Sa var page mesup, dalam tal bac di Pasak raong pato, pasiam chức năng bán trú ka urang njauk jru mek klik kruac tỉnh Gia Lai, anai H’Khuin saong 20 anek saih daok pasram bac. Tal bac ini, hu adei tự kỷ, hu adei tangaoh, adei taglaoh, atau nao mai kan kandah, min tui anai gru H’ Khuin, taong abih jeng hu hatai siam, hadah hadai, njauk hu anit ranam, iek glang yau dom anek naih siam mekre karei karei.

5 thun dahlau, tuk mai taduan tal bac, anai H’Khuin  rilo mbang khin klaak pato, kayua dom adei  bac bloh var anak, var likuk. Rilo tuk daok bac, dom adei puac pareo, jan pandap panda, hu adei daok nduac mai taong anai tra:

“Tuk bahrau tabiak pato, drei biak huac, oh thau ngak yau habar. Drei duah thau cambaih laih bloh drei oh daok huac tra. Hu adei njauk palua, njauk ndom puac bingi pang. Hu adei khin daok kandang sa drei. Thau yau nan bloh, oh daok huac hagait”

Menek tabiak saong praong tagok di palei Choét, lingiu ban Pleiku, meng sit H’Khuin caong jeng anai gru. Saong hatai caong nan hu jeng biak hadei di tuk kham merat bac megru di khoa Giáo dục đặc biệt, sang bac Cao đẳng Sư phạm Trung ương Nha Trang, bloh mai ngak bruk di Pasak raong pato, pasiam chức năng bán trú ka urang njauk jru mek klik kruac tỉnh Gia Lai.

Gam saong bruk pato bac, anai H’Khuin daok gam ngak bruk di urang amaik dalam sang.  Hu tuk njauk palua brei dom adei mbang huak, menei ia ka dom adei. Yaom lac bahrau pato hu 5 thun, kan kandah glaih glat jeng hu rilo, min  jeng hu biak rilo bruk, rilo kadha biak drut drui kan var hu:

“Thun 2013, jaik 40 adei, praong hu, sit hu, harei 20-11, tabiak paik bingu dã quỳ mai alin brei. Thei jeng ba gauk paik bingu jaik daning, adei praong paik bingu glaong jang, adei sit paik bingu di labik biar. Yaom lac bingu nan biak phik, min dom adei jak gauk paik yaok adei sa paok. Tuk nan, drei mboh khin hia, kuac dom adei, kayua dom adei jeng hu hatai anit ani gru yau nan.”

Dalam 5 thun ngak gru pato, gam lac sa urang amaik dalam tal bac di uraniah jaoh jo, bruk kham merat abih drei di anai gru H’Khuin hu dom gah chức năng, Kapul urang njauk jru mek klik kruac tỉnh Gia Lai saong dom amaik ame pok meyaom.  Amuk Nguyễn Thị Yến Nguyệt, tổ 5, phường Thống Nhất, ban sit Pleiku brei thau:

“Hu 4 thun bloh paje. Di labik ini pato daoh, pato tamia, dom cei gru pato cih, anai gru Khuin pato akhar haroh. Dom gru biak caik hatai sangka tal dom adei. Meng nan dom adei hu rilo salih bahrau, thau ndom puac, gaok gauk thau salam, ngak hu rilo bruk yau ye rao panyin jam, puh sang danaok. Dom adei biak bui sambai, ndok nao bac miatt. (cười)”

Mboh saong thau hu dom glaih glar di dom urang jakar, dom gru pato di pasak raong pato, pasiam chức năng bán trú ka urang njauk jru mek klik kruac, amuk H’Nghia, akaok kapul urang njauk jru mek klik kruac tỉnh Gia Lai lac:

“Pato dom urang ini, anai gru brei hu ilamu glaong. Anai Khuin gam hu trách nhiệm, gam hu hatai anit dom kamuan. Ngak bruk di labik ini, dahlak oh mboh anai mbuah kan bo likau padeih, atau likau salih nao labik karei, bo anai biak abih hatai jai, kak kajap haong labik ini”./.