Mbang taom gaok pakat glaong Mỹ - Triều tok rah tabiak dalam 2 harei 27 saong 28/2, min dahlau di nan sa adit, Hà Nội hu ramik pasiam yaok canah jalan. Meng bruk patagok parilo jang dom gom truac hadah tal bruk trang trí hala dok, bingu la, phun cảnh, ngak hacih sa-at jalan dhuan. Hà Nội lac sron mbon, urak ini  hadah tanyak jang, gheih mekre jang. Amuk Nguyễn Thu Hà daok di jalan Lý Thường Kiệt bahrau peih talaih tabung pacang, rami ramik tani tanat pandap panda parang pablei anak pabah mbang sang gam chreih chrai tuk ndom tal bruk dahlau daih dom Tổng thống Mỹ, Thủ tướng Ôxtraylia mai rivang Hà Nội:“Hà Nội lac bal biak sron mbon, dahlau di Tổng thống Đô nan – Trăm ye Tổng thống Mỹ Ô-ba-ma tuk mai tal Hà Nội jeng hu nao mbang pacuk chả di dom  quán tapen jalan. Urang pal akaok dom negar tuk mai tal Hà Nội meda nao menyum cà phê tapen jalan, nao kabak di bờ hồ. Tapa nan brei mboh bruk sron mbon di Hà Nội. Dom urang pal akaok dom negar mai ini mboh biak sahanang hatai saong mboh hu Hà Nội bak ilamo saong sron mbon.”

Piah khik tani tanat ka bruk nao mai, duh ka mbang taom gaok pakat glaong saong dom bruk ngak ngoại giao pagam tal rah tabiak meng harei 26/2 tal 2/3, rilo jalan praong di bal njauk pakauk radaih nao mai yau jalan Đỗ Đức Dục, Phạm Hùng, Trần Duy Hưng, Nguyễn Chí Thanh, Liễu Giai, Kim Mã, Nguyễn Thái Học, Chu Văn An, Điện Biên Phủ, Lý Thường Kiệt, Quán Sứ, Tràng Thi, Phan Bội Châu.v.v. Yau nan min, bhap bani di bal brei ka sron mbon oh mboh kan kandah hagait bo daok mboh hadah mbaok meta kayua hu palih ruah ngak labik taom gaok praong brei ka bruk sron mbon. Ngan haong amuk Lê Hồng Nhung, sa urang daok di phố Ngô Quyền (Hà Nội), yaom lac labik amuk saong anek taco daok njauk pacang meneing bruk nao mai dalam dom harei rah tabiak nyaom biai min dom urang dalam sang oh thei mbuah kan hagait: “Dom harei rah tabiak nyaom biai meda hu rilo manuac urang jang. Saong tuk pakauk jalan, bhap bani nao mai jeng kan kandah jang, min khaol dahlak jeng mboh hadah mbaok meta, bui sambai saong ngak njauk tui dom quy định bo bal ine ba tabiak piah gam haong bal ine ngak brei jak jeng siam mekre nyaom biai pakat glaong Mỹ - Triều, pabak hatai caong di ayut sahabat dunya. Piah dak padang rup binguk di Hà Nội dak harei dak gheih mekre jang dalam meta mong di ayut sahabat dunya saong dak harei dak njauk haong angan bal brei ka sron mbon.”

Langiu di bruk oh mek jien radaih nao mai brei ka urang vak dunya mai ngak bruk, ong Nguyễn Thanh Phong, Akaok ban Tuyên giáo Thành ủy Hà Nội brei thau, rilo palei ngak, dom nghệ nhân, doanh nghiệp di Hà Nội halar hatian meyah khan, duh brei mbang thaoh dom pandap mbang biak karei di Hà Nội tal jaik 3.000 urang vak dunya mai ba tin ka bruk taom gaok pakat glaong mbang ini: “Hà Nội oh mek jien ngan haong urang vak nan lac taong abih wifi saong pandap mbang di pasak báo chí saong du lịch city tour Hà Nội brei thaoh abih. Biak uan tabuan lac tuk Hà Nội tabiak panuac ieu, dom palei ngak, dom nghệ nhân abih hatai pabak brei saong pachreih tui pagap yau phở, yau pacuk, cốm, chả cốm, bánh khúc, gam hu cà phê baoh… Taong abih dom nhà hàng đặc sản nan di Hà Nội halar hatian pachreih tui ngan haong trách nhiệm saong jeng lac kadha vinh dự.”

Tok labaih sa adit piah kuhria caga ka mbang Nyaom biai pakat glaong Mỹ- Triều, bal ine Hà Nội lac angan hu taong abih manuac sia angaok dunya thau tal oh lac tok hu mbaok meta gheih mekre, sron mbon saong ilamu peih ngak siam sa kadha prong pakat dunya bo praong jang nan lac bruk rap ar tuai damuai, piah ka tuai palei atah tuk halei jeng kanal hadar tal sa bal sit sot min bak hatai anit ranam anek manuac./.