Greih camin ngak kaya meda di urang nong Khmer Vĩnh Long

Meng kham merat ngak mbang, pandar cai kali kalih, piah hu jien patak pataom hadei di rilo thun ngak pah saong hu karja daong, ong Thạch Ba, urang nong bangsa Khome di huyện Vũng Liêm, tỉnh Vĩnh Long hu yam tagok patruh kathaot, ngak kaya meda saong raong dom anek nao bac tal labik tal dhua. Dalam kadha “kreih camin paplei negar “ harei ini, daa mikva saong grauk yut pang kadha vak di Quốc Dũng vak angaok báo Nhân dân yaih khan ka kreih camin ini :

Taduan raok kol dahlak dalam baokh sang barau padang praong laneng di palei Trung Trạch, xã Trung Thành, huyện Vũng Liêm, tỉnh Vĩnh Long, ông Thạch Ba oh padauk hu hatai haiem phuan. Urak ini sang ong hu tapol limo menek yaok thun yau nan ye sang saai oh daok nduac lisei, ao, brah, jien yaok harei. Hadar tal dom harei bilan kan kandah, ong Thạch Ba drut drui. Tuk nan, diuk pasang ong hu tuk nao klaak palei, tagok tal ban raya HCM, Binh Duong ngak cong nhan duah mbang. Hadei di dom thun ngak mbang glaih glar, patak pataom jeng oh hu hadom, nan ye diuk pasang ong mai veik puk palei. Sa baoh sang tak hala sit hu padang tagok di taneh amaik ame. Tuk nan hu amaik ame parabha brei 4 công taneh, diuk pasang Thach Ba uan tabuan lô. Ong ginum saong diuk, mek dua cong taneh ngak hamu piah hu brah mbang trei hatung, daok dua cong ngak bein piah hu jien mek tame. Mek katut raong atah, bein barau hu ong pala pablak dom janih njam patam, baok kraoh katut harei piah samal ba tabiak darak pablei, hu jien iek glang bein phun mbang baok. Mboh diuk pasang Thạch Ba tari taring ngak mbang, danakdak Heifuer daong brei yau limo menek. Nan jeng lac tukvak ngak salih raidiuk di diuk pasang urang Khmer kathoat ini.

Ong Thạch Ba khan lac: tuk taduan mek hu yau limo, diuk pasang dahlak uan haok ia meta. Hu jien kol dahlak ba tangin tame ngak saong parabha bruk dalam sang. Dahlak ngak bein, glang iek dua drei limo, thun hadei menek hu dua drei anek. Diuk dahlak iek glang hamu saong sang danaok. Anek likei praong mboh sang kan kandah rilo nan ye klak bac daong sang. Yau nan min, dalam palei, dalam xã thei pah hagait kol dahlak ngak nan, duah jien hu du halei siam du nan”

Phun hu blaoh nan lac yau limo menek hamiat yaok thun gam daong Thạch Ba patagok tapol limo, gam pablei limo anek mek jien raong anek nao bac. Kathaot min kham merat brei ka anek nao bac, Thạch Ba pachreih 3 urang anek daok veik pakacah gam tame dai hoc. Ông Thạch Ba daok brei thau lac: “ dom anek sit urak ini bac tal labik tal dhua, dua dalam 3 urang anek bac tamat hu bruk ngak di huyện Vũng Liêm. Daok anek kamei taluac daok cang bruk ngak lagaih. Baok sang barau padang ini jeng meng raong limo bo hu .

Bí thư Đảng ủy xã Trung Thành Trần Công Khanh brei thau, Thạch Ba lac urang nong joi, tari taring saong thau ngak kaya meda. On lac kreih camin hadah ka bruk kham merat yam tagok tabiak truh kathaot saong ngak kaya meda dalam bhapbini urang Khơme di puk palei./.