Jit praong COVID-19 daok rahtabiak sarau kadhau, ngak kan kandah praong tal raidiuk di rilo menuac

Thei dalam khol drei jeng meda tuk gaok srau kadau hatung hatian, akaok saneng. Hu menuac yam tapa hu, min jeng hu manuac oh tapa hu, abih di nyu nan lac urang kumei takik taom gaok, takik ndom biai haong urang karei meda mbuan hu dom sarau kadhau ka jalan sahneng, ngak brei mboh duh hatai, huac kanda atau mboh duh hatai gam huac kanda. Tuk prein yava trun ye prein ngak bruk jeng trun tui saong hatai saneng oh tani tanat. Mayah oh langyah samar meda ba tal trak damak jang.

Ngan haong dom menuac hu akaok sahneng oh tani tanat mbuan laik tame pandiak hatai, meda ba tal srau kadhau akaok sahneng tuk raidiuk njauk sarau kadhau mai meng dom bruk yau lahik bruk ngak, trun jien mek tame atau njauk ruak.

Hu urang ruak duh hatai suai lavik meng nao tal bác sĩ. Dom urang nan khan lac hu dom tukvak kham marat yam tapa hu, min kayua rilo bruk kan kandah nan ye laik tame duh hatai dalam jang oh tapa truh hu, meng nan meng nao tal sang iek ruak piah pasang iek saong taong ruak.

Piah yam tapa dom srau kadau hatung hatian kayua duh hatai, huac kanda ini, khol drei meda rami ramik veik bruk ngak, jalan diukrai, bruk taom gaok, mbang huak, daok dang, ngak brei hatung hatai mboh chreih chrai, jhui sahneng caik trak damak dalam hatai, pasram klaak dom bruk mboh lac sahneng tal jeng oh kein hagait. Ndih ginup tuk, mbang ginup pandap siam ka prein yava, gauk gar bhian taom gaok, ndom biai nao mai ba bui sambai chreih chrai mai ka urang ruak.

Mayah trak jang njauk nao tal dom labik y tế taong ruak gah tâm thần piah hu dom bác sĩ iek gah ruak tâm thần iek ruak, tacei jalan cambaih laih, taong ruak njauk, daong brei samar thit ruak, khang kadang piah ba drei tame raidiuk siam makre yau dahlau daih./.

Urang lang: Thu Thảo – 17/06