Sa dalam dom kadha praong di bruk salih bahrau hành chính di Đồng Nai nan lac bruk pakatut tukvak saong dom mbang mai jabat Karja ngak harak gar. Tapa Pasak Hành chính công di tỉnh hu padang tagok meng bilan 5/2017, bhap bani meda hu langyah jaik abih harak gar hành chính salih ka bruk njauk nao tal yaok sở, ngành yau dahlau diah. Urak ini Pasak ini daok taduan mek saong bayar  kết quả langyah 1.213 harak gar hành chính ka menuac urang, kapul nyaom tui jalan sa pabah mbang, sa pabah mbang liên thông bahrau.

Kadha ini hu daong biak ralo ka bhap bani tuk nao ngak harak gar yau chứng minh nhân dân, hộ khẩu, harak sang danaok, taneh riya… Ong Nguyễn Văn Hiệp (daok di xã Phước Tân, TP. Biên Hòa, tỉnh Đồng Nai) brei thau meng dahlau mai ong bhian cang suai lavik, gaok mai meblah gauk biak glaih glar meng tal drei. Min urak ini mai ini ngak harak di Pasak Hành chính công, hadei di tuk hu tacei mek số thứ tự, nao tal quầy ngak thủ tục saong nộp hồ sơ, tok dalam 20 minit hadei ye ong mek hu ba-ar pagul bayar kết quả: "Mboh di Pasak Hành chính công ini ye an ninh, hacih sa-at, hu manuac urang pato tacei drei, tuk drei oh thau ye drei sua tangi blaoh hu tacei pato cambaih laih. Karja hu khu hành chính sa pabah mbang yau ini daong ka mikva abih takik  tukvak nao mai, mbon laghaih jang. Mboh njauk hatai ralo".     

Oh lac tok hu bhap bani bo ralo doanh nghiệp jeng brei mboh bruk njauk hatai tuk mai ini ngak harak gar hành chính. Ong Trần Đức Toàn, chuyên viên pháp chế Công ty Ajinomoto Việt Nam, di KCN Biên Hòa 1, TP. Biên Hòa, tỉnh Đồng Nai brei thau, meng tuk Pasak Hành chính công peih ngak hu daong ka tukvak ngak harak gar hu katut jang. Dahlau diah, yaok mbang hu công ty brei nao ngak harak langyah bruk ngak, ong Toàn njauk caik tabiak 1 tal 2 adit piah nao mai ralo mbang, ralo labik yau Sở Kế hoạch – Đầu tư, Sở Tài nguyên – Môi trườngv.v… Hadei di tuk nộp hồ sơ blaoh njauk cang dom harei blaoh mai veik, meyah hu suan hagait ye njauk ngak veik bahrau abih.

Meng tuk hu Pasak Hành chính công, ong Toàn tok sa mbang nao tagok nộp hồ sơ, hu tacei pato cambaih laih piah oh suan, mek ba-ar pagul saong klau harei hadei mai mek kết quả: "Dahlau bdaih ngak tui jalan meng kan, nan lac bản ba-ar khang ye sa hồ sơ drei nao trun nao tagok takik abih jeng 5, 6 mbang, meda dui atah 1 atau 2 adit. Daok urak ini drei ngak samar ralo, oh ka tal 1 tuk, dom hồ sơ jeng tok dalam 1 tuk min. Tukvak hu pakatut jang biak ralo".

Oh lac patak pataom hu tukvak saong jien ndo nao mai bo bhap bani tuk  ngak harak gar hành chính di Đồng Nai daok meda nộp hồ sơ tapa mạng Internet atau iew phon tapak tal tổng đài (0251) 1022 piah hu tacei pato. Urak ini kuhria rah tapa yaok bilan, tổng đài ini taduan mek hu labaih 5.000 mbang iew phon, jaik abih đề nghị hu ngak di sang.

Langiu di nan, bhap bani Đồng Nai daok hu pandar Zalo piah thau tukvak langyah hồ sơ. Tok quét mã QR angaok ba-ar hẹn, ye mikva hu thau hồ sơ di drei daok langyah tal halei, atau meda “chat” haong urang jakar Pasak Hành chính công piah hu langyah dom caong khin di drei. Tal urak ini Đồng Nai hu labaih 25.000 mbang urang pandar Zalo piah duah thau thông tin ka harak gar hành chính.

Dom kham merat salih bharau hành chính di Đồng Nai hu ba mai siam mekre mboh di anak meta, daong pakatut biak ralo tukvak, jien ndo, palaghaih biak ralo ka bhap bani tuk ngak harak gar hành chính. Ong Trần Công Quyền, Phaok Akaok Pasak Hành chính công tỉnh Đồng Nai biei thau: Bhap bani hu mbuan laghaih jang oh njauk nao mai ralo mbang. Pagap yau mikva salih bằng peih radaih ye tapa nan meda salih gam chứng minh nhân dân, ngak lý lịch tư pháp atau lac hồ sơ taneh riya… Yaok thủ tục hu niêm yết số harei ngak bruk nan ye mikva meda hu mong iek saong ngak dom thủ tục njauk tui bộ thủ tục hành chính.  

Yau nan min, kayua jabat Pasak Hành chính công Đồng Nai daok di bal Biên Hòa nan ye bhap bani di dom huyện atah nao mai biak kan kandah. Kayua yau nan ye tỉnh Đồng Nai daok peih ngak ralo jalan piah duh ka siam jang hatai caong khin di bhap bani. Cambaih laih tỉnh hu padang saong pandar mô hình “Phi địa giới hành chính” ngan haong 63 bruk gah thủ tục hành chính. Bhap bani caong khin ngak harak gar tui thẩm quyền pakat tỉnh tok nộp hồ sơ di pakat xã, huyện meda hu liên thông tagok Pasak Hành chính công.

Hadei di tuk langyah blaoh, kết quả meda hu bayar ka bhap bani tui jalan bưu điện. Meng nan, bhap bani ngak harak gar hành chính meda nộp hồ sơ meng di pakat xã, pakat huyện, pambuak pagam tagok tỉnh saong cagar veik. 

Dalam 5 thun anak tal, jalan ngak di Ðồng Nai nan lac padang dom jabat hành chính karja thông suốt, pamong tal pambuak pagam haong Raja-ei điện tử, bo kadha praong lac pamaong tame gah thuế, hải quan, brei harak adat đầu tư, bảo hiểm xã hội, y tế v.v…

  Bruk salih bahrau hành chính di Đồng Nai 2 thun ini mai hu taong yaom glaong saong hu dang dhi glaong dalam chỉ số cải cách hành chính. Yau nan min, urang pal akaok tỉnh Đồng Nai brei thau meda oh mek labik dang thứ bậc piah chủ quan, oh nduac tui thành tích bo siam di abih nan lac ngak njauk hatai di bhap bani, kapul nyaom saong doanh nghiệp, yam tal peih ngak karja điện tử tui jalan ba tabiak di Raja-ei./.