Hadei di mbang yaom pabui trun khang meng thun 2017 dui atah tal 2018, tal urak ini, labik raong glang di ong Nguyễn Văn Hiệp daok di xã Hưng Lộc, huyện Thống Nhất, tỉnh Đồng Nai jeng oh ka pasiam veik hu abih mbong. Labik raong ini raong hu 600 drei pabui saong urak ini daok klaak thaoh rilo van, kham merat abih drei ong Hiệp jeng tok raong veik hu jaik 200 drei pabui. Ngan haong yaom pabui daok tagok veik, ong caong khin dom drei pabui ini meda daong ka ong bayar hu phun jien mesre dahlau diah, blaoh hadei di nan patagok veik tapul pabui raong.

Yau nan min, jit tả pabui Châu Phi daok hu mboh, daok ka ong Hiệp jeng yau dom urang raong pabui karei duh hatai. Tui pang tui mong thông tin angaok báo đài saong tapa dom urang raong glang, ong Hiệp thau lac drei njauk pataom pren ka bruk pacang caga ruak ka pabui: Khaol dahlak mehit lac hu jit tả pabui Châu Phi ye mikva mboh biak duh hatai. Urak ini jak ba gauk klauk jru pacang caga ruak ka nyu ginup, puh ramik van ro pruh jru pametai anek ruak angaok tapul pabui, pacang khik drap ar di drei. Meda lac dom thun tapa khaol dahlak khat lahik biak rilo, nan ye urak ini bo khat lahik veik ye khaol dahlak rambah jang.

Pacang caga ruak tui jalan bhian pruh jru pametai anek ruak, pabak dinh dưỡng, patagok pren pacang caga ruak ka pabui…daok hu urang raong glang di Đồng Nai kham merat peih ngak. Kayau lac, urang ngak nong thau cambaih meyah jit ruak rah tabiak, khat lahik biak trak kayua ini lac jit ruak oh ka hu vaccine pacang caga, oh ka hu jru pasiam ruak, tuk pabui njauk ruak ye metai saong ba nao am cuh klak. Ong Nguyễn Chí Dũng daok di xã Bàu Hàm 2, huyện Thống Nhất, daok kham merat pacang khik tapul pabui labaih 500 drei di sang drei, ndom lac: Mehit lac hu jit pabui Châu Phi, gah kol dahlak peih ngak tani tanat jang, patagok bruk pruh jru pametai anek ruak, 2 harei sa mbang saong drei proi cur tani tanat jang, mong iek siam jang tapul pabui, bhian psang iek pren yava drei pabui piah hu chế độ dinh dưỡng ka nyu njauk saong samar drah pacang caga ruak.

Njauk duh hatai lac anek ruak di jit tả pabui Châu Phi meda tui rilo jalan piah njaom mbak, gaok mai menuac ndung bak ruak jeng lac makna ba tal nyaom mbak. Dalam tuk nan, huyện Thống Nhất, labik hu tapul pabui prong abih di Đồng Nai jeng daok di dom jalan nao mai prong, dalam nan hu gam jalan Roya 1 saong Roya 20, lac jalan pajeng ba pabui tui gah Barak – Meraong, nan ye mbuan njaom mbak jit ruak.

Di balai dut iek athur raong Ông Đồn daok angaok jalan Roya 1A, dalam huyện Xuân Lộc, tỉnh Đồng Nai, urak ini yaok harei hu jaik 10 sruh radaih pajeng labaih 1.500 drei pabui nao tapa. Dom harei tapa, balai hu pataom taong abih urang jakar, pambuak haong gah cảnh sát giao thông piah xử lý dom sruh radaih pajeng athur raong hu dấu hiệu vi phạm, oh caik ka drei pabui hu dấu hiệu ruak nao tapa balai. Đồng Nai jeng bahrau padang sa balai dut iek athur angaok jalan roya 20 piah pasang iek bruk pajeng ba pabui meng dom tỉnh Tây Nguyên nao tapa Đồng Nai.

Tui Chi cục Raong glang saong Thú y tỉnh Đồng Nai, taong abih tapul pabui di Đồng Nai urak ini dang akaok negar ngan haong jaik 2,4 triệu drei pabui. Hadei di tuk mehit lac hu jit tả pabui Châu Phi di gah barak, Đồng Nai hu peih nyaom biai duah jalan pacang caga jit ruak chip. Tỉnh hu peih dom nyaom biai meng tỉnh tal puk palei, brei ka urang raong glang thau ka jit saong dom jalan pacang caga jit, jhul pakhang dom jalan ngak piah pasang iek dịch tễ. Ong Trần Văn Quang, Akaok Chi cục raong glang saong Thú y dalam Sở Ngak nong saong patagok palei pala tỉnh Đồng Nai brei thau: Peeih bruk yaok iek tapul, pasang iek dịch tễ piah mboh dom drei pabui ruak. Patagok bruk pasang iek jit ruak di labik thik raih piah mboh dom bruk bất thường. Brei thau cambaih sarak daong am cuh klaak tui quy định di raja-ei saong quy định ka jien padai brei ka bruk am cuh klaak pabui ruak piah tuk hu jit ruak ye drei thau jalan langyah.

Langiu di nan,gah chức năng Đồng Nai daok pasang iek catang dom canah jalan pajeng ba pabui meng gah Barak tame, peih dom mbang pruh jru pametai anek ruak dalam tỉnh, tui iek catang bruk ngak di dom dom labik thik raih, meyah duah mboh sruh jit ruak ye ba am cuh chip tapul pabui njaom ruak saong dom tapul pabui di labik jaik taphia mbuan si njaom mbak ruak.

Meda mboh lac, taong abih urang raong glang saong gah chức năng Đồng Nai daok ba abih pren yava tabiak duah jalan pacang caga jit tả pabui Châu Phi./.