Labik rạch Bàng Cồn Cỏ di khu phố Trường Khánh, phường Long Phước, quận 9, ban raya Hồ Chí Minh dahlau daih lac sa bhum taneh praong, phun kayau hijao mekre. Rilo menuac mai blei taneh, ngak sang piah padang mbang ngui suai lavik. Min meng labaih 10 thun mai ini, taneh riya nyu glut jaleih trun kraong kayua urang mek cuah lậu. Bhian di nyu, meng 8 tuk melam tal 5 tuk mesup lac tukvak dom kapal njuk mek cuah ralo di abih.

Ini lac labik dom kapul urang mek cuah lậu meng Bình Dương, Long An, Đồng Nai... dui gauk mai ngak mbang. Tuk kol mek cuah nyu mai, labik kraong yava dane sap gaiy nduac, sap jamriah njuk mek cuah. Yaok gaiy hu meng 2 tal 3 nding njuk mek cuah praong jaik 30cm saong hu yaok pluh urang palaih gauk njuk mek cuah, hadei di nan tuh tagok xà lan ba nao pablei. Ralo melam bhap bini tapen kraong oh ndih kayua huac jaleih haluk. Jaik 10 thun ini mai, hu jaik 20 urang lahik taneh, min tok vak harak pathau tagok karja palei, oh tabiak mbaok pacang veik kayua kol mek cuah nyu taong urang halei pacang nyu. Saai Bảy Hòa, sa urang lahik taneh brei thau:

 “Rai diuk di labik ini njauk srau kadau. Sang dahlak jaleih trun kraong ye. Tui kuhria labik ini lahik labaih 60 ha ye, daok lihik tra. Kol nyu oh iek thei tabiak hagait, pandik hatai lô. Bhap bini di labik ini eng drei kuhira caga bo daok njauk kol nyu duah geng tra. Urang mek cuah nyu khin ngak hagait ye nyu ngak”.   

Daok di phường Long Phước meng hadei di thun 1975 tal urak ini, dua anek ame ong Nguyễn Văn Phó saong Nguyễn Tuấn Hải mboh taneh riya, sang danaok di bhap bini seik tui ia. Dahlau daih, meng thun 1976 tal thun 2006, tuk lac tổ trưởng khu phố Trường Khánh, tuk hu bhap bini brei thau, jaik 7 tuk melam ye ong Nguyễn Văn Phó saong dom po taneh peih gaiy tabiak kraong caga bloh cap mek atau pateok nao. Tukvak ini, meyah lac kapal takik, min ong jeng gaok oh takik kan kandah tuk bhian njauk gaiy njuk mek cuah praong jang ginuh tapak tame, laik trun kraong saong khut gaiy. Meng thun 2006 tal urak ini, tuk ong Phó adeih ngak tổ trưởng tổ dân phố ye bruk mek cuah lậu dak khang jang. Ong Nguyễn Văn Phó lac:  

“Tuk umo 34, 35 thun, dahlak hu mbaok tame pacang  kol mek cuah ye. Taong abih taneh bo urak ini lahik nan dahlau daih dahlak  khik iek. Bruk di urang min drei mboh pandik hatai. Sa sruh gaiy di kol nyu hu 4, 5 urang, gaok tuk nao 10 sruh, drei nao jaik 10 urang ye ngak hagait hu. Nyu ngak tuk melam, harei ndih, kayua yau nan ye urak ini karja palei brei ngak yau habar piah cap hu kol mek cuah ngak yau ini ye biak kan. Paguh pagaiy, sang dahlak  meda lahik nao kayua meng langiu nan nyu mbang tame ini”.  

Mboh ame praong thun, pren yava  oh daok khang kajap min jeng daok suh sah kayua kol mek cuah nyu daok ngak khang, labaih 10 thun ini mai, saai Phạm Tuấn Hải jeng oh huac kan kandah, patui bruk bo ame saai daok ngak meteh dhi. Bhian di nyu meng 6 tuk mesup saong 7 tuk melam, saai peih radaih mac tapen takai kraong piah tui ike bruk, yaok iek hu hadom gaiy, kapal medil bloh khan ka bhap bini jaik taphia caik hatai. Rilo mbang  1 - 2 tuk melam, meyah mboh bruk biak catang, taeng saai oh huac hagait peih gaiy tabiak kraong bloh khan ka dom gah chức năng. Saai Hải ndom lac, urak ini di khu phố ini oh hu thei ngak yau nan kayua kol mek cuah  nyu biak jhak, nyu taong veik urang halei pacang nyu, yaom lac công an kol nyu jeng oh huac.

Yau ame saai dahlau daih, saai Hải ralo mbang njauk dom gaiy, kapal mek cuah ginuh tame gaiy, daok njauk kol nyu ndok taong. Saai hadar veik, tukvak dahlau di thun 2020, tuk daok peih kapal pajeng công nhân ngak jalan cao tốc Long Thành – Dầu Dây, mboh kol mek cuah kuhria njuk mek ye saai saong dom công nhân karei peih kapal pagui pateok, meng nan nyu joa kandang hu hasit, min hadei di nan nyu rah tabiak veik. Mbang barau di abih saai Hải gaok kol mek cuah lac 4 bilan dahlau. Tuk nan labaih 10 tuk melam, saai bahrau peih gaiy tabiak ye kol nyu mboh. Kayua thau mbaok gauk nan ye kol mek cuah nyu preo puac, ndok taong, bloh ginuh tapak tame, gaiy saong menuac jeng pakhuak trun kraong. Dalam dom mbang nyaom saong karja puk palei, saai Hải lac urang pok panuac khang tuk bruk mek cuah sung hukum dak harei dak khang, ngak khat lahik praong ka bhap bini. Saai Nguyễn Tuấn Hải brei thau: 

 “Drei njauk caik hatai sangka, bahrau ini nao khik iek meng đò ye kol mek cuah ieu phon ndok taong po đò nan ye urak ini urang oh khin pajeng tra, yaok melam yaok rituh giay. Mikva daok di labik ini jeng huac oh khin tabiak mbaok min gah likuk jeng daong dahlak biak ralo, thei jeng khin palahik bruk ini meyah oh nyu lih tame ini. Gaok tuk jeng nản lo min saneng lac drei oh ngak ye kol mek cuah nyu ngak khang jang, taneh riya mikva lahik abih. Di labik ini ralo urang hu taneh khin pablei min oh hu thei blei kayua oh thau lac dom harei tra nyu seik trun kraong trun tasik abih.Urak ini dahlak tok caong dom jabat chức năng langyah hu bruk urang mek cuah”.

Khang hatai pacang kol mek cuah ralo thun, dua anek ame ong Nguyễn Văn Phó saong saai Nguyễn Tuấn Hải lac labik hu karja palei saong dom jabat báo chí mai tal piah duah thau ka bruk mek cuah di labik ini. Glaih glar dom pluh thun, yaom lac abih oh takik tukvak, jien padai saong pren yava min urang oh klak bruk. Min, gah likuk bruk ngak siam nan, dua anek ame saai jeng oh padauk hu bruk duh hatai kayua ini lac bruk praong jang pren di dua anek ame, kol mek cuah dak harei dak jhak jang. Jaik 60 ha taneh jaik kraong siam mekre harei halei urak ini lahik abih, salih tame nan lac sa labik bak ia. Bruk bo ralo bhap bini labik ini caong khin abih tuk ini lac bruk ba tangin tame khang di karja palei dalam bruk mesruh pacang kolmek cuah ini./.