Sami samar, drah cambuai dalah, bui sambai, chreih chrai nan lac dom hagait khaol dahlak hu mboh tuk taom gaok haong dom sa-ai daok ngak bruk pak Tổ danak dak sap bangsa takik – Rayo papar sap papar binguk tỉnh Bình Thuận. Langiu di danak dak papar sap Cam 30 minit yaok adit sa mbang saong 15 minit danak dak papar binguk sap Cam yaok adit sa mbang, Tổ danak dak papar sap bangsa takik daok ngak dom danak dak papar binguk yau: Bangsa bhum ceik, Ilamo bangsa...  Khan ka dom kan kandah tuk bahrau tame ngak danak dak papar sap papar binguk sap Cam, Nhà báo Hoài Phương – urang dahlau diah pal akaok Tổ danak dak sap bangsa takik – Rayo papar sap papar binguk tỉnh Bình Thuận brei thau: “Dom harei akaok mereip bahrau ngak danak dak papar sap Cam, dalam đài tok hu dua urang (1 quay phim haong sa urang lang tapa sap Cam). Tuk tagok hình atau caong daong hagait karei ye đài njauk nao nyim dom urang jakar, trí thức Cam daok ngak bruk pak dom sở, ban, ngành karei mai daong. Meng jalan ngak yau nan bo meng akaok thun 2001, danak dak papar sap Cam hu papar sap, papar binguk gam gam yaok bilan 2 mbang dalam vaktu 20 minit sa danak dak".

    Urak ini dalam tổ hu 9 urang, dalam nan hu tal 8 urang Cam, langiu di bruk nao vak, mai ramik veik, lang tapa sap Cam, dom sa-ai daok ngak gam bruk dàn dựng, thu in dom dandak papar sap, papar binguk kayua tổ drei dang tabiak ngak. Kayua hu bac megru siam mekre saong hu ginup urang ngak, nan ye langiu di bruk patagok mbang peih, patagok vaktu danak dak papar sap Cam, Tổ danak dak sap bangsa takik – Rayo papar sap papar binguk tỉnh Bình Thuận daok sangka tal asal kadha dalam danak dak. Urang vak Văn Thiệu, sa urang hu pambuak haong danak dak sap Cam jaik 15 thun brei thau, piah hu sa thước phim gheih, sa kadha vak siam, adei sa-ai urang vak nao mai biak glaih glar, rilo mengg radaih patuh. Kayua bhap bani Cam rilo meng daok pak bhum atah bayah. Glaih abih nan lac bilan hajan, kayua lac njauk galam mac quay, gam haong takai mac trak jaik pluh ký tapa kraong, tapa craoh, ndik ceik, tapa glai nao tal dom puk palei di bhap bani… Pabak veik dom glaih glar nan, lac hatai anit ranam bo mikva dom bangsa brei ka dom urang ngak truyền hình sap bangsa. Gaok tuk mai tok lac dom ndo tangeiy tuk, dua klau baoh thanh long, min ndung bak hatai anit ranam. Sa-ai Thiệu brei thau:

      Langiu bruk glaih glar di sa urang ngak báo, dom urang ngak danak dak sap Cam pak ini jeng hu dom kan kandah karei di drei, abih di nyu lac bruk lang tapa sap Cam. Sa-ai Qua Đình Vân Thái – urang lang saong puac sap Cam di danak dak, khan lac: dalam bruk lang tapa sap Cam, dom từ đơn yau: mbang, ndih, ma-in, daoh... ye daok mbuan lang, ... daok dom  từ ralo âm tiết yau Yuan lac: xã hội, căn cứ, cơ cấu, tổ chức, đại hội... lac dom từ patagok dalam sap Yuan saong hu pandar ralo dalam báo chí, dalam sap Cam ye kan jang kayua dom panuac ini dalam sap Cam oh hu.

      Langiu di bruk pathau khan sarak di Đảng, hukum di Karja ka bruk gul pataom  bangsa, abih di nyu lac sarak brei ka bhap bani Cam, danak dak daok lac labik piah ka mikva ndom tagok hatung hatai caong khin di drei. Ini jeng lac jalan pathau khan, pambak prong dom menuac urang, dom kapul nyaom naih gheih dalam bruk ngak mbang pala drak, pablei salih naih jioy bhum urang bangsa takik... Meng jalan ngak yau nan bo danak dak sap bangsa takik di Rayo Papar sap Papar binguk Bình Thuận dak harei dak brei mboh angan je di drei. Cambaih laih nan lac dom giải ameh, giải pariak mek hu pak dom mbang liên hoan papar sap, papar binguk pakat negar. Nhà báo Na Uy, Tổ phó Tổ danak dak papar sap bangsa takik – Rayo papar sap papar binguk tỉnh Bình Thuận bui sambai brei thau: “Phần thưởng prong abih di khaol dahlak nan lac hu bruk anit ranam, daong ba di dom urang pal akaok rayo, dom urang ngak praong dom pakat saong mikva dom bangsa takik dalam tỉnh. Khaol dahlak njauk kham merat jang gah chất lượng saong asal kadha, piah jeng labik pambuak talei rohim karja haong mikva, daong ngak brei patagok rai diuk mbang angui di bhap bani bangsa takik, dalam nan hu mikva Cam Bình Thuận”.

      Piah paglaong ilamu ngak bruk ka dom adei sa-ai dalam Tổ danak dak sap bangsa takik, patagok jang dom siam mekre bruk pathau khan dalam bhap bani Cam jeng yau dalam bhum urang bangsa takik di anak tal, ong Lê Huy Toàn – Phaok akaok Rayo papar sap papar binguk tỉnh Bình Thuận brei thau:Anak tal khaol dahlak meda hu peih dom khóa pato pathram atau brei nao pathram megru piah ka adei sa-ai paglaong bruk ngak di drei, pambuak bruk ngak di drei haong bruk di anak meta, hoang rai diuk di mikva, meng nan thau hu dom kan kandah, dom mbuan laghaih dalam rai diuk di mikva piah pathau khan dalam tukvak anak tal.

     Taphia di nan, urang pal akaok đài jeng biak sangka tal bruk lang tapa sap Cam. Ong Lê Huy Toàn daok brei thau lac, suai livik jeng njauk pambuak bruk haong dom jabat pambuak tal, dom tỉnh bal hu danak dak papar sap Cam yau: Rayo sao ndom Việt Nam, Rayo Papar binguk Việt Nam, Rayo papar sap papar binguk tỉnh Ninh Thuận… peih ginum biai ka bruk lang tapa sap Cam. Meng nan pamong tal bruk padang ngak ine lang sap Cam brei ka papar sap saong papar binguk. Saong ini jeng lac hatai caong khin di dom adei sa-ai daok ngak danak dak papar sap Cam pak ini. 

    Caik veik gah likuk dom glaih glar kan kandah, dom urang ngak danak dak sap bangsa takik di Rayo Papar sap papar binguk tỉnh Bình Thuận jeng harei harei tangin bak bara galam dom janih mac moc di urang ngak papar sap papar binguk tapa craoh, cagar glai mai tal dom puk palei, mai haong mikva piah ngak bruk di drei. Kayua dom urang ini saneng lac, ini oh lac kadha bui sambai di urang ngak báo bo ini daok lac trách nhiệm haong bhap bini drei./.