Dua diuk pasang khik ging hadah ilimo Cam

        Dalam raidiuk jarvar harei ini jeng daok hu dom urang trak hatian saong ilimo bangsa. Dom urang nan hu nao tal dom  palei Cam, patak pataom dom ilimo Cam mengkan daok kandaong veik, ramik pasiam jeng dom asar intan hadah. Urang ngak bruk nan meng hatai caong khin dom asar intan ini oh lihik nao, caong lac nyu hu caik veik ka dom rairah urang Cam. Diuk pasang Chế Quốc Minh saong Qua Thị Hồng Loan daok di palei Lạc Trị, xã Phú Lạc, huyện Tuy Phong, tỉnh Bình Thuận lac dom urang yau nan. Kadha vak di Jasi – urang vak di rayo sap ndom Việt Nam daok di ban raya Hồ Chí Minh: 

      "Caik hatian meng sit tal praong

Tal mbuk paoh di raong mai hu ka urang

Caik hatian meng sit ndih ndang

Kak hatai halar hatian mai hu ka urang".

       Kol drei barau pang amuk Hồng Loan daoh kadha daoh bhapbini Cam hu angan “Caik hatian". Amuk Hồng Loan ndih tapui tabiak dalami sa sang trí thức Chăm daok di palei Lạc Trị, xã Phú Lạc, huyện Tuy Phong, tỉnh Bình Thuận. Ame di amuk lac Qua Đình Bồi dalau thiah hu angan je dalam bruk biên soạn tapuk akhar Cam, amaik lac amuk Đàng Thị Thảo – urang hu daa mai daoh dom ragu daoh bhapbini meng rai po patao Bảo Đại. Kayua yau nan ye bo meng sit, amuk Hồng Loan hu pang mehit dom kadha daoh bhapbini saong livik livik harei mboh takre dom ragu daoh bhaobini di bangsa drei. Yaom lac sa urang jakar y tế xã, min, amuk tuk halei jeng caik tukvak ka bruk duah pataom dom ragu daoh bhapbini Cam mengkan. Dalam dom rija roya praong, sit di urang Cam dalam palei drei, amuk jeng hu mbaok saong vak veik dom kadha daoh, dom ragam tamia saong dom ragu daoh bhapbini bo dom halau janeng hu daoh, tamia. Amuk duah pataom, daoh saong pato veik ka dom rairah ranaih umo dom ragu daoh bhapbini, dom ragam tamia kadhik mengkan di urang Cam. Urang halei hu mai palei Lạc Trị dalam bilan rija roya meda hu pang dom ragu daoh bhapbini Cam bingi pang taphia bimong Po Dam gireih. Oh êm đềm yau kadha daoh bhapbini bhum Tây Bắc, oh chreih chrai yau kadha daoh bhapbini Tây Nguyên, jeng oh lãng mạn yau kadha daoh bhapbini bhum Bắc Trung bộ, ragu daoh Cam lia li-an, bingi pang, ndung bak hatai anit saong caong khin.

     Tui amuk Hồng Loan, urak ini amuk meda daoh labaih 10 ragu daoh bhapbini karei di gauk ye : Daoh meyut, daoh dam dara, daoh rathung chai, daoh pandao, Puac jal…

         Caong khin di amuk Qua Thị Hồng Loan yau hu pabak shaok tuk amuk hu gaok ông Chế Quốc Minh. Ông Minh Dhlau thiah lac sa urang jakar gah Y tế. Langiu bruk ngak di drei, ông Minh jeng caik rilo tukvak nao duah iek, vak veik dom ilimo mengkan di dom rija roya di urang Cam ye : Rija Yaup, Rija Prong, Rija Harei...Ông oh lac thau cambaih ka dom adat cambat tanarakun mengkan di urang Cam, thau taong Ginang, pah Baranung bo daok dang tabiak peih dom tan pato taong Giang saong pah baranneg ka dom urang likei dam dalam palei. Dalam harei mbang kate di palei, ông dang tabiak jak ba dom mạnh thường quân peih mbang pakacah ndua buk, tamia kadhik, taong Giang, yuk kadet Saranai…ba bui sambai saong mblang mein siam ka dom urang likei dam, kumei dara dalam palei. Ông sahaneng lac, dalam raidiuk barau yau urak ini, dom urang ranaih umo dak harei dak var nao dom ilimo mengkan di bangasa, meyah kol drei oh hu dom bruk ngak siam.

      Raidiuk harei ini saong rilo jarvar, glaih glan dalam bruk duah jien padai daok ngak ka urang takik hu tukvak sahaneng tal ilimo mengkan saong hu tuk var nao halau gha bangsa. Taphia nan, urang ranaih umo Cam urak ini jeng mbaiy ka-ing saong ilimo mengkan di drei. Njauk pok meyaom dom bruk ngak siam di diuk pasang ông Chế Quốc Minh saong amuk Qua Thị Hồng Loan daok di palei Cam Lạc Trị.

      Ngan saong dom urang takre ilimo Cam,  oh var hu dom kadha daoh bhapbini Cam kayua amuk Hồng Loan daoh; dom sap ginang di ông Quốc Minh paoh di harei mbang Kate di angaok bimong Po Dam. Di dom mbang pataom sap daoh bhapbini pakat negar kayua Rayo papar binguk VN peih ngak dalam dom thun 2000, amuk Hồng loan ngak ka mban giám khảo saong urang pang pok meyaom tapa dom ragu daoh bhapbini Cam saong mek hu rilo giải thương glaong.

      Dak pang dak takre dom ragu daoh bhaobini Cam bingi pang, lai li-an, kol drei dak iek praong jang dom bruk ngak di diuk pasang ông Quốc Minh saong amuk Hồng loan. Dom urang nan yam tapa oh thau hadom kan kandah dalam raiduk piah khik, caik veik dom yaom glaong ilimo di bangsa drei, rik daong khik ramik ilimo Cam mengkan./.