Meng ban sit  Buôn Ma Thuột, pasak tỉnh Đắc Lắc, nao labaih 120 km jalan tapa dom glai khộp thu lagu, khol hulin meng nao tal balik iek ruak quân dân y của bộ đội biên phòng daok di xã Ia Rvê, huyện Ea Súp. Boh sang pakat 4 mekre, siam, hu balik iek ruak, balik ruak nội trú song balik dok ka urang jarka y tế, hu padang ngak meng 2 thun dahlau meng danak dak “Nghĩa tình Trường Sơn”. Ni lac labik iek ruak brei saoh song iek glang pren yava ka bhap bini 5 palei tapen jalan negar di xã Ia RVê. Lingiu bruk iek ruak, yaok bilan, dom urang jarka quân y dok pambuak bruk song bilai  y tế xã Ia Rvê peih bruk klauk jru ka uranaih, tacei ba mik va pacang caga dom janih jit ruak song peih bruk pruh jru pametai jamuk. Amuk Nông Thị Cầu, dok di palei 5, xã Ia Rvê, huyện Ea Súp, khan lac

Hu balik iek ruak pak ini, tuk ruak kik khol hulin hu gru jru iek ruak dong ba abih hatai jai, meng urang taha tal uranaih  tuk ruak kik hu biên phòng, hu gru jru dong ba, khol hulin mboh bui sambai song sahaneng hatai ngak mbang pala drak

Buôn Đrang Phôk dok di kreh glai pakat negar Yok Đôn, atah di pasak xã Kông Na, huyện Buôn Đôn labaih 20 km jalan takai. Jiak 10 thun tapa, meng hu balik iek ruak quân dân y di đồn biên phòng Sêrêpốc iek glang pren yava, bo labik ni oh daok hu jit li-ar dom, pandiak tabiak darah. Buôn Đrang Phốk jeng oh rah tabiak bruk njauk jru mek pandik hatai kayua mbang bimao độc, rilaow raok, rilaow nưa … yau dom puk palei bhum atah bayah di Tây Nguyên. Ong Y Không, sa urang di palei Đrang Phôk brei thau, nan lac hu gah biên phòng iek glang ka bhap bini, tacei pato mik va pacang caga ruak kik song jru mek pandap mbang.

 Bhap bini khol hulin dok di bhum atah bayah dahlau deih ruak kik oh hu gru jru atau sang iek ruak halei, tok hu gru ieu yang min. Urak ni hu bộ đội biên phòng 743 dong, bloh Bộ chỉ huy biên phòng bhian mai brei jru tavao, iek ruak kik. Jru tavoa hu brei tal sang, dong ka bhap bini di bhum atah bayah yau khol hulin abih ruak. Khol hulin thau dar phol rilo lo.

Lac labik caik hatai jia di bhap bini daok tapen negar, min dom balik iek ruak quân dân y di bộ đội biên phòng Đắc Lắc oh ka pabak hu abih hatai khin di mik va, kayua dok rilo kan kandah, kurang rilo janih. Đại úy Đỗ Văn Diện, urang dang akaok balik iek ruak quân dân y di bhum Ia Rvê cong khin lac, lingiu di biên phòng, dom gah, dom pakat njauk rik pren yava tame daong piah hu rilo jru tavoa song pandap panda duh ka bhap bini hu siam jang.

Mik va di labik ni rilo meng lac urang bangsa takik. Jalan nao tal bilac y tế xã biak atah, n ye bhian nao tal bilik quân y. Min jru brei ka mik va dok kurang biak rilo. Ka dua lac pandap iek ruak tok hu meng  Bộ tư lệnh biên phòng, nan ye iek dom ruak hanjual min, dok iek ruak trak ye oh ka hu.

Lingiu dom urang dalam kapul  quân y tuk halei jeng hu mbaok di balik iek ruak, bộ đội biên phòng tỉnh Đắc Lắc bhian peih dom mbang iek ruak, brei jru saoh ka bhap bini tapen negar. Ni jeng lac tuk piah duah thau tong yaom bruk ruak kik dalam bhum, rami ramik pasiam paglaong siam mekre dom balik iek ruak quân dân y song klah rabha dom kan kandah haong bhap bini. Thượng tá Âu Chiến Thắng, Chủ nhiệm quân y bộ đội biên phòng tỉnh Đắc Lắc, lac:

Khol hulin mboh hu bruk kurang lihik di labik ni mik va takik hu iek glang pren yava jang yau dom danka dak bruk ngak pakat negar pacang caga ruak kik. Meng hatai khin klah rabha dom kan kandah kayua gah ruak kik, dom kan kandah di bhum tapen negar, khol hulin hu caik rilo tuk vak jang sangka tal mik va, jang yau dom pakat dom gah ba gauk tame song mik va khik hu pren yava siam piah daok veik di labik tapen negar dak padang palei negar.

Labik bhum atah bayah mbak pandiak song hangin Tây Nguyên, dom gru jru quân hàm xanh daok daong ngak brei kajap jang talei rohim quân dân, ba gauk khik caga khang kajap chủ quyền an ninh tapen negar, khik ka bhum tapen negar Đắc Lắc tani tanat song dak harei dak tagok./.