Giải thưởng TNVN lac pok angan dom urang hu rik daong praong ka angan VOV

Ong Nguyễn Thế Kỷ - UV TW Đảng, Tổng Yam ndok Rayo sap ndom VN brei thau, Giải thưởng TNVN lac giải di VOV, min asal di nyu jeng lac bruk hu iek praong, dang akaok. Dom urang ngak báo di VOV nao pakacah Giải Báo chí pakat negar haong dom ayut sahabat dalam taneh ia jeng mek hu rilo jak jeng, urak ini hu ba gauk tame pakacah di Giải thưởng TNVN.

Ndom ka dom kadha mek hu giải mbang ini, Ong Nguyễn Thế Kỷ - Tổng Yam ndok Rayo sap ndom taong yaom : “Thun ini, dom kadha mek hu Giải thưởng TNVN hu asal glaong jang duk saong 3 mbang dahlau. Ini lac bruk tui jalan nao gam haong bruk cakrok khang kajap di VOV dom thun tapa. Daok ndom ka gah asal kadha, dom kadha mek hu Giải A, Giải B lingiu di bruk ruah asal kadha gheih bo daok thau duah jalan ngak siam. Ini lac bruk hu kapul pilih ruah dhi puac abih taong yaom biak glaong tuk pasang iek. Daok gah kỹ thuật, sahneng duah atau kadha roh duah di urang vak saong kapul urang vak jeng ndung bak bruk ba pandar, abih di nyu nan lac ba pandar pak di VOV yau habar. Ngan saong dom nghệ sĩ, kol dahlak caik hatai dahlau tal dom menuac bahrau piah pachreih dom urang daok ranaih buh prein yava tame saong khang takai yam angaok jalan nghệ thuật”.

Kadha ngak jeng bruk biak karei di Giải thưởng TNVN lac pok angan dom urang hu rik daong praong ka angan VOV. Giải thưởng hu pok brei dom urang vak, dom kapul urang vak hu kadha biak gheih gah báo chí, văn học nghệ thuật, kỹ thuật, công nghệ, roh duah ilamu, dom urang papar sap, urang ba danak dak biak gheih, dom kapul, dom urang dalam gah paneh kadha, parang me-in. Giải thưởng pok meyaom, pachreih bruk sahneng duah, salih bharau piah paglaong ilamu ngak bruk brei thau di VOV.

Giải thưởng TNVN thun ini hu 5 janih, lac: Papar sap, Papar binguk, Báo in; Báo Điện tử; Kadha roh duah ilamu, sahneng duah salih bahrau hành chính saong Giải thưởng brei kapul nyaom, menuac urang lac nghệ sĩ paneh kadha, parang me-in, urang papar sap, urang ba danak dak.

Di tuk jao giải, Tổng Yam ndok TNVN hu pok Giải A brei 4 kapul urang gheih abih dalam dom gah papar sap, papar binguk, Báo in-Báo Điện tử và Công trình roh duah ilamu, sahneng duah salih bahrau hành chính. Kadha papar sap mek hu giải A lac kadha vak “Cao su Sơn La: tuk bruk ngak biak karei jang Sarak” di kapul urang vak: Phạm Xuân Thọ, Hà Thị Thu Thùy – jabat lamboak daok di bhum Tây Bắc. Jeng mek hu giải A gah BÁO IN, BÁO ĐIỆN TỬ lac kadha vak: "Vũ khí" jayah Covid-19 di Việt Nam: Jum pataom, anit ranam saong abih drei.

Jeng dalam dom gah ini, Giải thưởng TNVN hu 8 urang saong kapul dom urang hu pok angan haong Giải B. 9 urang haong kapul urang mek hu Giải C. 2 kadha vak: “Gah likuk bruk praong daong ka urang peih kapal haoh lac urang negar Anh njauk Covid-19” di urang vak Trần Thị Kim Dung, lac urang vak di rayo sap ndom VN jabat daok di ban raya hCM hu pok brei giải B. Lingiu di nan daok hu 6 urang hu pok angan tuk mek hu Giải thưởng TNVN dalam gah paneh kadha, parang me-in saong urang papar sap, urang ba danak dak naih gheih.

Ong Nguyễn Thế Kỷ - Tổng Yam ndok VOV brei thau, Giải thưởng TNVN urak ini bahrau hu bruk pataom mbhaok di dom urang jakar, urang ngak dalam Rayo. Min anak tal, giải meda peih praong jang, ba TNVN jeng giải thưởng di gah Papar sap-Papar binguk dalam taneh ia. Piah peih praong hu Giải TNVN brei hu bruk dui pachreih dak harei dak tagok meng kadha tal asal di nyu, dalam nan hu yaom glaong di dom giải thưởng./. 

Urang lang: M. Phương – 08/09