Labik ngak jru di sa-ai Hà Thị Thuận

Sa-ai Hà Thị Thuận ndih tapui dalam sa baoh sang hu amaik ngak jru nam, tuk lahei sa-ai tui amaik nao mek phun jru. Thun 2010, sa-ai Thuận njauk ruak sơ gan. Tapa roh duah saong bac megru, thau phun an xoa lac phun jru iek ruak gan, sa-ai Thuận tagok glai duah mek jru mai riak menyum. Min, kayua pandar oh ka njauk yau nan ye ruak di sa-ai oh mboh dhit. Sa-ai oh alah, kham bac megru meng dom urang hu ilamu gah y saong ngak tabiak jru saong menyum. Hadei tuvak menyum jru, sa-ai Thuận mboh prein yawa siam jang, tapa dut iek ruak mboh trun ralo, sa-ai mboh uan sambai. Sa-ai khan lac: “Tuk jru ini tabiak rai, dahlak caong khin dom rang ruak pandar saong dhit truh ruak, oh tagok sang iek ruak praong, sang iek ruak pakat angaok, oh pablei drap ar, sang danaok piah iek ruak. Tukvak anak tal, dahlak caong khin ngak hu rilo janih jru jang piah ngak pahala di dom bhum ceik ngan saong dom urang oh ginup jien padai nao jru ruak.”

Thun 2017, jru cao an xoa di sa-ai Thuận hu Viện Kiểm nghiệm An toàn vệ sinh thực phẩm pakat negar, Viện Công nghệ sinh học saong Cục Sở hữu trí tuệ, Mentri y tế taduan khik brei pandap hu hacih sa-at saong brei Harak ngak tabiak, quyền sở hữu trí tuệ. Cao an xoa dak harei dak hu rilo urang thau tal saong pandar. Piah peih praong bruk ngak tabiak cao an xoa, bilan 7 thun 2019, sa-ai Thuận hu padang HTX ngak jru Uyên Thuận saong roh duah tabiak rilo janih jru yau: Cao gắm, cao bổ máu, te an xoa, menyek meng plang, jru pao akaok, pandap tauk kalik mbaok...HTX daok hu taneh pala phun an xoa di dom xã Huy Bắc, Bắc Phong huyện Phù Yên saong huyện Tân Sơn tỉnh Phú Thọ, praong 20 hecta. Tui nan, pambuak bruk saong 20 baoh sang bhap bini tame HTX brei pajaih, jao brei ilamu pala, eik glang  phun an xoa saong blei veik taong abih phun jru nan di mikva. Kuhria rah tapa, dom baoh sang pala an xoa duah jien tame labaih 60 trieu  sa hecta sa thun.

Langiu di nan sa-ai Thuận daok lac sa urang salut mbuat, sa-ai brei jru, iek ruak oh mek jien di urang kan kathaot, ruak trak oh hu jien jru ruak. Mbiah tal ini, sa-ai iek ruak brei saoh ka 200 urang. Sa-ai Hoàng Thị Nga, daok di ban sit Phù Yên, sa urang hu sa-ai Thuận jru dhit ruak khan lac: “Dahlak ruak viêm gan B ye menyum 3 kalaok, nao duk iek ruak mboh siam jang.”

Ngan saong bruk takre di sa-ai Hà Thị Thuận, dom pandap daong jru ruak di sa-ai dak harei dak patagok siam mekre. Dom bruk ngak di sa-ai daong ka rilo urang ruak, dom urang hu raidiuk kan kandah kham merat hu abih ruak kik dalam rup drei, prein yawa khang kajap, yam tapa kan kandah dalam raidiuk./.

Urang lang: Aí Nghiêm - 04/11