Ong Sừng Ha Xá, bangsa La Hủ dok di palei Nậm Cấu 2, xã Bum Tở, huyện Mường Tè (tinh Lai Châu) brei thau: “ Sang oh hu taneh  ngak padai ia, tok hu takik taneh piah ngak puh. Bo ngak puh kein liba takik lo, anek takuk, anek kabau labik karei nyu mai palai abih. Yaok thun kurang mbang meng 3-4 bilan, njauk taduan bruk dong brah pacang iek  di karja. Urang La Hủ dok dalam palei sang halei jeng yau sang lin” 

Kayua kurang taneh pala drak, nan ye rai duik bhap bini bangsa takik di xã Bum Tở gaok biak rilo kan kandah. Ong Chang Xì Che, Phó Bí thư thường trực di  xã brei thau: bhap bini oh hu taneh pala drak, nan ye boh sang kan di xã tagok tal 81%. Dreih yau nan,  di palei  Nậm Củm, xã Bum Nưa, huyện mường Tè, bruk kurang taneh pala drak jeng biak khang. Palei hu  30 boh sang bangsa Mảng duikrai pagam pa,bak tame bruk pala drak, ye bahrau hu 16 boh sang hu taneh ngak padai prong abih tih  3,9ha min. 14 boh sang dok veik ye ngak puh, nao glai, nan ye eik lipa tui miat luac thun. Bruk kurang taneh pala drak di bhap bini bangsa takik  huyện Mường Tè jeng lac bruk di tong abih bhap bini dom tỉnh bhum ceik gah barak urak ni. Dok di bhum Tây Nguyên, bruk bhap bini bangsa takik  kurang taneh jeng lac bruk meng rilo thun tapa. Urak ni jeng daok hu labaih   300.000 urang kurang taneh pala drak. 

          Kurang taneh pala drak, bhap bini njauk nao jah glai ngak puh. Ong Ksor Ban urang daok di xã Chư Mố, huyện Iapa tỉnh Gia Lai brei thau: kurang taneh pala drak, mik va oh dok jalan ngak hlaei karei nan lac tame glai pacang caga jah glai ngak puh. Thau lac bruk nan suan hukum, min mik va dalam tuk dok cang karja brei taneh pala drak tani tanat oh eik lipa hu. 

Anak bruk nan, dom thun tapa, rajaei hu ba tabiak rilo sarak piah dong taneh pala drak ka bhap bini bangsa takik yau: Quyết định 134, 1592, 74, 33 song jiak di ni thun 2013, Thủ tướng Rajaei hu patabiak  Quyết định 755/QĐ-TTg brei bruk daong taneh dok, taneh pala drak  tuk vak  2011-2015. Min bruk peih ngak sarak ni gaok biak rilo kan kandah. Abih di nyu nan lac di bhum ceik gah barak, kayua taneh pala drak oh dok piah parabha, nan ye hu dom puk palei yaom lac hu jien jeng oh peih ngak hu.

Ong Trần Đức Hiển, Phó Chủ tịch Ủy ban bhap bini huyện Mường Tè dut hatai lac: " Peih ngak sarak daong taneh pala drak ka mik va bangsa takik, huyện bayar ka mik va 15 triệu đồng sa ha peih taneh bilau. Min mbiah tal urak ni, khol hulin bahrau daong hu bruk peih taneh bilau labaih 86 ha taneh pala drak. Urak ni, yaom lac hu jien min oh ngak hagait hu kayua quỹ taneh oh dok. 

Makna tavak tavaiy ni mai meng jalan pambuak bruk peih ngak, kayua trách nhiệm khik ramik taneh riya oh cambaih laih. Rajaei jao ka UB bangsa parabha taneh ka mik va, min jabat ni oh hu bruk khik ramik karja gah taneh riya nan ye, oh hu quyền mek veik taneh di dom nông lâm trường. Bruk ni lac bruk di dom puk palei jang yau dom gah karei karei . Kayau yau nan ye, jalan peih ngak brei hu pasang iek veik ka nyu siam lagaih./.