Hậu Giang brei dui atah tuk vak tam drak bilan  padai  Thu đông 

Gah kapar haoh Việt Nam baharu hu panuac ilkau peih viek 6 jalan par dunya meng harei 15-9. Dom labik par tal tui kuhria hu peih veik jalan par lac Trung Quốc, Nhật Bản, Hàn Quốc, Đài Loan, Lào, Campuchia. Tui bruk ba tabiak ini, dom tuai damaui tame negar yaok adit lac jaik 5.000 urang, di Hà Nội saong ban raya HCM. Gah kapar haoh Việt Nam pandar Mintri jalan mbak ieu kakei Mintri Y tế tabiak dom panuac kakei ka bruk pasang iek y tế pandar ngak haong dom tuai tuk tame negar saong brei thau dom angan bilik dut iek real-time PCR kayua rajaei Việt Nam phê duyệt piah pathau khan tal dom gah pambuak bruk, tui damaui.

Pambuak tal danak dak krong ribong 4.400 tỷ Krông Pách Thượng 11 thun  oh ka ngak salah saong mblo tabiak rilo tavak tavaiy, mesup  ni  (3/9), Mintri ngak nong song patagok palei pala  hu ngak bruk  song  Thường trực Tỉnh uỷ Đắk Lắk piah duah jalan jhul pakhang bruk ngak di danak . Tui nan, bruk njauk suh sah tuk kreih adit bilan 8 meng bloh  ia hajan di  labik danao hu meng  30-40mm, ba tal dauk yaok pluh ha. Tuk vak anak tal, hajan ia sua ti kuhria mboh dahlau lac biak kan kanhdah, mbuan ngak brei metai, lahik drap ar di bhap bini . Dalam tuk bruk peih phun jien bayar taneh hu karja mek veik di Đắk Lắk biak suai damuai  mbuan ba tal lahik phun jien.

Sở jalan mbak ban raya HCM kuhria mboh dahlau lac dalam 30 thun anak tal, ban raya njauk pandar labaih 21.000 tỷ đồng buh tame ngak brei patagok dom kein lagaih di 110 jalan kraong, ribaong atah abih tih 1.000 km di ban raya. Meng urak ni tal thun 2050, 6 danak dak pabah lamnge, 5 jalan pambuak labik timur ban raya tal dom pambah lamnge di mangaok kraong Đồng Nai, 4 jalan meng dalam ban raya tal pambah lamnge Hiệp Phước hu buh brei jien dahlau piah ngak ka nyu samu gauk saong patagok bruk pambuak gauk. 5 thun jaik di ni, taong abih yaom jien ka dom danak dak jalan ia bahrau mek hu 1.500 tỷ đồng, samu 5,4% dut saong  labaih 27.200 tỷ jien buh tame ngak jalan mbak.

Anak bruk yaom padai dang di tanut glong song tui kuhria mboh thun ni ia ndik bier, Hậu Giang brei dui atah tuk vak tam drak bilan  padai  Thu đông tal abih bilan 9 ni, ngan song taneh tam drak tagok labaih 3.000 ha dut song bruk batabiak . Tapa kuhria mboh di gah  ngak nong  tỉnh, bilan padai  Thu đông thun ni , urang nong  Hậu Giang trun pajaih  labaih 41.700ha, song tui kuhria mek hu labaih   232 ribau tấn, tagok labaih  19 ribau  tấn dut song bruk ba tabiak.

Pambuak tal bruk njom ruak jit aik traoh anek pabui châu Phi di xã Khánh Thuận (huyện U Minh), UBND tỉnh Cà Mau pato tacei Sở ngak nong saong patagok palei pala saong dom gah pambual tal patagok dom bruk daong, tacei pato peih ngak dom jalan pacang caga jit ruak yau ye: pasang iek catang bhum hu sruh jit, oh caik brei pambak tabiak praong, pasang iek asal pajeih pabui njauk ruak, khan brei urang jaka di dom tỉnh hu pambuak tal piah pambuak gauk pacang cakak. Langiu di nan hu jalan pasang iek radieh pajeng pabui saong pandap hu ngak meng pabui tame tabiak bhum hu jit ruak.

Rajaei Nga bahrau mbaoh tangin tame sa  thỏa thuận hong dom công ty Ấn Độ piah pambuak bruk ngak tabiak  300 triệu liều vắc-xin Sputnik V yaok thun. Urak ni hu labaih  20 negar khin blei labaih sa  tỷ liều vắc-xin kayua Nga ngak tabiak. Puac bilan  8 meng bloh, Mintri  Y tế Nga hu brei adat ka  Pasak  Ga-ma-lây peih ngak dom roh duah hadei di tuk tut angan vắc xin, tui kuhria dom roh duah hu peih tabiak ngak dalam adit ni.

Nhà Trắng bahrau hu panuac khan lac Mỹ meda oh hu mbaok tame sa sáng kiến dunya piah cak rok patagok, ngak tabiak saong parabha samu vaccine kayua gah Y tế dunya (WHO) ba akaok. Urak ni labaih 170 negar daok ginum biai piah hu mbaok di dunya vaccine Covid-19 (Covax) piah jhul samar bruk cak rok patagok vaccine, ginup prien ka taong abih dom negar saong parabha nyu nao tal dom kapul bhap bini mbuan njom glaong abih. Meng bilan 4, Mỹ tabiak panuac lac padieh pabak kadung jien ka WHO saong harei 7/7 peih tabiak bruk ba Mỹ tabiak truh WHO.

Dom hãng tong yaom bruk brei mesraiy  song cố vấn kinh tế ka rajaei Lào hu panuac lac pok jien sre di negar ni yam tapa tanut kan kandah song mbuan si oh bayar hu. Tui Financial Times, khik piah  ngoại hối di Lào dok  864 triệu USD min, dalam tuk sre njauk bayar di negar ni meng ni tal puac thun 2024 lac labaih  1 tỉ USD/sa thun. Dalam bilan 8, Akaok mintri jien padai  gam lac  Phó thủ tướng Lào Somdy Douangdy pathau khan anak Quốc hội lac pok jien sre di negar ni meda tagok 65 - 68% GDP dalam thun 2020 kayua kadung jien pakat negar trun (labaih  696 triệu USD), gam song sre tagok  kayua jit ruak  Covid-19./.

Urang lang: Hani Pha – Thu Thảo – 03/09 16:16:09