Nhà thờ Đức Bà oh hu manuac rivang main hadei jit Covid-19

Tui ong Nguyễn Hữu Y Yên, Tổng Giám đốc Công ty Duh ba tuai rivang main Saigontourist, jit Covid-19 ngak khat lahik biak trak ka gah duh ba tuai nao rivang main, abih di nyu lac meng hadei di bilan 3, tuk taong abih gah pablei salih jeng dang veik, jien mek tame yau oh hu hagait. Di puac bilan 4, tuk Rajaei cadu bruk pa-atah di gauk saong bahrau di abih lac klaak bruk pa-atah di gauk angaok kapal haok, radaih pui, radaih tuai saong radaih công cộng ye Saigontourist meng ngak gilac veik taong abih dom danak dak dui pachreih, peih pablei dom tour rivang main dalam negar saong mboh hu siam. Ong Nguyễn Hữu Y Yên daok brei thau lac, kayua urak ini Viet Nam saong jiak abih dom taneh ia daok khik iek catang jalan tapen negar, dulich Ban raya HCM oh ka taduan raok tuai negar langiu nan ye du lich dalam taneh ia, dom tour dulich katut harei saong tuai takik lac jalan ngak bo doanh nghiệp daok pamaong tal:   “Kan kandah urak ini lac hadei di labaih 2 bilan pa-atah di gauk, dom urang pabak bruk duh ka tuai di dom palei, meng resort, nhà hàng mbiah tal dom labik rivang main oh ka peih gilac veik abih. Kayua yau nan ye, mbiah tal hadei bilan 5, dom po pabak bruk duh ka urang rivang main peih ngak bruk veik ye labik halei peih pabah mbang khol dahlak meng taom gaok saong ba tuai tal labik nan.”

Jeng yau rilo labik brei tuai pah labik ndih daok di Ban raya HCM, kayua gaok kan kandah meng jit Covid-19 bo duk bilik ndih di khách sạn Rex, Quận 1 trun , meng 80% mbiah tal ini daok labaih 7%. Piah pasiam veik dalam tuk birau yau urak ini, khách sạn pataom tame tuai daok dalam taneh ia, dịch vụ kuan mbang, jhul khang bruk brei pah lap duk bilik  ndih daok, mbang menyum saong patagok bruk patabiak yaom lap meng ini mbiah tal puac thun. Ong Nguyễn Mạnh Hùng, urang ngak bruk daong ka Giám Đốc Khách sạn Rex brei thau, bruk Ban raya HCM patabiak bộ tiêu chí salamat ngan saong bruk rivang main dulich lac bruk njauk ngak piah padang hu hatai jia di tuai damuai:“Bruk Salamat tuk halei jeng hu khách sạn iek praong brei ngak dahlau. Duk bilik ndih bhian hu pruh jru, pandap mbang panal hu ba tal bilik atau tame labik mbang, tagok tal angaok glaong di abih, dom labik hu ngin lahơi. Ngak yau nan urang tuai  meng mboh drei hu salamat. Langiu di nan, khách sạn jeng hu pathau khan lac labik ndih daok salamat tagok facebook jeng yau rilo jalan truyen thong karei.”

  Ong Trần Hùng Việt, Akok Hiệp hội Du lịch TPHCM taong yaom bruk tuai damuai rivang main di dom labik yau: Đà Lạt, Nha Trang, Vũng Tàu dalam tuk padeih lễ 30/4 - 1/5 meng blaoh lac brei mboh gah dulich hu pasiam gilac veik. Hadei di tuk padeih suai lavik, urak ini, lac tuk siam lagaih piah ka gah dulich Viet Nam jeng yau du lich TPHCM rami ramik veik dulich duh ka tuai dalam negar: “Hu sa bruk di gah dulich pachreih patagok lac brei pambuak bruk saong grauk piah ba tabiak yaom njauk mbiah piah ba tame paok pachreih patagok. Ngak yau habar  piah ka dom đơn vị meda dang hu dalam tukvak kan kandah ini. Kayua Yau nan ye, dalam tukvak ini, mek hu phun jien veik, raong hu urang ngak bruk saong bayar dom jien buh tame ngak nan hu jak jeng paje.”

Daok gah Du lịch ban raya HCM, Amuk Võ Thị Ngọc Thúy, Phó Giám đốc Sở brei thau, bruk pasiam veik gah dulich pambak tame bruk diuk metai jeng yau prein khang patagok gilac di yaok doanh nghiep. Yau nan ye, Sở hu daong ka dom pakat angaok piah ba tabiak dom nyaom jalan ngak siam lagaih, daong ka doanh nghiep. Yau ye: kadun tukvak kak jien je, kadun tukvak bayar jien BHXH, patabiak voucher du lịch, ngak brei salah tapuk Cẩm nang hukum daong doanh nghiệp dalam tuk jit ruak Covid-19, jhul pakhang bruk pambuak pandap panda ngan saong 13 tỉnh, ban bhum taneran kraong Cuu Long saong dom tỉnh, ban Đông Nam bộ lac dom labik takik kan kandah kayua jit ruak:“Ban raya HCM peih ngak gam tui danak yaih khan truyen thong. Peih mbaok meng bruk “ Bánh mì Sài Gòn”, Sở Du lịch TPHCM pambuak bruk saong Google piah pathau khan tal 11 negar. Anak tal, khol dahak hu danka dak yaih khan“Hello, Hochiminh City”yaih khan thaot binguk Ban raya HCM dalam tukvak urak ini, siam mekre, salamat saong tuk halei jeng chreih chrai piah taduan raok tuai tame rivang main.”

Yau nan, gam saong dom jalan daong di Ban raya HCM, dom doanh nghiep jeng hu jalan pasaim karei di drei, tui prein pacang hu jit ruak di yaok labik rivang main, piah dak harei dak hu ba gah dulich gilac veik bruk ngak. Meng bruk nan meda daong ka dulich Ban raya HCM jeng yau dulich Viet Nam samar gilac veik cak rok patagok, abih di nyu lac tuk taong abih dom jalan par di kapal haok hu par veik./.

Urang lang: Aí Nghiêm - 14/5/2020