Dahlak saneng lac tuk daok hu pren yava ye ngak habar rik daong sit pren yava sit sot di drei piah dak padang puk palei meng bruk dak padang kapul urang dahlau diah ngak bol lin biak khang kajap. Dahlak daok hu mbaok tame ndua naong bruk di puk palei. Rik daong di drei jeng hu kapul mboh min dahlak jeng mboh lac trách nhiệm di drei, ngak habar kham merat jang piah rik daong ka rai diuk di mikva hu siam mekre salamat”.

Hu tuk lac bác sỹ quân y, hu mbaok tame mbang mesruh pacang  Mỹ daong taneh aia, hu daong ka ralo đồng đội di mblang mesruh miền Trung, Tây nguyên…hadei di tuk padeih hưu, ong Nguyễn Mạnh Hùng, ndih tapui thun 1950, thương binh hạng 3/4 di phường Liễu Giai, quận Ba Đình, Hà Nội padang Công ty Cổ phần thương mại dược phẩm Tây Hồ, ba bruk ngak ka ralo thương bệnh binh saong anek bhik di dom urang nan. Yaok thun, ong jeng hu dom mbang nao ngak pahhala,daong jru iek ruak ka bhap bani bhum ceik, bhum atah bayah saong bhap bani di puk palei  labik ong daok. Ong Nguyễn Mạnh Hùng khan lac, tuk halei jeng mboh drut drui dalam hatai ka dom ayut sahabat oh ka duah mboh kabo saong dom urang nhập ngũ kayua lahik harak gar nan ye oh ka hu công nhận lac thương, bệnh binh. Ong caong khin, gauk gar dom baoh sang liệt sỹ, hu công haong cách mạng hu rai diuk siam jang: dahlak oh pok panuac likau ka thương binh, kayua lingiu dom thương binh trak ye dom thương binh hạng 3/4 atau 4/4 yau khaol dahlak jeng daok ginup pren yava, jeng daok ngak bruk hu. Ngan haong dom baoh sang liệt sỹ, meyah ngak hu, karja njauk daong rilo jang ka dom baoh sang liệt sỹ gah kinh tế”

Meng dom bruk ngak cambaih laih, biak biai, yaok pluh ribau kareih camin thương binh di grauk labik dalam taneh aia daok ngak tui panuac pato di Wa Hồ lac “Thương binh jaoj jo min oh klaak saoh”. Bruk tari tareng ngak mbang, kham merat yam tapa ruak kik saong dom kan kandah dalam rai diuk, oh pagam pambak tame bruk daong di Đảng, Karja..., hu daong ngak ka dom urang ini siam jang dalam meta manuac urang dalam sang jang yau bol bhap rahra./.