Sang kan kathaot hu daong limo pajaih oiah cak rok patagok kinh te

Gam brei tapon pabe mbang hareik, sa-ai Sang, palei Chrơng 2, xã Đăk Ta Ley, huyện Mang Yang gam bui sambai khan ka bruk kham merat yam tabiak truh kathaot di baoh sang drei. Sa-ai Sang brei thau, sang sa-ai hu 2 ha apuh, min rilo meng pala bei plom saong padai puh, nan ye rilo thun jeng oh tapa truh eik lipa, rai diuk yaok harei jeng gaok biak rilo kan kandah, kurang anak kurang lakuk. Thun 2018, diuk pasang sa-ai Sang hu UBND xã alin brei 2 drei pabe menek. Jaik 2 thun raong glang, urak ini baoh sang sa-ai hu tapul pabe 8 drei. Meng hu urang jakar ngak nong xã pachreih ba, tacei pato, sa-ai Sang khang hatai mesre phun jien di gilang pariak sarak karja piah pala 1 ha cà phê. Sa-ai Sang brei thau, hadei di rilo thun kham merat, puac thun 2020 ini, sang sa-ai Sang tabiak truh kan kathaot: “Karja hu daong ka baoh sang piah yam tagok tabiak truh kan kathaot. Dom thun dahlau, karja hu daong brei 1 yau pabe menek. Thun ini menek hu jaik 10 drei. Baoh sang biak bui sambai, hu pabe blaoh ye pala bời lời, padai, cà phê tra piah tapa truh hu kathaot, patagok kinh tế ka nyu siam.”

Gia Lai hu jaik sa meteh bhap bani lac urang bangsa takik, rilo meng lac urang Jrai saong Ba-Na. Thun 2015, baoh sang kathaot di tỉnh lac 19,7%. Dahlau di nan, hu labaih 40% baoh sang kathaot lac urang bangsa takik. Kayua yau nan ye, bruk patrun kathaot bhap bani bangsa takik ini tuk halei jeng hu Đảng bộ, karja palei ba tabiak ngak dahlau. Dalam 5 thun meng 2016 tal ini, taong abih phun jien peih ngak danak dak pakat negar ka bruk patrun kathaot khang kajap di tỉnh lac 1268 tỷ đồng; Tỉnh uỷ Gia Lai ba tabiak Sarak ka 05-NQ/TU harei 12/4/2017, ka bruk patrun samar saong khang kajap baoh sang kathaot dalam bhap bani urang bangsa takik tukvak 2017-2020 saong pamong tal thun 2025. Tui nan, dom danak dak patrun kathaot dalam danak pataom tame daong ka baoh sang kathaot padang ngak sang danaok, salih phun pala, athur raong, paglaong rai diuk, paglaong pasiam bruk iek glang prein yava … Meng pablak tame siam dom danak dak, dom xã dahlau diah biak kan kandah, bruk patrun kathaot urak ini jeng mboh hu siam. Ong Lê Văn Cửu, akaok UBND xã Ia Dreng, huyện Chư Pưh brei thau: “Meng yaok phun jien, khaol dahlak hu daong ka mikva salih janih phun pala, palagaih ka mikva mesre phun jien patagok kinh tế, raong limo, raong pabui. Tal urak ini khaol dahlak daok 102 baoh sang kathaot, lac 6,71%.”

Amuk Rơcom Sa Duyên, Akaok Sở Lao động Thương binh saong Xã hội tỉnh Gia Lai brei thau, tui kuhria tal puac thun 2020, baoh sang kathaot di tỉnh Gia Lai daok oh ka tal 4,5%, abih di nyu lac sang kathaot dalam bhum urang bangsa takik tui kuhria daok oh ka tal 6,25%. Kadha njauk ndom nan lac, tal urak ini, taong abih dom baoh sang sarak karja kan kandah di tỉnh, jeng hu tabiak truh kathaot abih. Tui amuk Rơcom Sa Duyên, dalam tukvak anak tal, dom puk palei njauk patui veik sangka piah ka bhap bani oh kathaot gilac veik:“Baoh sang jaik kathaot saong baoh sang kathaot daok gaok rilo kan kandah. Dom baoh sang ini mbuan laik tame kathaot veik. Sở bhian pachreih, kakei dom puk palei sangka tal 2 nyaom urang ini, patui veik peih ngak dom sarak piah daong ka baoh sang kathaot patagok bruk ngak mbang, patagok jien mek tame, tabiak truh kan kathaot khang kajap jang.”

Meng dom kham merat di taong abih hệ thống chính trị di puk palei, bruk patrun kathaot dalam bhum urang bangsa takik di Gia Lai daok hu siam lagaih, ngak brei salih bahrau rai diuk di bhap bani, abih di nyu lac di dom bhum atah bayah./.

Urang lang: Jasi – 25/11