Dalam tuk tabung glaong yaom pabui trun khang, trại pabui 1.000 drei di ong Trần Đức Vinh Quang daok di xã Gia Kiệm, huyện Thống Nhất jeng daok pablei tabiak yaok bilan labaih 20 tấn pabui hơi, khat lahik jaik 150 triệu đồng yaok bilan. Urak ini, yaom yaok kg pabui hơi hu tagok 38.000 đồng, min jeng oh ka samu yaom raong lac 40.000 đồng sa kg. Ong Quang khang hatai oh patrun patakik tapol pabui, kayua lac meyah patrun patakik tapol pabui ye 2 tỉ đồng jien padang xưởng, blei jamriak bo ong buh jien tame njauk klak tasaoh. Salih tame nan, ong Quang daok duah jalan patrun yaom phun:  

 “Trun yaom phun hu ralo jalan ngak lo. Yau dahlau daih ilamu drei biar, pabui binai yaok thun nyu  menek hu 20 drei min. Anak tal dahlak kham merat patagok meng 23 tal 25 drei sa thun. Tui iek biak kajap, salih barau jalan raong glang. Duah abih jalan ngak brei paglaong năng suất tapol pabui, patrun yaom phun raong glang”.

Jalan ngak di ong Quang hu takik urang raong pabui di Đồng Nai palih ruah. Anak meta mboh lac, ralo urang nông palih ruah jalan patrun patakik tapol saong iek nan lac jalan ngak samar abih piah patrun nguồn cung, ngak brei darak pasar patagok yaom veik.

Tui Hiệp hội raong glang Đồng Nai, yaom pabui trun ralo mbang ini lac kayua pabui hu ralo min urang blei takik. Thun 2014, Đồng Nai khik tapol pabui jaik 1,5 triệu drei. Tuk nan yaom pabui pablei tapa TQ glaong biak glaong, hu tuk tagok tal jaik 60.000 đồng sa kg pabui hơi. Hu yaom, urang raong ralo patagok tapol pabui tal 300.000 drei. Min nan tok di lac con số thống kê. Ralo urang medil lac biak di nyu tapol pabui di Đồng Nai meda hu ralo jang. Kayua dom thun jaik di ini, dom tập đoàn, doanh nghiệp jeng hu peih praong bruk raong glang. 

Pabui ralo di Đồng Nai ralo meng pablei ka 2 darak pasar praong lac ban raya HCM saong TQ. Eng pablei tapa TQ, yaom lac tui jalan tiểu ngạch, min meblah jaik 40% dom pabui di tỉnh, ngak brei yaom pabui mbuan tác động kayua darak pasar ini. Taphia di nan, darak pasar TQ takre janih pabui trak meng 120kg sa drei tagok. Meyah pabui hu yaom ye raong piah pablei tapa TQ biak hu laba, min meyah darak pasar ini biến động, padeih blei tame atau nguồn cung tapa cầu ye pabui njauk tồn veik kayua dalam taneh ia oh takre. Tuk yaom pabui biar di abih, meyah pablei nduac ye khat trak, daok caik mepaih cang hu yaom ye oh lagaih, kayua pabui dak praong ye phun jien khik tapol jeng praong tui.      

Yaom lac darak pasar TQ lac biak praong,  min ong Trần Văn Quang, Chi cục Trưởng Chi cục raong glang saong Thú y (Sở ngak nông saong patagok palei pala Đồng Nai) ndom lac: jalan ngak suai lavik di gah raong glang lac brei thau cambaih hu darak pasar, patrun hu yaom phun, padang dom chuỗi liên kết, patagok gah chế biến, oh njauk lac raong saong pablei yau urak ini. Ong Trần Văn Quang lac:   

 “Brei ramik veik sản suất, brei pambuak bruk veik ngak jeng dom doanh nghiệp ginup phun jien, ginup pren piah hu mbaok điều tiết chi phối darak pasar. Anak meta mboh lac di Đồng Nai dom doanh nghiệp ngak khép kín, ngak tui chuỗi, padang bruk ngak mbang siam, cakak trun phun jien, pagalong năng suất raong glang ye jeng daok tồn tại hu”.

Ngak yau habar piah pasang iek nguồn cung, thau hu bruk darak pasar saong urang nông brei ngak hagait piah  samu haong dom tập đoàn praong daok hu mbuan lagaih dalam bruk  raong glang, lac dom kadha praong bo urang raong pabui, gah raong glang daok njauk pasang mbaok./.