Dom urang ruak bhian hu mai iek ruak di Sang iek ruak đa khoa Ninh Phước, tỉnh Ninh Thuận jeng daok caik dalam hatai dom siam mekre ka bác sĩ Lâm Văn Trạch, urang gru jru bangsa Cam biak abih hatai dalam bruk iek glang pren yava ka bhap bani puk palei, abih di nyu nan lac urnaih bangsa Cam.

Bác sĩ Lâm Văn Trạch, Akaok khoa nhi – Sang iek ruak Đa khoa Ninh Phước, tỉnh Ninh Thuận, thun ini umo 41 thun,  lac urang hu mikva Cam anit ranam, abih hatai jia tui dalam luac jaik 15 thun tapa. Bác sĩ Lâm Văn Trạch menek tabiak dalam sa baoh sang ngak nong bangsa Cam kan kathaot di huyện Ninh Phước, hu tal 9 adei sa-ai. Yaom lac rai diuk  kan kanda, rambah rambup min amaik ame sa-ai patak pataom ka anek di drei hu nao bac tal labik tal dua. Ta-eng sa-ai Trạch meng sit mai hu hatai caong jeng bác sĩ, iek ruak ka mikva dalam palei, abih di nyu nan lac dom uranaih, sa-ai kham merat piah hu tame bac Sang bac Đại học Y Tây Nguyên. Dalam luac tukvak daok bac megru, sa-ai hu ba tabiak jalan bac ka drei nan lac chuyên ngành Nhi.

Thun 2002, hadei di tuk bac tamat, bác sĩ Lâm Văn Trạch mai ngak bruk pak bộ phận hồi sức cấp cứu nhi di Sang iek ruak đa khoa Ninh Phước – labik ini lac labik siam piah ka bác sĩ Lâm Văn Trạch ba abih pren yava di drei tame bruk ngak, paglaong ilamu chuyên môn saong năng lực iek ruak ka uranaih. Ralo urang njauk ruak trak hu bác sĩ Lâm Văn Trạch pambuak haong dom bác sĩ, điều dưỡng nhi khoa daong pasiam ruak.

Thun 2007, bác sĩ Trạch tốt nghiệp Thạc sĩ chuyên ngành Nhi khoa pak sang bac Đại học Y dược, Bal raya Hồ Chí Minh. Thun 2011, sa-ai hu Ban Giám đốc Sang iek ruak pok ngak Akaok khoa Nhi. Dalam angan Akaok khoa Nhi, sa-ai hu ralo jalan ngak bahrau daong ka bruk iek ruak di Khoa Nhi saong di Sang ruak hu siam jang. Bác sĩ Trạch hu daong ka ralo uranaih njauk ruak trak klah di metai, dalam nan njauk ndom tal kamuan Phú Ngọc Tuấn, umo 8 bilan daok di palei Hiếu Thiện, xã Phước Ninh, huyện Thuận Nam, tỉnh Ninh Thuận tame sang iek ruak tuk pandiak glaong livik harei, var drei jan, handoh cako. Mboh biak mbuan metai. Hadei di tuk pasang iek saong ngak dom xét nghiệm, bác sĩ Trạch mboh lac kamuan viêm phổi, hen suyễn. Hadei di 2 adit tame sang iek ruak, adei Phú Ngọc Tuấn hu siam ruak. Abih ruak, kamuan Tuấn hu ba mai sang dalam bui sambai di amaik ame saong bác sĩ Trạch.

Ndom tal bác sĩ Lâm Văn Trạch, bác sĩ Lưu Ngọc Lai, urang dahlau diah pan Akaok Sang iek ruak Đa khoa Ninh Phước, tỉnh Ninh Thuận lac: Bác sĩ Lâm Văn Trạch tuk halei jeng ngak siam bruk di drei, abih hatai haong bruk ngak, abih drei daong ka adei sa-ai đồng nghiệp, ngan haong urang ruak ye bác sĩ biak abih hatai tui iek.

Meng dom rik daong ka bruk iek glang, khik caga pren yava ka uranaih, bác sĩ Lâm Văn Trạch taduan mek hu ralo harak pok meyaom di gah y tế saong tỉnh Ninh Thuận./.