Di huyện Lai Vung, tỉnh Đồng Tháp phun cam xoàn lac janih phun barau hu pala ralo jaik di ini kayua hu darak pasar takre. Dalam tuk baoh kayau hacih, baoh kayau an toàn daok  tagok rai ye phun cam xoàn brei pabak tui bruk nan. Thau bruk di darak pasar, di ban sit Lai Vung hu sa urang nông nao dahlau dalam bruk pala cam xoàn tui jalan an toàn. Kadha vak di urang vak di rayo sap ndom VN daok di bhum taneran kraong Cửu Long: 

Lac urang pataom blei cam saong pablei ka dom tỉnh ban meng meraong tabiak brak, saai Phan Văn Kiệt meng dahlau tal ini tok pablei salih dom janih phun mbang baoh dalam saong langiu huyện Lai Vung, abih di nyu nan lac baoh cam xoàn. Meng ilamu di urang pataom blei, saai Kiệt jeng thau cambaih ilamu iek glang jeng yau jalan pandar khak drak jru khik caga phun pala angaok phun hu pasiu. Tui saai Kiệt, di dom sang bein, tuk paik cam xoàn jeng daok kandaong labaih ralo jru khik caga phun pala. Kayua yau nan ye, anak bruk khin baoh kayau an toàn, khik siam pren yava urang blei mbang, saai khang hatai pasiam veik bein saong pandar quy trình pala cam an toàn meng dua thun ini mai. Saai Phan Văn Kiệt brei thau:     

 “Tui bruk di darak urak ini yau drak Ha Noi atau darak HCM. Dom darak praong yau Đà Nẵng, Hải Phòng caong hu cam hacih biak rilo. Meng dahlau mai urang bhian blei cam ba meng negar langiu mai, hatai jia glaong jang. Nan ye cam drei pala tui jalan hữu cơ saong vi sinh piah trun takik bruk kandaong labaih jru halak, drei ba tabiak drak, livik livik harei salih ka cam blei meng negar langiu”.

 Tui saai Kiệt, bruk pala cam xoàn tui jalan an toàn jeng oh hu hagait kan kandah. Khak hóa học hu saai salih meng khak vi sinh saong khak hữu cơ, jru khik caga phun pala hu salih meng bả mồi saong jru vi sinh. Abih di nyu nan lac ngak njauk tui quy trình ngak nông an toàn, danak dak khik iek jit palai pajoa tổng hợp… Meng jaik 2 công taneh pala cam xoàn hub a mai kein laba biak ralo. Hadei di 2 thun paik baoh, cam xoàn brei năng suất saong chất lượng biak siam duk saong pala bình thường. Cambaih laih di abih, tapa jak ba di kapul urang nông huyện Lai Vung, saai Kiệt hu ba cam xoàn nao pakacah di harei pataom baoh kayau Nam Bộ barau hu peih tabiak di ban raya HCM dalam bilan 6 meng bloh. Tapa nan baoh cam xoàn di saai hu jao giải 3 di harei pataom pakacah baoh kayau bingi an toàn. Ong Phạm Văn Thật, Phaok akaok kapul urang nông huyện Lai Vung lac:

 “Ini lac bruk chreih chrai ka huyện Lai Vung. Huyện Lai Vung hu bruk daong ba di kapul ngak bein  VN, cambaih laih nan lac Tiến sĩ Võ Mai, lac phaok akaok kapul ngak bein daok pato pasram tal bac hu 15 urang daok di xã Vĩnh Thới piah pala cam xoàn. Pato pasram yaok bilan, piah likau harak chứng nhận an toàn tui jalan ngak nông siam lac Gap”.

 Jeng tui saai Kiệt, bruk pandar quy trình sản xuất an toàn langiu bruk ngak tui dom quy trình khuyến cáo ye bruk praong jang abih lac bruk pandar jru khik caga phun pala saong khik njauk tukvak cách ly dahlau tuk paik baoh. Meyah ngak hu yau nan oh lac cam xoàn bo ralo janih baoh kayau di VN meda hu nao tal ralo drak pasar jang urak ini. Meng bruk ba akaok nao dahlau di drei, saai caong khin hu ralo mikva pala cam xoàn hacih, an toàn piah patrun hu phun jien saong patagok kein laba ka urang ngak bein. Saai Phan Văn Kiệt khan lac:         

“Urak ini urang biak caong baoh kayau hacih, meng nan drei ngak tabiak bein piah hu baoh cam hacih pabak ka drak pasar. Meng nan meyah mek hu laba ye njauk peih praong piah ka dom urang nông karei pala ngak piah drei pataom blei, hu cam hacih pabak ka drak”.

Cam xoàn, janih phun mbang baoh barau tagok khang jaik di ini min kayua yaom kinh tế ba mai glaong nan ye dak harei dak hu ralo urang nông pala janih phun ini. Jeng tui saai Phan Văn Kiệt, hadei di tuk bac bloh khóa back a bruk sản xuất tui quy trình VietGap, saai buh jien tabiak pasiam bein saong pamaong tal mek hu chứng nhận VietGap. Tapa nan ba akaok nao dahlau piah mikva urang nông dalam huyện ngak tui, piah tani tanat hu bruk pabak cam an toàn ka drak saong urang blei mbang./.