Mintri Lao động-Thương binh saong Xã hội brei thau, hadei di labaih 1 bilan peih ngak Sarak 68 haong Sarak 23 di Rajaei ka bruk daong menuac ngak haong urang pandar menuac ngak gaok kan kandah kayua jit Covid-19, tal urak ini, hu labaih 13 triệu mbang urang ngak hu daong abih tih jaik 6.000 tỉ đồng. Anak tal, dom mintri, dom gah, dom tỉnh ban brei pachreih dom puk palei peih ngak khang jang. Dalam nan, patagok bruk tut angan tapak angaok blah web Cổng thông tin điện tử di Rajaei, di Mintri saong dom tinh, ban piah ka bruk ngak harak gar hu mbuan lagaih di abih.

Kuhria tal mon 6 mesup ini, Việt Nam taong thit ruak ka 89.145 urang ruak Covid-19. Tui panuac khan bahrau abih di Mintri Y tế, dom urang njom ruak bahrau dalam taneh ia di mbang jit meng harei 27/4 tal urak ini, lac labaih 242.600 urang, dalam nan hu labaih 86.370 urang ruak hu thit abih ruak. Hu 4 tỉnh, ban lac Quảng Ninh, Bắc Kạn, Tuyên Quang haong Lai Châu 14 harei tapa oh hu urang njaom bahrau dalam taneh ia. Kuhria tal melam 12/8, labaih 12 triệu mbang vaccine pacang Covid-19 hu klauk blaoh.

Harei 13/8, UBND tỉnh Bình Dương brei thau, tỉnh tabiak bruk daong brah, pandap mbang huak ka urang ngak daok sang pah dalam tỉnh daok gaok kan kandah kayua jit ruak Covid-19. Tui nan, brei daong pandap mbang huak atau daong meng jien ka urang ngak daok sang pah gaok kan kandah, yaok urang 500.000 đồng. Tukvak peih bruk daong nan, lac dalam bilan 8/2021. Lingiu di nan, Bưu điện tỉnh Bình Dương meda brei 100 tấn brah meng ini tal harei 23/8 ka urang hu mbang tui bảo trợ xã hội, urang ruak daok taong ruak, dom sang kan kandah. Tui kuhria, hu 29.840 urang taduan hu brah meng danak dak ini.

Tỉnh Tiền Giang bahrau padang gac Sang iek ruak dã chiến ka 7 hu 3.000 papan ndih ka urang ruak, praong abih bhum taneran kraong Cuu Long kuhria tal tukvak ini. Sang iek ruak hu padang tagok meng bruk mek pandar  Sang bac Đại học Tiền Giang (daok di xã Thân Cửu Nghĩa, huyện Châu Thành), di Sở y tế tỉnh. Yau nan tal harei ini, Tiền Giang hu 7 sang iek ruak dã chiến haong 1 Pasak hồi sức, daok taong ruak ka labaih 3.500 urang ruak Covid-19 saong hu labaih 1.700 urang thit abih ruak.

Tỉnh đoàn Bình Thuận hu peih danak dak “Lít xăng hijao”, alin hadiah 5.000 lít xăng ka urang đoàn dam dara hu mbaok tame pacang caga jit Covid-19.  Ini lac dom urang đoàn dam dara daong nao pasar daong ka rahra, pajeng ba pandap mbang, daong bruk di dom bilai pasang iek jit, daong bruk klauk jru vaccine, daong dom labik daok karei praong, labik pacang veik, labik taong ruak Covid-19. Urak ini dalam tỉnh hu yaok rabau urang halan hatian lac urang đoàn, dam dara dom kapul tame bruk pacang caga jit Covid-19. Tỉnh đoàn daok jak ba dom gah piah peih praong danak dak saong daong prein ka dom kapul ini.

Mintri Y tế Malaysia harei kabroi hu panuac ieu taong abih urang kumei metian samar nao klauk vaccine pacang Covid-19 piah patrun bruk mbuan njaom virus. Tui yaok pataom, taneh ia ini hu jaik 4.000 urang kumei metian njaom Covid-19. Kuhria tal abih harei 9/8, Malaysia hu 70 urang metai kayua dom ruak mai meng Covid-19 pambuak tal kumei metian. Karja Malaysia hu peih bruk klauk vaccine Covid-19 brei ka dom urang ini meng bilan 6, tapa nan hu jaik 150 rabau kumei metian tut angan klauk jru.

  Dom pasak klauk jru dalam ban ine Manila di Philippines daok kham merat patagok bruk klauk jru, dalam nan hu gam bruk peih pabah mbang luac harei melam abih dom harei dalam adit, piah pacang veik bruk tagok khang dom urang njauk Covid-19 kayua biến thể Delta. Philippines daok caong klauk hu ka 70% rahra dalam taneh ia, lac 110 triệu menuac piah mek hu bruk oh njaom mbak dalam bhap bini di puac thun ini. Min tal tukvak ini, Philippines bahrau ngak hu 10% bruk ba tabiak. Urak ini, taneh ia ini brei pacang veik bhum đô thị Manila, dalam nan hu 16 ban gam haong 14 triệu rahra piah pacang cakak bruk njaom mbak di biến thể Delta.

Harei 12/8, ứng dụng ngak saong klah rabha video TikTok di Trung Quốc hu khan brei thau dom jalan ngak bahrau piah pasang iek quyền riêng tư khang kajap jang ngan saong uraniah umo meng 13 tal 17 thun, hu ba tabiak ngak di dunya dalam dom bilan tal. Tiktok jeng brei thau, meda patrun tukvak pandar ứng dụng dalam harei ngan saong uraniah. Di akaok bilan 7, TikTok  brei klaak labaih 7 triệu tài khoản medil lac di anek naih umo ala 13 thun. Ini lac mạng xã hội klah rabha video daok hu pandar rilo, hu jaik 1 tỷ menuac pandar angaok dunya./.

Urang lang: M.Phuong- 13/08/2021