Pasang iek bruk tua riya pandiak bhang khang di Ninh Thuận tukvak tapa,  Thủ tướng Raja-ei saong Mentri ngak nong saong patagok palei pala hu kakei tỉnh Ninh Thuận dalam jalan patagok bruk ngak nong di tỉnh: njauk patrun patakik taneh ngak padai saong patagok bruk pala phun diuk hu dalam pandiak pagam haong raong glang. Urak ini, urang nong tỉnh Ninh Thuận daok ngak tui sarak nan saong akaok mereip mboh hu ba kein laba,, pachreih patagok bruk pala drak, raong glang, grap tanat rai diuk 

Xã Phước Nam, huyện Thuận Nam gaok kan kandah trak kayua mbang pandiak bhang meng blaoh, tapa nan yaok pluh ha padai oh pala drak hu. Bhap bani pak ini hu ba taneh ngak padai tapa pala phun katut panak harei diuk hu dalam pandiak, sangka pala hareik piah cakrok patagok tapul athur raong. Palei Văn Lâm 4 dalam xã Phước Nam hu ba 22 ha taneh ngak padai tapa pala hareik, ratak naih saong tangeiy. Ong Thiên Sanh Thể daok pak xã Phước Nam, huyện Thuận Nam brei thau: “Taneh klaak thaoh damen ralo, drei njauk patak pataom salih tapa pala phun katut harei yau tangeiy duah jien tame yaok bilan piah grap tanat rai diuk, dut haong ngak padai te tangeiy nyu lap jang dua mbang. Pagap yau jien buh tabiak ngak padai meng 5 tal 6 triệu daok tangeiy meng 2 tal 3 triệu min.

Dom mblang taneh pala tangeiy, hareik, ratak naih ala takai binek Bà Râu jeng mai meng bruk salih janih phun pala di bhap bani xã Lợi Hải, huyện Thuận Bắc. Dahlau diah, mblang taneh ini piah ngak padai min oh lagaih, yaok thun tok ngak sa 1 vụ kayua oh hu aia. Urak ini, yaom lac aia dalam binek daok takik, min daok pala hu tangeiy saong hareik kayua janih phun pala ini takik pruh aia. Yaok bilan urang jakar thủy nông peih aia dua mbang nan lac ginup ka mikva pala drak.

Tapa mbang tua riya pandiak bhang khang,  huyện Thuận Bắc hu ba brei pajaih, tacei pato mikva salih janih phun pala ka nyu lagaih. Urak ini, huyện Thuận Bắc hu 180 ha tangeiy, hareik, 20 ha ratak naih salih ka phun padai. Ong Đào Công Vụ, Akaok balai pachreih nong huyện Thuận Bắc, tỉnh Ninh Thuận brei thau: “Ia di dom binek dalam huyện Thuận Bắc meda lac thu abih, oh hu aia piah ngak padai nan ye ủy ban huyện tacei pato mikva salih janih phun pala patak pataom aia. Salih janih phun pala habar ka nyu hu kein laba jang phun padai”.

Dalam tỉnh Ninh Thuận hu jaik 1.000 ha mblang taneh pala hareik angaok taneh ngak padai saong yaok ribau ha dom janih phun pala karei diuk hu dalam pandiak, ba mai năng suất glaong hu pala angaok mblang taneh ngak padai oh caga hu aia. Patagok phun pala diuk hu dalam pandiak, pagam haong phun pala ba mai ralo pandap panda kaya nong brei ka bruk raong athur hu takaiy nan lac jalan nao bahrau di tỉnh. Ong Đặng Ngọc Quang, akaok Pasak Pachreih nong pachreih nge Ninh Thuận brei thau: “Bruk salih janih phun pala patrun patakik taneh ngak padai aia nan lac bruk ngak praong dalam pala drak urak ini, ngan haong raong glang ye pala hareik lac jalan ngak dang akaok, piah ka tapul  athur di drei hu pren yava khang kadang. Gah pachreih nong pachreih ngư khaol dahlak daok jak ba mikva khik ramik, peih prong taneh phun pala saong tapul athur tui jalan diuk hu dalam pandiak, daong gah ilamu saong bhian tui mong tui iek piah ka urang nong hu jien mek tame ralo jang”.

 “Ninh Thuận njauk patrun patakik taneh ngak padai saong cakrok patagok phun pala diuk hu dalam pandiak gam haong roang glang”, nan lac panuac kakei di Mentri Ngak nong saong patagok palei pala dalam jalan patagok bruk ngak nong di tỉnh saong jeng lac tacei pato di  Thủ tướng Raja-ei dalam mbang nao ngak bruk haong pasang iek tua riya pandiak bhang pak Ninh Thuận meng blaoh. Urak ini, urang nong  Ninh Thuận daok ngak tui sarak nan saong akaok mereip ba mai ralo jak jeng siam mekre, pachreih patagok bruk ngak mbang pala drak, tani tanat rai diuk./.