Tuk jit Covid-19 rah tabiak ye Đồng Nai jeng pasak di dua sruh jit di Ban raya HCM saong Bình Thuận. Dom urang ruak di Bình Thuận nao tapa tỉnh, hu taom gaok bhap bini di tỉnh, saong hu urang ruak ka 247 njom ruak meng urang ruak ka 124 di Ban raya HCM. Urang ini, hu taom gaok jaik, ngak bruk saong rilo urang dalam công ty di sa khu công nghiệp pak huyện Vĩnh Cửu, nan ye mbuan pambak tabiak bhap bini biak ralo. Kayua yau nan, piah pacang jit ruak Covid-19, gah y tế Đồng Nai hu ieu pataom abih dom urang urang ngak bruk gah y tế  dự phòng meng pakat tỉnh trun tal puk palei, dalam nan Pasak pasang iek ruak kik tỉnh lac pasak dang bruk, piah ngak gam 2 bruk nan lac: Oh luai ka ruak pambak tabiak bhap bani meng tuk oh ka hu urang ruak saong pacang jit njom mbak tuk hu manuac njom ruak. Tỉnh hu ba tame khik iek 4.000 urang meng dom sang iek ruak tal dom pasak brei daok karei, daok karei di sang, pamaong tal bruk praong abih lac pacang hu jit ruak.  

Meng tuk camereip, Pasak pasang iek ruak kik tỉnh Đồng Nai hu daong bruk ka Mban tacei jalan pacang jit Covid-19 di tỉnh thau lac urang ruak 247 di Vĩnh Cửu lac sruh jit ruak njauk pataom tame pacang, plaih iek lap. Taong abih 100 urang di Pasak pasang iek ruak kik tỉnh Đồng Nai hu pataom mai, dalam nan, Khoa Pacang caga ruak njom mbak lac pasak, hu parabha jeng 3 kapol ngak bruk samar, yaok kapol 7 urang salih gauk hu mbaok luac harei melam.

Pasak pasang iek ruak kik tỉnh brei duah thau ruak dahlau ka 27 urang hu taom gaok jaik urang ruak 124, meng nan duah mboh urang ruak ka 247 tuk jaik abih tukvak brei daok karei, tapa dut iek mboh âm tính mbang camereip, min tal harei ka 13 dut iek mboh dương tính gilac veik. Meng akaok bilan 4, Pasak pasang iek ruak kik tỉnh Đồng Nai peih bruk dut iek ka rilo menuac piah mboh aval dom urang njom virus SARS-CoV-2, pacang cakak virus  pambak tabiak bhap bini.

Bác sĩ Bạch Thái Bình, Pasak pasang iek ruak kik tỉnh Đồng Nai khan lac: “Adei sa-ai kapol ngak bruk drah samar biak glaih glar, hu tuk melam brei ba gauk tame mblang kapal haok Tân Sơn Nhất raok urang daok negar langiu mai piah ba chip tame labik brei daok karei, oh lac tukvak halei”. TS-BS Phan Huy Anh Vũ, Yam ndoc Sở Y tế Đồng Nai ndom lac: “Ilamu ieu pataom dom urang y tế dự phòng pacang caga Covid-19 hu ba tame pandar, patagok dalam bruk pacang caga ruak kik di Đồng Nai dalam tukvak anak tal. Nan lac brei patui veik, pakajap bruk ngak tui 3 pakat yau urak ini, dalam nan hu Pasak pasang iek ruak kik tỉnh Đồng Nai, dom pasak y tế huyện saong dom balai y tế  xã. Gah y tế khik bruk brei manuac, radaih ka nyu lagaih, samar daong gah chuyên môn; saong karja, MTTQ, dom kapol nyaom saong bhap bini daong gah manuac, pandap pandar, ngak jeng prein khang di taong abih hệ thống chính trị lac jalan ba tal pacang hu dom janih jit ruak”.

  Bác sĩ Bình daok brei thau lac: “Dahlau diah tuk oh ka hu Pasak pasang iek ruak kik ye rilo gah ngak, urak ini pataom tame sa labik nan ye daong pasak mbuan ngak bruk, ieu pataom hu ba abih urang tame, pandap panda tame ka bruk pacang jit ruak. Meyah dom jit ruak karei, dalam nan hu jit pandiak tabiak darah  pataom hu 30% urang tame yau bruk pacang caga jit Covid-19 ini, ye rilo jit ruak karei meda pacang hu siam jang”.

  Yau nan min, bruk ngak di Pasak pasang iek ruak kik tỉnh jeng daok kurang, brei hu bruk sangka dakam tukvak anak tal.  Nan lac, Pasak pasang iek ruak kik tỉnh Đồng Nai yaom lac hu labaih 60 bác sĩ ngan saong 50% hu bac blaoh hadei đại học, min jeng daok kurang dom urang ilamu tui dom kapol ruak njom mbak, oh njom mbak, dinh dưỡng, pathau khan ka prein yawa. Đồng Nai lac tỉnh hu rilo manuac dang dhi 4 dalam negar,  brei hu buh jien tame ngak sa hệ thống Labo dut iek khang meng mac dut iek sinh học phân tử (Real-time PCR) piah dut iek hu dom hagait pambuak tal ruak kayua bruk ngak, ruak lavang lavaih bo oh cang tal Ban raya HCM./.

Urang lang: A.Nghiêm - 18/5/2020