Dah page ini 3/11, Akaok Quốc hội Vương Đình Huệ saong Thường trực Ban Bí thư Võ Văn Thưởng dang akaok mbang Ginum biai online dalam negar ba tabiak panuac tamat ka 19-KL/TW harei 14/10/2021 di Mintri Chính trị saong Danak dak pamaong tal Danak dak padang ngak hukum tukvak Quốc hội mbang XV. Dalam panuac Tamat ka 19, Mintri Chính trị brei thau lac, jalan ngak di bruk padang ngak hukum tukvak Quốc hội mbang XV lac: ngak pasiam samu gauk jalan cak rok patagok, padang khung khổ pháp lý, peih ngak jak jeng bruk cak rok patagok kinh tế - xã hội tukvak 2021 - 2025, 12 jalan cak rok patagok taneh ia, 6 bruk ngak praong saong 3 đột phá jalan ngak hu Nyaom roya mbang XIII di Đảng ba tabiak. 

  Kuhria tal mesup ni, dalam negar klauk hu labaih  84 triệu mbang  vắc xin, dalam nan hu  24 triệu urang klauk ginup  2 mbang,  bruk klauk jru hu labaih  80% urang meng  18 thun hu klauk  1 mbang  vắc xin, 34% klauk ginup  2 mbang, Hu 10 tỉnh ban klauk  vắc xin hu labaih  95% urang meng  18 thun, 9 tỉnh ban hu  50% dom urang meng  18 hun tagok  hu klauk ginup  2 mbang.

Taong yaom  ka mbang jit ka 4, Mintri Y tế brei thau dom urang njom yam tapa yaok bruk kuhria mboh dahlau, ngak kan kandah trak tal raidiuk, prein yava di anek manuac, ba tal padeih bruk ngak saong jalan ngak mbang duah jien, hatung hatian di bhap bini. Taphia di bruk tacei tabiak 5 paka oh lagaih dalam bruk pacang caga jit mbang ini, Mintri Y tế mboh lac, makna di dom bruk oh lagaih, taphia di chủng Delta lac chủng bahrau, njom mbak samar, bruk klauk jru di akaok jit biak bier, vắc xin pagam pambak tame bruk blei di negar langiu…, daok hu bruk iek lap, oh caik hatai tal tuk ka oh hu jit atau tuk jit nao tapa bloh.  Min dalam tuk hu jit ye duh hatai, huac kanda.  

  Công an huyện Hàm Thuận Nam, tỉnh Bình Thuận brei thau bahrau pambuak bruk song gah chức năng pasang iek bruk  2 phun lim taha  100 thun  di Tiểu khu 272, dalam labik khik ramik langik tasik Núi Ông njauk kaoh jaleih. 2 phun lim hijao njauk kaoh jeng rilo mbaik sit. Tapa yaok pataom, kapul pasang iek brei thau abih tih kayau nan jaik 6m3. Dalam nan urang palai glai hu pajeng tabiak truh labik nan  6 mbaik kayau  atah meng  1,4m tal jiak  7m song đường kính di kayau  meng  5 tấc meteh tal 7 tấc meteh. Ni lac pajaih lim hijao  quý hiếm, dok dang anak bruk jiak lihik abih .

Hồ Thanh Minh bhian hu ndem tal biak rilo dalam kapul caoh mbanh U23 Việt Nam tuk saau lac urang caoh blaong bangsa takik biak takik hu dalam kapul. Meng bàn thắng caoh tame halam U23 Myanmar  di melam blaoh, angan Hồ Thanh Minh hu ndem tal yau sa người hùng daong brei kapul di HLV Park Hang Seo mbang ka 4 gam gam yam tapak tame Dhi chung kết U23 châu Á. Di mbang caoh ini, tiền đạo umo 21 thun palei daok di xã A Đớt, huyện A Lưới, tỉnh Thừa Thiên Huế hu ba chreih chrai ka hàng công U23 Việt Nam meng jalan main naih gheih, sami samar.

Hãng jru  Mỹ Pfizer cong lac jien mek tame meng  vaccine pacang Covid-19 hu labaih 36 tỷ Đô la dalam thun 2021, tagok  2,5 tỷ Đô la dut song tui kuhria dahlau di nan. Yam ndoc điều hành Pfizer, Albert Bourla brei thau , Pfizer ngak tabiak  2,6 tỷ mbang vaccine song hu pajeng  2 tỷ mbang tal  152 taneh ia song bhum taneh. Hãng dok dalam tuk vak ngak tabiak  3 tỷ mbang vaccine meng ni mbiah tal puac thun. Bruk Pfizer brei thau yaom jien mek tame di drei dalam tuk  vaccine di  hãng ni tui kuhria samar hu brei adat pandar ka uranaih meng 5 tal  11 thun di Mỹ.

Gah Y tế dunya (WHO) harei ini hu panuac ieu cak rok patagok samar drah vaccine caga liên cầu khuẩn nhóm B (GBS) – lac makna ngak ka jaik 150.000 uranaih metai di dunya yaok thun. Mayah oh hu taong ruak, GBS meda ngak ka anek kaman njauk ruak viêm màng não, nhiễm trùng darah saong meda ba tal metai. Anek kaman njom khuẩn mayah oh metai ye meda njauk matai glo atau meta maong iek oh cambaih saong gaok dom bruk gah tangi pang. Pathau khan jeng brei thau lac vi khuẩn ni yaok thun ngak ka labaih 40.000 anek kaman patrun thần kinh.

  Labaih 30 rabau menuac tut angan saong hu brei tame negar salamat Covid-19 tui Harak passport Thái Lan meng di tuk taneh ia ini peih pabah mbang veik. Ta-eng dalam harei 1/11, harei camereip tuai tal  Thái Lan oh brei daok karei, hu abih tih 61 mbang par gam saong labaih 6.600 tuai tame Thái Lan. Tui kuhria meda hu jaik 726 rabau tuai nao kapal haoh dalam bilan 11 ini, nan lac hu jaik 24 rabau menuac yaok harei.  Akaok Mintri Y tế Thái Lan Anutin Charnvirakul ndom lac, dut iek Covid-19 lac bruk brei ngak ngan saong abih tuai tuk mai tal Thái Lan saong urang hu nao mai tui hatai hadei di tuk mboh lac âm tính./.

Urang lang: Thu Thảo & H.Pha -3/11/2021