Dom urang pal akaok hu sangka iek glang tal urang bangsa dalam tỉnh 

Gam saong bruk chreih chrai uan raok Kate rah tabiak meng harei 15/10 mbiah tal harei 18/10/2020 hu peih ngak tui adat cambat di urang Cam Ahier. Pasak roh duah Ilamu Cam peih bruk parang iek ngan saong kadha “Palei ngak meng kan” di urang Cam Ninh Thuận piah khik ramik saong patagok makna di drap ar ilamu meng kan di bhap bini Cam pak Ninh Thuận. Ini lac bruk ngak piah yaih khan tal tuai damuai dalam saong langiu tỉnh, dalam taneh ia jeng yau negar langiu piah thau tal sa bruk gheih ngak lan am meng kan mai di palei Bàu Trúc, bruk menyim khan bai meng kan di palei Cam Mỹ Nghiệp, Chung Mỹ ngan saong ilamu ky thuat naih ghieh ngak rilo janih bingula, tui hatai takre ngak tabiak di urang kumei Cam saong bruk ngak jru glai di muk kei meng lavik mai, meng labaih 100 janih jru phun glai ngan saong ilamu bac megru hu dalam raidiuk yaok harei piah ngak jeng paok jru piah iek ruak, nan lac dom bruk ngak hu makna praong glaong saong njauk brei khik ramik. Tukvak parang iek kadha nan tal abih thun 2020.

Huyện Chợ Đồn (tỉnh Bắc Kạn) bahrau peih bruk  brei thau sarak di Thủ tướng Rajaei brei angan xã An toàn khu, bhum An toàn khu dalam dom saman kháng chiến.  Dalam vaktu dahlau di mesruh metak jeng yau dalam bruk mesruh pacang Prang di bangsa, huyện Chợ Đồn haong dom huyện Định Hóa (Thái Nguyên), Sơn Dương (Tuyên Quang) hu jeng ban ini kháng chiến, labik brei mboh bruk ngak di Trung ương Đảng, di Wa Hồ saong dom urang dang akaok yau ye Tổng Bí thư Trường Chinh, Thủ tướng Phạm Văn Đồng, Đại tướng Võ Nguyên Giáp….haong rilo jabat trung ương praong karei karei. Dalam bruk mesruh taong Mỹ daong taneh ia, labik ini daok lac bhum căn cứ praong di hậu phương praong gah barak. Thun 2016, ATK Chợ Đồn hu dak tame angan inem mek pakat negar biak karei ngan saong 25 inem mek sajarah, dalam nan hu tal 6 inem mek pakat negar.

Mentri Pato megru brei thau, Hội đồng thẩm định  peih bruk pasang iek, ngak bruk saong urang tavak tapuk siphau Tiếng Việt tal bac 1 di tapuk Cánh Diều.  Tui bruk caong khin taduan bruk ngak, Hội đồng pasang eik  saong urang tavak hu njauk gauk brei taduan abih dom panuac tangi sua piah pasiam veik tapuk ka nyu lagaih jang. Dom asar kadha dalam tapuk Tiếng Việt tal bac 1 di tapuk Cánh Diều hu brei pasiam, pabak veik piah gru pato meda brei salih dom labik kadha bac ka lagiah saong anek saih tal bac 1, yau kadha “ Arieng, akok saong tapon ikan”, kadha “ Dua drei asaih”, kadha “ Lừa, tapai saong rimaong… 

Brei panuac di nyaom roya Đảng bộ TP Hồ Chí Minh mbang ka XI, vaktu 2020-2025 ka patgaok ban Thủ Đức – ban gah timur ban raya HCM vaktu 2020-2035, ong Nguyễn Thanh Nhã, Yam ndok Sở Quy hoạch saong Kiến trúc TP brei thau, di ban Thủ Đức meda hu 8 pasak salih bahrau sáng tạo. Labik ini daok brei patagok dom công trình angaok Khu đô thị bahrau Thủ Thiêm saong dui pachreih dom bruk gah jien padai. Gam haong nan, lac labik biak lagaih ka dom bruk salih bahrau sáng tạo jaik mbaok ia dalam jalan jaik tal pasak ban urak ini.

Ong Lâm Sách, Akok Mban bangsa tỉnh Sóc Trăng brei thau, dalam vaktu 2016 -2020, dom danak dak, bruk ngak di Danak dak pakat negar patrun kathaot khang kajap di tỉnh Sóc Trăng hu daong phun jien ka bhap bini, daong phun jien dak padang palei pala birau…hu ba mbuan lagaih ka baoh sang kathaot, baoh sang jaik kathaot di dom xã, palei biak kan kandah hu phun ngak mbang cak rok patagok, duah bruk ngak, patagok jien mek tame.  Langiu di nan, sarak patagok kinh tế di tỉnh Sóc Trăng pachreih hu rilo danak dak buh jien tame ngak mbang praong. Abih di nyu, hu 56 danak dak buh jien tame ngak di dom xã bhum 3, labik kinh tế - xã hội biak kan kandah ngan saong phun jien buh tame labaih 11.286 tỷ đồng. Dom danak dak nan dalam bhum hu rilo urang bangsa takik ba bruk ngak ka urang daok labik nan, patagok jien mek tame ka bhap bini.

Harei ini di New Zealand rah tabiak bruk tổng tuyển cử piah pilih ruah 120 nghị sỹ Quốc hội. Min labaih meteh dom cử tri oh cang tal tukvak buh phiếu chính thức bo brei thau hatai caong di drei tapa bruk buh phiếu aval. Panuac khan meng Ủy ban bầu cử New Zealand brei mboh, kuhria tal 16/10, urang buh phiếu aval di taneh ia ini hu tal 60% cử tri. Hu 2 makna ba tal bruk nan, lac kayua jit Covid-19 ngak ka rilo cử tri khin nao buh phiếu aval piah plaih bruk njom Covid-19 di dom labik bầu cử. Bruk rilo cử tri nao buh phiếu aval jeng brei mboh, rilo menuac khin buh phieu ka urang drei takre bo oh cang tal bruk ndom puac mek janeh gauk puac di abih.

Trung Quốc hu peih sa bruk parang iek đặc biệt ka pacang caga jit Covid -19 di ban Vũ Hán, tỉnh Hồ Bắc lac labik khat lahik trak kayua bruk tamuh jit virus SARS-CoV-2 birau. Parang iek dui atah dalam 3 bilan, parang labaih 1.100 blah rup thaot saong 1.000 pandap panda. Langiu di nan, khol drei meda hu iek dom video gam dom danak dak pandar công nghệ ảo piah thau cambaic laic jang ka bruk pacang caga jit Covid-19 biak glaih glar di Trung Quốc.

Gah pablei to yaom Christie's di Mỹ brei thau, bản sao di baoh tapuk Tuyển tập kịch camereip abih di đại thi hào urang negar Anh William Shakespeare angan "First Folio" hu pablei di harei 14/10 yaom 9,97 triệu USD dalam mbang pablei to yaom di ban New York (Mỹ), lac yaom glaong bahrau abih ka sa kadha văn học. Yaom ini glaong jang kuhria dahlau lac meng 4 tal 6 triệu USD. Tuyển tập kịch nan hu in di thun 1623, hu 36 vở kịch. Baoh tapuk ini bhian hu lac kadha văn học praong abih hu vak meng sap Anh. /.

Urang lang: Ái Nghiêm -Mousaphuong -17/10