Piah daong ka urang ruak kan kathaot, baoh sang kan kandah, uranaih metui medhar, hu van huak trei, tukvak jaik di ini, ralo jabat, menuac urang di tỉnh Tiền Giang hu peih tabiak saong daok khik ramik ghing mbang pahla, quán mbang yaom lap, brei mboh hatung hatai anit ranam gauk.

Di tukvak 10 tuk meteh yaok harei, baha Tịnh Nghiêm, di ấp Mỹ An, xã Mỹ Phong bal sit Mỹ Tho peih pabah mbang piah raok urang mai mek lisei huak jala pandiak. Ini lac ghing mbang brei saoh ngan haong dom pandap mbang chay biak bingi. Yaom lac oh mek jien, min dom urang ngak pak ini  tuk halei jeng bui sambai, abih hatai. Ong Nguyễn Văn Hai, urang pablei vé số mai huak pak ini brei thau: Dahlak daok pak phường 3, mai pak ini huak 2 thun paje, biak bingi. Harei halei dahlak jeng huak abih. Meng hu lisei ini daong ka urang kathaot huak van jala pandiak, dahlak biak thau dhal phol.

 Ni sư Tịnh Nghiêm, trụ trì baha  Tịnh Nghiêm brei thau, yaok harei hu tal labaih 100 urang mai huak van jala pandiak. Jien tahanek lisei baha jak ba dom phật tử, urang hảo tâm atah jaik rik daong.

Jaik 5 thun tapa, sang ong Trần Văn Tôn, daok pak khu phố 4, phường 9, bal sit Mỹ Tho jeng daok khik van lisei, pacuk atau ngak bánh xèo di sang piah brei thaoh ka mikva dalam dom harei 14, 15,1 bingun, 2 bingun (saka aia bulan). Langiu di nan, sang ong Tôn daok khik bruk ngak  4.500 suất lisei piah ba brei saoh ka dom sang iek ruak, ka darak di bal sit Mỹ Tho.

Pak sang iek ruak Y học cổ truyền saong sang ruak Đa khoa pasak tỉnh Tiền Giang jeng daok khik ghing mbang pahla ka urang ruak saong gauk gar urang mai raong ruak. Ghing mbang ini kayua Kapul ngak pah hala bal Mỹ Tho peih ngak saong daok khik hu labaih 10 thun tapa. Yaok harei, ghing mbang ba brei  ginup abih 300 phần bhu saong 600 phần lisei. Meng nan, dom urang ruak saong gauk gar urang raong ruak sang kan kandah patrun hu jien ndo dalam tukvak ndih iek ruak. Ndom ka bruk ngak bak hatai anit ranam ini, amuk Trần Thị Việt Tuyến, Phaok Akaok Kapul ngak pahla bal Mỹ Tho lac: Drei daok khik ghing mbang pahla ini kayua anak meta  mboh hu ralo urang ruak kan kathaot oh hu jien blei jru, blei pandap mbang. Kadhua nan lac ruak suai lavik, ruak trak, jien takik. Nan ye kapul jeng daok ngak piah daong ka urang ruak saong urang mai raong ruak, piah jien blei jru.

Bahrau ini, dom urang kathaot, urang pablei salih “lưu động” di bal sit Cai Lậy hu van huak jala pandiak bingi min tok abih 5.000 đồng di baoh sang ong Phùng Thanh Lâm, daok pak xã Tân Bình peih ngak. Yaok harei, hu labaih 200 urang kathaot mai ini huak. Dom urang halei kan kandah ralo ye oh mek jien. Ong Lâm brei thau, meyah duh oh mek jien abih mbong ye oh thei daok khin mai huak kayua kanda nan ye tok mek 5.000 đồng tượng trưng piah pabak tame jien blei njam patam. Urak ini quán lisei 5.000 hu 4 urang ngak biak abih hatai duh ka urang mai huak.  Ong  Phùng Thanh Lâm lac: Ghing mbang di drei mboh ralo lac urang pablei vé số, ve chai… hu van huak jala pandiak bingi. Drei mboh 5000 đồng ngak hagait hu, drei daong ka mikva ye mboh bui sambai. Ghing mbang ini tantu khat, min drei kham merat ngak piah daong ka mikva.

Daok hu biak ralo ghing bang pahla karei di dom puk palei dalam tỉnh Tiền Giang daok hu peih ngak, hu menuac sia pok meyaom. Dom kapul nyaom, menuac urang ini oh lac ba mai dom panyin lisei, jaluk bhu bak hatung hatai anit ranam bo daok ngak jeng hatai jia daong ka urang kathaot, urang kan kandah hu pren khang yam tagok dalam rai diuk./.