Bhum pala patei prong abih di Đồng Nai daok di dom xã Thanh Bình, Cây Gáo, huyện Trảng Bom. Oh joa lange yau bilan patei thun dahlau bein patei tasak laik bak gha bo oh hu thei blei, brei ka pabe, limo jeng oh khin mbang, ye thun ini urang nong pala patei biak bui sambai, chreih chai kayua yaom patei tuk halei jeng di tanut glaong, hu tuk jaik 17.000 đồng tal 18.000 đồng/kg ngan haong patei janih sa. Urak ini yaom lac yaom kaom daok trun min jeng daok di tanut jaik 13.000 đồng tal 14.000 đồng/kg. Tui yaom ini, urang nong mek tame hu yaok rituh triệu ka yaok ha taneh pala patei me-mbong cấy mô pablei tabiak negar langiu.

Ong Đặng Phước Cường daok di ấp Trung Tâm, xã Thanh Bình, huyện Trảng Bom thun ini pala labaih sa ha ngan haong jaik 3.000 phun patei me-mbong cấy mô, tui kuhria brei sản lượng jaik 15 tấn. Bein di ong Cường hu paik baoh meng hadei di Tết, urang mai tal bein blei yaom meng 9.000 đồng tal 15.000 đồng/kg tui tukvak, tagok jang jaik 3 mbang dut haong thun dahlau. Karei jang vụ dahlau lahik abih phun jien, thun ini bein patei ba mai ka ong yaok rituh triệu đồng. Ong Cường bui sambai khan lac: Tagok jang jaik 3 mbang. Thun dahlau yaom patei klau ribau lime rituh đồng tal 4 ribau, 5 ribau. Thun ini labaih 13 ribau, glaong jang thun dahlau jaik 3 mbang, yaom glaong jang, kein laba ralo jang. Sa maong patei dua pluh ký yaom jaik dua rituh nam pluh, dua rituh tijuh pluh.

Hu sa vụ patei kein laba yau thun ini, langiu di bruk darak pasar bo ralo meng lac darak pasar Trung Quốc blei ralo, ye daok kayua mikva urang nong thau mong iek tukvak piah trun pajaih ka tal tuk paik baoh. Thun bloh hadei di tuk tết, gam sa tukvak patei paik ralo nan ye ba tal bruk pablei oh abih ngak ka yaom patei trun khang, gaok mai oh pablei hu. Mboh yau nan, vụ patei thun ini urang nong oh daok pala gam sa tukvak bo pala dahlau hadei nan ye yaom lac taneh pala patei rilo jang min oh paik sa tukvak haong gauk nan ye yaom patei jeng daok di tanut glaong saong hu tani tanat.  

Yaom lac yau nan min tui kuhria di dom urang hu ilamu, yaom patei kan khik hu di tanut glaong dalam tukvak suai livik. Kayua lac urak ini dom negar dalam bhum yau Lào, Myanmar, Thái Lan jeng jaik yam tame vụ paik baoh nan ye patei meda hu rilo jang, dalam tuk nan patei di Đồng Nai oh lagaih gah địa lý nan ye meda trun yaom. Ong Nguyễn Đức Quang, Tổ phaok Tổ pambuak bruk pala patei xã Thanh Bình, huyện Trảng Bom brei thau: Patei di bhum klei kieng Myanmar, Lào, Thái Lan dom pluh ribau héc-ta nyu paik baoh blaoh ba tapa Trung Quốc biak jaik, yaom jien pajeng ba jeng biar jang. Dom pluh ribau ha nan lac di urang Trung Quốc ngak nan ye paik baoh dahlau pak nan. Tuk patei hu ralo ye yaom patei dalam 30 harei tal meda laik yaom.

Dalam tuk mikva urang nong pala patei daok bui sambai haong bilan patei thun ini, ye tamuh tabiak dom kadha oh siam nan lac kaoh phun amariak kalu, pala phun patei.

Ong Lầm Mã Phúc, ấp Tân Thành, xã Thanh Bình bahrau brei kaoh klaak 2 ha amariak kalu daok paik baoh. Mblang taneh amariak kalu ini pala hu 6 thun, paik baoh hu 2 thun, min kayua tukvak jaik di ini phun amariak kalu pala oh njauk, yaom trun bia, daok 60.000 đồng/kg, oh ka samu 1/3 dut haong tukvak yaom glaong, kurang labaih  200.000 đồng/kg. Phun amariak kalu pala dom thun meng paik baoh, jien buh tame blei phun pajaih, khak drak, pren mong iek jeng ralo jang dut haong phun patei nan ye puac abih, ong Phúc brei kaoh sa meteh mblang taneh amariak kalu piah pala iek phun patei: Thun ini yaom biar ralo, amariak kalu jeng pala oh njauk. Urak ini drei kaoh nyu piah pala patei, kayua mboh ralo urang pala patei hu yaom nan ye drei kaoh hasit piah pala patei iek yau habar. Hu ngak hu mbang hu khut hu khat.

Bruk ini daok mboh ralo. Ralo urang nong oh daok cang phun amariak kalu hu, anak meta mboh phun patei hu yaom, takik phun jien buh tame nan ye kaoh phun amariak kalu piah pala patei. Urang takik ye kaoh dom sào, urang ralo ye dom pluh ha.

Tapa nan, Kapul urang nong xã Thanh Bình mboh lac vụ hadei dalam xã trun labaih 100 héc-ta amariak kalu, salih tame nan lac mblang taneh pala patei me-mbong cấy mô. Dahlau di nan, mblang taneh pala patei di xã Thanh Bình oh padeih cakrok patagok, urak ini dalam xã hu labaih 400 héc-ta pala patei, dalam nan sa meteh lac patei me-mbong cấy mô. Ong Lưu Chí Mười, Akaok kapul urang nong xã Thanh Bình, huyện Trảng Bom huac lac: Bruk duh hatai di puk palei nan lac yaom amariak kalu. Yaom amariak kalu thun ini trun biak biar. Urak ini hu dom sang daok kaoh phun amariak kalu piah pala patei. Yaom patei yau thun ini biak bui sambai min jeng lac bruk duh hatai di puk palei, huac nyu yau thun bloh,  taneh pala patei biak  ralo min yaom kaom oh tani tanat.

  Patei hu yaom nan lac kadha bui sambai prong abih di urang nong bhum pala patei Trảng Bom thun ini. Min bruk pala yau habar ka nyu laghaih haong bruk di anak meta ye caong hu ralo jang bruk sahneng kuhria di mikva urang nong. Gah chức năng, kajar puk palei jeng njauk khan brei urang nong thau dom kanjah jhak meda rah tabiak meng bruk pala drak tui hatai takre di drei./..