Binh Thuan lac labik dulich salamat

  Jit ruak Covid-19 ngak kan kandah oh lac sit tal gah dulich. Rilo tuai dalam negar saong tuai negar langiu caong khin ba diuk anek, gauk gar nao rivang ma-in dulich min oh thau palih ruak labik halei nao tal piah hu salamat.

       Tui panuac kakei di gah Y tế ye virus corona diuk di nhiệt độ biar saong ẩm, bhian oh tapa 25 độ C. Di gah langiu rup pabhap anek manuac, meyah gam hu pandiak, gam hu nhiệt độ glaong, ye virus corona meda metai hadei di 3 tal 5 minit. Bình Thuận tuk ini langik pandiak. Tuai mai tal Bình Thuận hu menei ia tasik, pambu pandiak, suak yawa di labik langik siam hacih ye oh daok huac hagait virus corona. Kein lagaih di dulich Bình Thuận daok di labik lac dulich padeih padei, hu brei angan ieu lac “Vương quốc resort”. Dom labik dulich, resort bhian brei ka tuai daok karei, oh pataom tame labik rilo manuac, ron sir yau dom labik dulich lễ hội, dom labik gheih mekre karei, biak lagaih ka bruk pacang plaih jit ruak.

  Birau ini, pan akaok mbang ginum biai Thường trực Rajaei ka bruk pacang caga jit ruak Covid-19, Thủ tướng Nguyễn Xuân Phúc jeng hu panuac lac: Viet Nam oh lac labik rivang main salamat kayua dom kham merat pacang caga jit ruak biak siam bo Viet Nam daok hu salamat meng langik tasik ấm áp di negar, langik tasik di bhum kreh negar, gah meraong negar urak ini biak siam. Dom takai tasik hu pandiak ấm, langik biak siam. Tuai damuai meda mai tal Việt Nam oh lac piah hu salamat, piah hu khang kajap prein yava jang bo daok mboh chreih chrai dalam rup. Thủ tướng jeng bui sambai mboh lac dom gah, dom doanh nghiep oh lac yam tapa kan kandah kayua jit ruak bo daok ba “bruk kan jeng lagaih” biak siam.         

Di Bình Thuận, anak bruk jit ruak Covid-19, gah dulich hu peih ngak dom jalan pacang caga biak siam. Dom labik lưu trú praong jeng hu khẩu trang y tế, jamriak duk iek nhiệt di rup, khik hacih sa-at, pametai anek ruak…tui iek, duah thau jalan nao di tuai damuai. Langiu di nan, dom labik lưu trú daok hu pambuak bruk haong dom jabat chức năng ngak njauk bruk pacang caga jit ruak Covid-19. 

      Ngan saong bruk tacei pato, ba jalan ngak, Sở Ilamu, padhih saong Dulich hu ngak ngak njauk tui dom harak văn bản tacei pato di Trung ương saong di tỉnh ka bruk pacang caga jit ruak Covid -19. Saong daok hu pambuak bruk haong Hiệp hội Du lịch peih ngak, tacei pato bruk pacang caga jit ruak saong peih ngak dom jalan piah patagok dulich dalam tukvak ini. Gam saong nan, daok tui iek, duah thau bruk tuai mai meng labik hu jit ruak, abih di nyu lac tuai negar Trung Quốc urak ini daok daok di dom labik ngak mbang gah dulich saong dom darak pasar karei hu gaok kan kandah kayua jit ruak.

Yau Thủ tướng hu ndem, hu dom gah, dom doanh nghiệp oh lac yam tapa kan kandah kayua jit ruak bo daok ba “bruk kan jeng lagaih”. Caong lac bruk thau pagam pambak tame, sami samar ba “bruk kan jeng lagaih” di gah dulich Bình Thuận, ngan saong dom siam lagaih di drei meda mek hu dom siam mekre dalam bilan jit ruak Covid-19 ini./.

Urang lang: Aí Nghiêm -12/3