Thun 2011, sang ong Điểu Nhật, daok di bon Bu Srê, xã Đắc Ru, huyện Đắc R’lấp, tỉnh Đắc Nông hu Dự án 3EM daong 3 triệu đồng piah blei phun bơ pajaih. Ong Điểu Nhật daok hu urang jakar dự án tacei pato ilamu kỹ thuật, peih bruk pala bơ karei bilan pablak haong cà phê. Akaok thun ini, yaom lac bahrau brei baoh min bein bơ karei bilan di sang ong Điểu Nhật jeng mek tame hu jaik 150 triệu đồng. Meng sa urang nong kathaot, urak ini Điểu Nhật hu thau cambaih ilamu pala phun, ngak trang trại. Ong Điểu Nhật, daok di xã Đắc Ru, huyện Đắc R’lấp, tỉnh Đắc Nông khan brei thau: “Dự án 3EM daong phun pajaih blaoh tacei pato ilamu pala. Sang dahlak pala 130 phun, pala phun bơ meyah oh njauk ilamu kĩ thuật iek glang ka nyu tani tanat ye phun kan praong oh njauk lac mbuan, daok kan jang phun cà phê. Khin iek glang siam njauk pandar kĩ thuật njauk haong quy trình. Dự án 3EM jeng hu daong ilamu kĩ thuật pala, iek glang ka bein nyu siam saong kein laba jang”.

Daok sang ong Điểu N’vôi, bon Bu Srê, xã Đắc Ru, huyện Đắc R’lấp, tỉnh Đắc Nông ye peih bruk raong anek dúi rilo meng phun jien di Dự án 3EM. Ong Điểu N’vôi brei thau, meng 8 gu pajaih tuk camereip (yaom labaih 4 triệu đồng), tal harei ini sang ong hu pablei yaok rituh drei pajaih saong dúi rilo, saong daok pambak prong bruk raong anek dúi dalam bon. Điểu N’vôi  khan lac: “Dự án 3EM daong ka dahlak 8 gu anek dúi tuk camereip, hadei di 6 bilan ye anek dúi nyu caih. Urak ini yaom pablei 700 tal 800 đồng sa gu, yaok bilan pablei hu labaih 3 triệu”.        

Dự án 3EM patagok bruk ngak mbang kinh tế khang kajap ka bhap bani urang bangsa takik tỉnh Đắc Nông, hu daong patruh eik patrun kathaot dalam puk palei. Tal urak ini, dalam jaik 1 ribau baoh sang urang bangsa takik daok di 23 xã biak kan kandah hu mbang tui phun jien meng dự án 3EM, labaih 400 baoh sang tabiak truh kan kathaot. Tui ong Phạm Tuấn Anh, Akaok Ban khik iek Dự án 3EM di Đắc Nông, hu siam lagaih tuk camereip yau nan, langiu di bruk buh phun jien tame, karja, dom kapul nyaom kham merat daong ka bhap bini tabiak truh kan kathaot khang kajap: Piah peih ngak dom chuỗi giá trị khaol dahlak brei padang dom kapul nyaom hu hatai takre yau gauk. Ini lac sa dalam dom jalan ngak bahrau ieu pataom bruk hu mbaok di dom kapul nyaom, baoh sang urang nong dalam bhap bani. Hadei di tuk padang tabiak, njauk khik ramik bruk ngak piah pachreih bruk hu mbaok dak harei dak ralo. Blaoh peih ngak dom mbang thực tế, tal pato pathram, mbang nao rivang iek piah daong ka dom kapul nyaom hu thau thông tin đầu vào saong hu bruk palih ruah.”./.