Ia daok tagok di bilai hải văn Vũng Tàu

Sarak ka bruk padang karja đô thị di ban raya HCM bahrau hu Quốc hội njauk hatai brei tapa ngan saong 420 dalam 428 urang hu mbaok njauk hatai (meblah 87,14% dalam abih tih urang Quốc hội). Tui nan, Quốc hội brei adat ka ban raya  HCM oh padang HĐ bhap bini quận, phường meng thun 2021. TPHCM jeng hu adat piah padang ban Thủ Đức meng akaok thun hadei. Sarak ini hu ba tame pandar meng harei 1/1/2021 saong bruk padang karja đô thị hu ba tabiak ngak meng harei 1/7/2021.

Gah Xuất bản Đại học Sư phạm Hà Nội saong gah XB Đại học Sư phạm TPHCM, kapul ngak tapuk pato bac Tiếng Việt 1 bộ Cánh Diều, bahrau brei thau harak ramik veik baoh tapuk ini piah mek panuac di bhap bini. Harak ramik veik nan hu 12 blah ngan saong 2 kadha praong, yaih khan dom kadha piah ka cei gru, nai gru meda pandar salih ka dom kadah bac ka oh lagaih saong pato tacei rami ramik viek dom kadha dalam tapuk. Dalam harak ramik veik nan, gah XB hu ba tabiak 11 kadha hu pabak ka 11 kadha mboh lac oh lagaih bo mintri pato magru ieu kakei rami ramik veik, jeng hu rilo bruk njauk ngak pasiam pambuak tal dom kadha dalam tapuk bac. Rilo akhar njauk taong yaom lac ka oh lagaih njauk yah klak, salih bahrau.

Tui gah kuhria mboh dahlau bruk langik tasik Việt Nam, mboh yau ia daok tagok di bilai hải văn Vũng Tàu. Tui kuhria melam ini (16/11) tal mesup 17/11, ia tagok glaong di abih, mbuan dauk di dom labik biar di dom ban tapen tasik dalam bhum Đông Nam bộ yau TPHCM, Tiền Giang, Bến Tre, Sóc Trăng, Trà Vinh, Bạc Liêu, Cà Mau. Tukvak dauk dalam di abih meng mon 1 tal mon 4 saboh saong meng mon 3 biar harei tal mon 7 melam. Tui kuhria mboh, ia tapen tasik Nam bộ tagok glaong di abih dui atah tal harei 19-11. Meng harei 20-11, ia meng trun veik. 

Pasak khik ramik buh jien tame saong ngak thủy lợi Lâm Đồng brei thau binek thắng cảnh danao Tuyền Lâm (ban Đà Lạt) daok rahtabiak bruk njom ia oh siam, ngak kan kandah tal bruk salamat di danak dak. Tapa pasang iek, di mangaok tabung hạ lưu binek rahtabiak dom inem mek njom tui jalan atah di binek, ia tathuak tabiak ngak pathak hạ lưu praong jang tanut brei adat. Mbaok binek jeng njauk glut jalieh, rahtabiak bruk ra-ai, talah. Binek caik ia Tuyền Lâm hu ngak meng dom thun 1980, rami ramik ngak pasiam tathuak ia sua di thun 1997. Ni lac binek ia taba praong abih di ban Đà Lạt praong jaik 28 triệu m3, pabak ka bruk pruh ia ka labaih 2.400 ha taneh pala drak di bhum gah ala.

Tal kreh melam 16-11, hadei di labaih 3 mon kuhria meng tuk bala radaih paoh gauk di angaok jalan TP.HCM - Trung Lương, gah CSGT jeng oh ka nao tal labik nan hu kayua radaih gar bak sre jalan dui atah tal labaih 10km. Melam bloh, angaok jalan cao tốc ini gar jalan dui atah labaih 10 km di angaok jalan meng gah Long An mai TP.HCM kayua rilo radaih ginuh gauk di labik Km13, lac labik nao tapa huyện Bến Lức, Long An. Hu 6 sruh radaih gaok bala, lac 3 radaih pajeng pandap, 3 radaih 5 labik daok.  3 radaih dalam bala nan khut biak khang. Hu dom menuac dalam radaih ôtô 5 labik daok njauk rambus njul hu dom urang karei ba tabiak truh radaih chip saong hu siam mekre, salamat.

Sa sruh jit hu 17 urang njom Covid-19 bahrau hu jabat y tế bang gah maraong Australia brei thau di dah page ni (16/11) ngak suh sah ka rajaei Australia dalam tuk dom tinh, ban di negar ni daok peih pabah mbang negar tui jalan meng urak ni tal harei Giáng sinh. Rajaei Australia brei thau daok caga ba bol lin liên bang nao daong ka bang Nam Australia padam jit. Dom sang bac saong labik pablei salih njauk gam pabang piah ngak hacih saat pacang caga jit saong pacang cakak jit ruak njom pambak. Mintri Y tế Australia Greg dah page ni jeng brei thau pasak cang caga bala pakat negar hu caga daong ka dom jabat gah maraong Australia piah duah dom urang njom, daong pacang cakak jit njom pambak tabiak rahra mbang camriep di bang ni meng bilan 4 tal urak ni.

Rajaei Hàn Quốc brei thau bruk patagok pasang iek dom sang bac pato pasram pakacah saong labik pato bac caga pakacah dahlau di mbang pakacah đại học quốc gia, tui kuhria hu peih tabiak di harei 3/12 tal. Tui nan, Mintri Pato Megru saong karja dom tỉnh ban brei pasang iek dom sang bac nan meda ngak catang tui dom jalan pacang caga jit halei oh. Gam haong nan, hu khan brei thau jalan talei phone pandiak piah ka bhap bini khan brei thau dom labik tamuh jit ruak, ba tabiak panuac kakei tal dom sang bac pato pasram pakacah saong labik pato bac caga pakacah oh peih dom tal bac tapak meng harei 26/11 piah khik caga siam mekre prein yava anek saih dahlau di harei pakacah.

Mintri Quốc phòng Nga daok padang 1 pasak caga bruk pahla di rilo gah daok di Stapanakert, pasak di labik rahtabiak bruk mesuk gauk (Nagorny – Karabakh). Bruk ni tui kuhria hu ngak salah di harei 20/11 anak tal saong hadei di nan, pasak ni meda tame ngak dom bruk ngak pahla hu jao brei. Langiu di nan, pasak ngak bruk pahla ini meda hu paglaong kapul jaka đặc nhiệm di mintri ka bruk samar drak di Nga, jeng yau dom kapul saong pandap panda di jabat Biên phòng di gah An ninh Liên bang Nga (FSB) saong dom urang lambaok di rilo jabat kanja karei./.

Urang lang: Thu Thảo – M. Phương – 16/11 10:33:02