Bình Thuận patagok tui jalan ngak di bhum palei drei 

Tal tuk vak ini, huyện padang hu rilo bhum pala, ngak praong, dom công ty saong doanh nghiệp hu mboh tangin tame harak pambuak bruk haong urang nong tapa tổ hợp tác, HTX piah blei dom janih pandap hu rilo di huyện yau: pa-aok blait, cao su, padai, tangeiy, njam patam saong pabui. Ngan haong phun padai, yaok thun huyện hu pambuak bruk blei labaih 13.470 tấn, meblah 10,23%  padai ngak hu dalam huyện. Dalam nan, HTX ngak nong Công Thành Đức Linh lambaok ka urang nong mboh tangin tame harak pambuak bruk haong Công ty TNHH MTV Út Hạnh Công Thành Long An  8.700 tấn/thun, yaom blei tani tanat meng 5.100 – 5.500 đồng/kg.Langiu di nan, daok hu Công ty TNHH Đại Nhật Phát pambuak bruk haong HTX ngak nong Mê Pu, HTX ngak nong Sùng Nhơn mboh tangin tame harak pambuak bruk blei labaih 4.770 tấn/thun.Taphia di nan, daok hu pambuak bruk blei labaih 1.500 tấn/thun phun mbang baoh meblah  12,82% baoh kayau dalam huyện.Dalam nan, HTX kruac bung kalik hijao Đông Hà hu pambuak bruk haong urang nong xã mbaoh tangin pambuak bruk pala, pablei kruac bung kalik hijao 500 tấn/thun haong Công ty TNHH Hưng Phát bal raya HCM. HTX Rô Mô mboh tangin tame harak pambuak bruk pala, pablei baoh durieng haong Công ty TNHH An Bình 1.000 tấn/thun. Daok njam mbang hala, HTX njam patam hacih sa-at Trà Tân hu mboh tangin tame harak pambuak bruk haong Công ty TNHH MTV Đỗ Nguyễn Minh yaok thun blei jaik 138 tấn. Langiu di nan, HTX njam Tiến Phát daok pambuak bruk haong  HTX njam Phú Long blei labaih 57 tấn njam patam yaok thun…

Phaok Akaok UB bhap bani huyện Đức Linh - Huỳnh Văn Tú brei thau, dom bruk pambuak gauk ini dak harei dak cak rok, hu mboh rilo  đơn vị dalam saong langiu huyện duah tal saong buh jien tame ngak tapa tổ hợp tác, HTX piah blei pandap panda ngak tabiak ba mai kein laba glaong saong hu dom gah daok patui ngak. Lingiu di nan,  urang nong rilo meng pachreih tui, salih janih phun pala ka nyu laghaih, ngak brei parilo jang pandap panda kaya nong paglaong jien mek tame ka urang nong. Min bruk duah labik pablei ka pandap panda kaya nong dalam huyện jeng daok gaok oh takik kan kandah. Hu dom urang dalam HTX oh ka thau hu abih jalan ngak tuk peih ngak chuỗi pambuak gauk; oh ka bhian randap haong bruk ngak tui harak pambuak bruk, oh ka randap ngak njauk tui tanut ngak tabiak pandap panda… Nan oh ka ndom tal, ilamu khik iek di dom HTX daok biar, kurang dalam dom bruk pabak pandap, pambuak gauk. Ba tal bruk dom urang di HTX hu mbaok tame chuỗi pambuak gauk pablei pandap panda daok biar.

Piah pasiam veik dom tavak tavaiy dalam bruk pambuak gauk ngak, Phaok akaok UB bhap bani huyện Đức Linh pok panuac tagok UBND tỉnh Bình Thuận tacei pato dom gilang pariak, palaghaih ka dom HTX hu mesraiy phun jien piah peih prong bruk ngak mbang pablei salih, hu jalan ngak samar, lagaih gah harak gar mesre phun jien ka dom HTX. Langiu di nan, daok hu panuac caong UBND tỉnh tacei pato Sở Ngak nong saong patagok palei pala, Sở Jien padai peih ngak saong tacei pato jalan ngak, harak gar thanh quyết toán kadung jien karja tuk peih ngak phun jien meng Sarak 98/2018/NĐ-CP ka pachreih patagok bruk pambuak gauk dalam ngak tabiak saong pablei pandap panda kaya nong./.

Urang lang: Jasi -21/3